ބަންޑުން ޖަހާލައިފައިވާ ލޯޗެއް މާލެއަތޮޅު ވާދޫ ރިސޯޓު ކައިރީ ކަނޑުމަތިން ފެނިއްޖެ ކަމަށް އެމްއެންޑީއެފުން ވިދާޅުވެއްޖެއެވެ.
އެމްއެމްޑީއެފްގެ ތަރުޖަމާނު ކެޕްޓަން އިބްރާހީމް އާޒިމް ވިދާޅުވީ މިލޯންޗު ބަންޑުންޖަހާލައިފައިވާ ކަމުގެ މައުލޫމާތު މިރޭ 23:00 ގައި ދީފައިވަނީ މާލެއިން ފުރައިގެން އަނަންތަރާ ރިސޯޓަށް ދަތުރު ކުރަމުންދިޔަ "ޝަހީ 3" ނަމަކަށް ކިޔާ ދޯނިން ކަމަށެވެ.
ބަންޑުން ޖަހައިލައިފައިވާ ލޯންޗުގައި އެއްވެސް މީހަކު ހުރިކަމުގެ މައުލޫމާތެއް މިހާތަނަށް ލިބިފައި ނުވާ ކަމަށް އާޒިމް ވިދާޅުވިއެވެ. އެ ލޯންޗު ބަންޑުން ޖަހައިލީ ކީއްވެ ކަމެއްވެސް އަދި ނޭނގެއެވެ. އަދި އެއީ ކޮންތަނަކަށް ނިސްބަތްވާ ލޯންޗެއް ކަމެއްވެސް ސިފައިން މިހާތަނަށް ހާމަކޮށްފައެއް ނުވެއެވެ.
އެމްއެންޑީއެފް ކޯސްޓުގާޑުގެ ލޯންޗުން ގެންދަނީ އެ ސަރަހައްދުން އެލޯންޗު ފެނޭތޯ މަސައްކަތް ކުރަމުންނެވެ. އެ ސަރަހައްދަށް ލޯންޗު ބަންޑުން ޖަހާލައިފައިވާތީ އެ ސަރަހައްދުން ދަތުރުކުރާ އުޅަނދުފަހަރު އެކަމަށް ސަމާލު ވުމަށް ވެސް އެމްއެންޑީއެފުން ވަނީ އިލްތިމާސް ކުރައްވައިފައެވެ.
