ހުރިހާވެސް އުއްމީދަކީ އަޙްމަދް ރިޟްވާންގެ މައްސަލައިގައި ޝާމިލުވާ މީހުން ޝަރީއަތުގެ ކުރިމައްޗަށް ގެންދިއުން ކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދް ޞާލިޙް މިއަދު ވިދާޅުވެއްޖެއެވެ. ރިޟްވާންގެ މައްސަލައިގައި ހިމެނޭ އެއްވެސް މީހަކު ކޯޓު މަރުހަލާއާ ހަމައަށް ނުގޮސް ތަހުގީގު ނިންމާލާނެތީ އެކަމާ ގުޅޭގޮތުން ކުރެވުނު ސުވާލަކަށް ޖަވާބު ދެއްވަމުން ރައީސް ވިދާޅުވީ ކޮމޝަން އުފެއްދެވީ ވަރަށް ހެޔޮ ނިޔަތުގައި ކަމަށެވެ.
ރިޟްވާންގެ ތަހުގީގުގެ ޑްރާފްޓް ރިޕޯޓު އެމަނިކުފާނަށް ލިބިވަޑައިގެންނެވި ކަމަށް ރައީސް ވިދާޅުވިއެވެ. އަދި މަޖިލީހުން މައުލޫމާތު ހޯދަން އެދުމުން "އަޙްމަދް ރިޟްވާން ޢަބްދުﷲ ގެއްލުވާލާފައިވާ މައްސަލައިގެ ޕްރިލިމިނަރީ ރިޕޯޓު އާއްމުވުމާ ގުޅިގެން ކޮމިޝަނަށް ހެކިބަސްދޭން ތިބި ބައެއް ފަރާތްތަކުން ހެކި ބަސް ދިނުމަށް އިންކާރުކޮށްފައިވާތީ އެކަން ކޮމިޝަނުން ފާހގަކުރަން" ކަމަށާއި އަދި "ކޮމިޝަނުން ބަލަމުންދާ މައްސަލަތަކުގައި ތުހުމަތުކުރެވޭ ބައެއް ފަރާތްތަކުން ސިޔާސީ އެކިއެކި ފަރާތްތަކާއެކު ގާތް ގުޅުމެއް އޮތްކަން ފެންނަ ފަދަ ގޮތަކަށް ސިޔާސީ އެކިއެކި އިވެންޓުތަކުން ފެންނާތީ މިކަމުގެ ސަބަބުން ކޮމިޝަނުން ތަހުގީގުކުރަމުންދާ މައްސަލަތަކާ މެދުގައި އާއްމުން ދެކޭގޮތް ބަދަލުވެގެންދާކަން ފާހަގަކުރެވޭ ކަމާއި" ނަމަވެސް ތަހުގީގުކުރިއަށް ދާ ކަމަށް ކޮމިޝަނުން ފޮނުއްވި ސިޓީގައިވާ ކަމަށް ރައީސް ވިދާޅުވިއެވެ.
ޑރ. އަފްރާޝީމްގެ މައްސަލައިގެ ތަހުގީގު ނިންމައި ދައުވާ ކުރަންޖެހޭ މީހުންގެ ނަންތަކެއް ފާހަގަކޮށް ޕްރޮސެކިއުޓަރ ޖެނެރަލް ގެ އޮފީހަށް ފޮނުވުމުން އެވަގުތު ޕީޖީއަށް ފެނިވަޑައިގެންނެވީ ދައުވާކުރުމަށް ކޯޓަށް ހުށަހެޅުމަށް އިތުރު މައުލޫމާތު ބޭނުންވާ ކަމަށް ކަމުގައި ރައިސް ވިދާޅުވިއެވެ. އަދި އިތުރަށް ތަހުގީގުކުރަން ފެނިވަޑައިގަންނަވާ ކަމަށް ޕީޖީ ވިދާޅުވުމުން އިތުރު ތަހުގީގެއް ކޮމިޝަނުން ފެއްޓެވި ކަމަށާއި އަދި ނުނިމޭ ކަމަށް ރައީސް ވިދާޅުވިއެވެ.
މީގެ އިތުރަށް ޔާމީން ރަޝީދުގެ މައްސަލައާ ގުޅިގެން ކޮމިޝަނުން ވިދާޅުވީ "މައްސަލައިގައި ތުހުމަތުކުރެވޭ ބައެއް ފަރާތްތަކަށް ދައުވާކޮށް ޝަރީއަތް ކުރަމުންދާތީ ޝަރީއަތާ މެދު ސުވާލު އުފައްދަފާނެތީ މައްސަލައާ ގުޅިގެން ކުރަންޖެހެ މަސައްކަތް މަޑުޖައްސާލާފައި" ކަމަށް ރައީސް ވިދާޅުވިއެވެ.
"އަޅުގަނޑުގެމެން ވެރިކަމަށް އައި އިރުގަ ޔާމީން ރަޝީދުގެ މައްސަލަ ތަހުގީގުކޮށް ޕްރޮސެކިއުޓަރ ޖެނެރަލް ގެ އޮފީހުން އޮތީ މައްސަލަ ޝަރީއަތަށް ހުށަހަޅާފައި. ޝަރީއަތް އޭރު ކުރިއަށްދަނީ. މި އުފެއްދި ކޮމިޝަނުން އެ މައްސަލަ އިހަށް މަޑުޖައްސާފަ އޮތީ. އެހެންނަމަވެސް އެކަމުގެ ތަހުގީގުކުރިއަށްދޭ." ރައިސް ވިދާޅުވިއެވެ. އަދި ފައިނަލް ރިޕޯޓު ތައްޔާރުނުކޮށް އޮތީ އެ މައްސަލައިގަ ކޯޓުން ވަކި ގޮތެއް ނުނިންމައގެން ކަމަށް ރައީސް ވިދާޅުވިއެވެ.
ރައީސް ވިދާޅުވީ ކޮމިޝަންގެ މަސައްކަތް ކޮޅެއްގައި ޖެހެންދެން ކުރިއަށް ގެންދަވާނެ ކަމަށެވެ. އަދި ކޮޅެއް ހޯދޭނެކަމަށް ވެސް ވިދާޅުވިއެވެ. އެކަމަށް ބޭނުންވަނީ ފެސިލިޓީސްކަން ފާހަގަކުރައްވަމުން ރައީސް ވިދާޅުވީ ކޮމިޝަނަށް މެންބަރުން އިތުރުކުރުމުގެ ވިސްނުންފުޅެއް ނުގެންގުޅުއްވާ ކަމަށެވެ. އެހެންނަމަވެސް މިހާރު ފެށިފައި ހުރި މަސައްކަތް ކުރިއަށްދާނެ ކަމަށެވެ.
