ގެއްލިފައިވާ ނޫސްވެރިޔާ އަހުމަދު ރިޟްވާނާ ބެހޭ ގޮތުން ކުރީގެ ނާއިބު ރައީސް އަހުމަދު އަދީބު ރައީސް ޔާމީންގެ އިސްތަށިފުޅުގައި އެޅުވީ ކަނޑައެޅިގެން ދޮގު ތުހުމަތުތަކެއް ކަމަށް ފިޝަރީޒް މިނިސްޓަރ ޑރ. މުހައްމަދު ޝައިނީ ވިދާޅުވެއްޖެއެވެ.
އެމަނިކުފާނު ކުރެއްވި ޓްވީޓެއްގައި ވިދާޅުވެފައިވަނީ ފެށުނީއްސުރެން މިސަރުކާރުގެ ކެބިނެޓް ވަޒީރަކަށް އުޅުއްވިއިރު އަދީބު އެ ތުހުމަތު ކުރެއްވި ފަދަ ކަމެއް ނުހިނގާ ކަމަށެވެ.
އަދީބު މިއަދު ނެރުއްވި ބަޔާނެއްގައި ވަނީ ރިޟްވާން ހޯދުމުގެ މަސައްކަތް ކެބިނެޓް ފެންވަރުގައި ކުރައްވަން ހުށަހެޅުއްވި ކަމަށެވެ. އެހެންނަމަވެސް ރައީސް ޔާމީން ވަނީ އެކަމަށް ދެކޮޅު ހައްދަވައިފައި ކަމަށެވެ.
އެކަމަށް ރައްދު ދެއްވައި ރައީސް ޔާމީން މިއަދު ވިދާޅުވީ ބޮޑެތި ކުށްސާބިތުވެ ހުކުމް އިއްވާފައިވާ މުޖުރިމުން ދައްކާ އެކަހަލަ ބުހުތާން ވާހަކަ ނޫސްތަކުން ހާމަކުރައްވާތީ ހިތާމަ ކުރައްވާ ކަމަށެވެ.
ރިޟްވާން ގެއްލިގެން ހޯދުމުގެ މަސައްކަތް އޭރުވެސް މިހާރުވެސް ދިވެހިފުލުހުން ކުރައްވަމުން ގެންދަވާ ކަމަށް ރައީސް ވިދާޅުވިއެވެ. އެމަނިކުފާނު މިއަދު ވިދާޅުވީ ރިޟްވާން ވަނީ ނިޔާވެފައި ކަމަށެވެ. އެއީ ޝައްކެއްނެތް ކަމެއް ކަމަށެވެ. އެހެންނަމަވެސް މީގެ ކުރިން ސަރުކާރުގެ އެއްވެސް ފަރާތަކުން ރިޟްވާން ނިޔާވެފައިވާ ކަމަށް ވިދާޅުވެފައެއް ނުވެއެވެ.
މިކަމާގުޅިގެން ފިޝަރީޒް މިނިސްޓަރ ޑރ. ޝައިނީ ކުރެއްވި ޓްވީޓުގައި ވިދާޅުވެފައިވަނީ "ﷲ ސުބުޙާނަހޫ ވަތަޢާލާގެ ހެޔޮރަޙުމަތްފުޅުން މިސަރުކާރުން ފެށުނީއްސުރެން މިއަދާ ހަމައަށް ކެބިނެޓު ވަޒީރަކަށްވާއިރު އަދީބު، ރައީސް ޔާމީންގެ ބޮލުގައި އެޅުވި ތުހުމަތު ދޮގުކުރަން. ރައީސް ޔާމީން އަބަދުވެސް އިރުޝާދު ދެއްވީ އަދި ދެއްވަނީ ރިޟްވާންގެ މައްސަލައިގެ ހަގީގަތް ހޯދަން،" ޝައިނީގެ ޓްވީޓުގައި ވިދާޅުވެފައި ވެއެވެ. އަދީބު ހެދީ ދޮގު ކަމަށް ރިޟްވާންގެ އާއިލާއން ވެސް ބުނެފައިވާ ކަމަށް ބައެއް ނޫސްތަކުން ވަނީ ބުނެފައެވެ.
