ރިޟްވާންގެ މަރާ ގުޅިގެން ކަނޑުމަތީގެ އޮޕަރޭޝަނެއް ވެސް ފަށައިފި ކަމަށް ފުލުހުން ވިދާޅުވެއްޖެއެވެ.
މިއީ މާލެއާއި އައްޑޫގައި ރެއިން ފެށިގެން ފުލުހުން ހިންގަމުންދާ އޮޕަރޭޝަނުގެ އެއްބައި ކަމަށްވެސް ފުލުހުން ވިދާޅުވިއެވެ. މިއީ "މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ބެލުމަށް އުފައްދާފައިވާ ކޮމިޝަން" ގެ އެދިވަޑައިގަތުމުގެ މަތިން ފުލުހުން ފަށައިފައިވާ އޮޕަރޭޝަނެކެވެ. ކަނޑުމަތީގައި މިއަދު ފެށި އޮޕަރޭޝަނާ ބެހޭ އެއްވެސް ތަފްސީލެއް ފުލުހުން ނުދެއްވައެވެ.
މިހާތަނަށް އެއްވެސް މީހަކު ބަންދު ކޮށްފައި ނުވާކަމަށް ފުލުހުން ވިދާޅުވިއެވެ. އެހެންނަމަވެސް މިއަދުވެސް މާލޭގެ ތިން ގެއެއް ބަލައި ފާސްކުރުމުގެ މަސައްކަތް ފުލުހުން ވަނީކޮށްފައެވެ. މި އޮޕަރޭޝަނުގައި ފުލުހުންވަނީ 9 ތަނެއް ބަލައި ފާސް ކޮށްފައެވެ. އޭގެ އިތުރަށް ބައެއް މީހުންވެސް ފާސްކޮށްފައިވެއެވެ.
ފުލުހުން މިއަދު ފެށި ކަނޑުމަތީ އޮޕަރޭޝަން ކުރިއަށް ގެންދަނީ މާލޭ އޭރިއާގައެވެ.
