ރ. އުނގޫފާރު ނެރުމައްޗަށް އެމްޓީސީސީގެ ކޮޅުވެއްޓިއެއް އަރައިފިއެވެ.
އެމްއެންޑީއެފުން ވިދާޅުވީ ހާދިސާގެ މައުލޫމާތު ލިބިފައިވަނީ ރޭ 8:05 އެހައިކަންހާއިރު ކަމަށެވެ.
އެމައުލޫމާތު ލިބުމާއެކު ކޮޅުވެއްޓި ފުންކުރުމުގެ މަސައްކަތް އެމްޓީސީސީއާ ގުޅިގެން ކުރައްވަން ފެއްޓެވި ކަމަށް ވެސް އެމްއެންޑީއެފް ވިދާޅުވިއެވެ. ދެފަރާތް ގުޅިގެން ކުރި މަސައްކަތުން މިއަދު ހެނދުނު 9:10 އެހައިކަންހާއިރު ވަނީ ކޮޅުވެއްޓި ފުންކުރެވިފައި ކަމަށް ވެސް އެމްއެންޑީއެފުން ވިދާޅުވިއެވެ.
މިހާދިސާ ހިނގިއިރު އޭގައި 2 ބިދޭސީންނާއި 6 ދިވެހިން ތިއްބެވެ. "ލީމާ" ނަމަކަށް ކިޔާ ކޮޅުވެއްޓީގައި ތިބި ޖުމްލަ 8 މީހުންނަށް މިހާދިސާގައި އެއްވެސް ގެއްލުމެއް ލިބިފައެއް ނުވެއެވެ.
ކޮޅުވެއްޓި ނެރަށް އެރިއިރު އޭގައި އެކްސްކަވޭޓަރަކާއި، ލޮރީ އެއްވެސް އޮތް ކަމަށް އެމްއެންޑީއެފްގެ ތަރުޖަމާނު ކެޕްޓަން އިބްރާހީމް އާޒިމް ވިދާޅުވިއެވެ.
