ބްރެޒިލްގައި އޮކްޓޯބަރު މަހު ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި ވާދަކުރައްވާ، ފާޑުކިއުންތައް އެންމެ ބޮޑަށް އަމާޒުވެފައިވާ އެއް ކެންޑިޑޭޓް ޖައިރް ބޮލްސޮނާރޯއަށް ވަޅިން ހަމަލާދީ ވަރަށް ބޮޑަށް ޒަޚަމްކޮށްލައިފިއެވެ.
ސޯޝަލް ލިބަރަލް ޕާޓީ (ޕީއެސްއެލް) ގެ ފަރާތުން ވާދަކުރައްވާ ބޮލްސޮނާރޯގެ ބަނޑަށް ވަޅި ހެރީ ރިއޯ ޑިޖެނީރޯގެ 200 ކިލޯމީޓަރު ދެކުނުން އޮަން ޖުއިޒް ޑެފޯރާގައި ކެމްޕޭންކުރައްވަނިކޮށެވެ. އޭނާއަށް ސީރިއަސް ޒަޚަމްތަކެއް ލިބިފައިވާ އިރު، އޭނާއަށ ހަމަލާ ދިން މީހާ މިހާރު ވަނީ ހައްޔަރުކުރެވިފައެވެ.
ކަނާތު ފިޔައިގެ ނޭޝަނަލިސްޓު ސިޔާސަތުތަކަށް ވަރަށް ބޮޑަށް ތާއީދުކުރައްވާ ބްލްސޮނާރޯގެ ސިޔާސަތުތަކަކީ ބްރެޒިލްގެ އާއްމުންގެ ގިނަ ބަޔަކު ތާއީދުކުރާ ސިޔާސަތުތަކަަކަށް ވިޔަސް، މެދު ފަންތީގެ ގިނަ ބަައެއްްގެ ރުޅިވެރިކަން އޭނާއަށް ވަނީ އަމާޒުވެފައެވެ. އެހެންކަމުން، އޭނާ ބެލެވިފައި ވަނީ މި އަހަރުގެ ރިޔާސީ ކެމްޕޭނުގައި ފާޑުކިއުންތައް އެންމެ ބޮޑަށް އަމާޒުވެފައިވާ އެއް ކެންޑިޑޭޓަށެވެ.
މީސް މީޑިޔާގައި ދައުރުވާ، ހަމަލާ ދިން ވަގުތު ނަގާފައިވާ ވީޑިއޯއަކުން ފެންނަ ގޮތުގައި ހަމަލާދިން ވަގުތު ބޮލްސޮނާރޯ އިންނެވީ އޭނާއަށް ތާއީދުކުރާ މީހެއްގެ ކޮނޑުމަތީގައި އެއްވެ ތިބި މީހުންނާ ސަލާންކުރައްވާށެވެ. ހަމަލާ އެރުމާއެކެ އޭނާ ކުއްލިއަކަށް ތިރިވެ މަންޒަރުން ގެއްލިގެންދާ ތަން ފެނެއެވެ. ފުލުހުން ވަނީ އޭނާއަށް ހަމަލާ ދިނުމުގެ ތުހުމަތުގައި އެޑެލިއޯ ބިސްޕޯ ޑިއޮލިވޭރާ ނަމަކަށް ކިޔާ އުމުރުން 40 އަހަރުގެ މީހަކު ހައްޔަރުކޮށްފައެވެ.
ޖައިރު ބޮލްސޮނާރޯގެ ދަރިފުޅު ފްލެވިއޯ ބޮލްސޮނާރޯ ކުރި ޓުވީޓެެއްގައި ބުނެފައި ވަނީ ބައްޕަ ހޮސްޕިޓަލަށް ގެންދެވުނު އިރު "އޮންނެވީ ގާތްގަނޑަށް އަވަހާރަވެފައި" ކަމަށާއި، ނަމަވެސް "މިހާރު ހާލު ރަނގަޅުވަމުން އަންނަ" ކަމަށެވެ.
މި ހާދިސާއާ ގުޅިގެން ބްރެޒިލްގެ ރައީސު މީޝެލް ޓެމެރް ވިދާޅުވީ "މިއީ ހިތާމަވެރި ހާދިސާއެއް" ކަމަށާއި، "ވާދަވެރި ޚިޔާލު ތަހައްމަލް ނުކުރެވޭނަމަ، ގާނޫނު ވެރިކަމެއް ނޯންނާނެ" ކަމަށެވެެ.
ސިފައިންގެ ކުރީގެ ކެޕްޓަނެއް ކަމުގައިވާ ޖައިރް ބޮލްސޮނާރޯއަކީ ޖަލުގައި އޮންނެވި ކުރީގެ ރައީސު ލޫލާ ޑަސިލްވާއަށް ފަހު އެންމެ މަގުބޫލު ކެންޑިޑޭޓެވެ. ލޫލާ ޑަސިލްވާއަށް ވާދަނުކުރެއްވޭނެކަމަށް ކޯޓުން ނިންމާފައިވުމުން މިހާރު އެންމެ ކުރީގައި އުޅުއްވަނީ ބޮލްސޮނާރޯއެވެ.
