ޕާކިސްތާނުގައި އަލަށް ހޮވިވަޑައިގަތް ބޮޑުވަޒީރު ޢިމްރާން ޚާން ބުރާސދްފަތި ދުވަހު މެންދުރު ފަހު ގައުމާ މުޚާޠަބް ކުރައްވައި ވާހަކަފުޅު ދައްކަވައިފިއެވެ.
ޢިމްރާން ޚާން ވާހަކަފުޅު ފެއްޓެވީ ބާވީސް އަހަރުގެ މަސައްކަތްޕުޅަށް ފަހު ޕާކިސްތާނުގެ ވެރިކަމަށް ވަޑައިގެން ގައުމަށް ޚިދުމަތް ކުރެއްވުމުގެ ފުރުސަތު ދެއްވިޔަތީ ﷲ އަށް ޙަމްދާއި ޝުކުރު ކުރައްވަމުންނެވެ.
ތިރީގައި މި ލިޔަނީ ޢިމްރާން ޚާންގެ ވާހަކަފުޅުގެ ޚުލާސާއެކެވެ. ސީދާ އެމަނިކުފާނުގެ ޢިބާރާތަކުންނެއް ނޫނެވެ.
"އަޅުގަނޑު ސިޔާސީ މައިދާނަށް ނުކުތީ މީގެ ބާވީސް އަހަރު ކުރީންނެވެ. އެ ދުވަސްވަރަކީ އަޅުގަނޑު ބޭނުން ނަމަ އެއްވެސް ކަމެއް ނުކޮށް އަރާމުގައި ދިރިއުޅެވިދާނޭ ދުވަސްކޮޅެކެވެ. ސިޔާސީ ދާއިރާއަށް ނުކުމެ އުނދަގުލުގައި އުޅޭން އަޅުގަނޑު ގަސްތު ކުރީ ޕާކިސްތާނުގެ ޤާޢިދު މުޙައްމަދު ޢަލީ ޖިނާޙް ތަސައްވުރު ކުރެއްވި ޕާކިސްތާން ގެނެސްދިނުމުގެ ބޭނުމުގައެވެ. އެ ދިމާއަށް ދަތުރު ކުރެވޭތޯ މަސައްކަތް ކުރުމުގެ ބޭނުމުގައެވެ.
ޕާކިސްތާނާ މެދު އަޅުގަނޑު ދެކޭ ހުވަފެނަކީ މީގެ ސާދަސަތޭކަ އެތައް އަހަރެއް ކުރީން ރަސޫލުﷲ ޞައްލަﷲ ޢަލައިހި ވަސައްލަމް މަދީނާގައި ގާއިމު ކުރެއްވި ދައުލަތެވެ. އެއީ ހަމަހަމަކަމާއި، ޤާނޫނުގެ ވެރިކަމުގެ ދައުލަތެކެވެ. މުއްސަނޑދިންގެ އަތުިން ފައިސާ އަތުލާފައި ފަގީރުންނަށް އެހީތެރިވެދިން ދައުލަތެކެވެ. ދެރައެއް މޮޅެއް ނެތި އެންމެންގެ މެދުގައި ހަމަހަމަކަމާއެކު އަދުލު އިންސާފު ގާއިމު ކުރެވުނު ދައުލަތެކެވެ. އަޅުގަނޑުގެ މުދައްބިރަކީ، ނަމޫނާއަކީ ރަސޫލުﷲ ޞައްލަﷲ ޢަލައިހި ވަސައްލަމްއެވެ. އަޅުގަނޑު މަސައްކަތް ކުރާނީ އެކަލޭގެފާނު ދެއްކެވި ފަދަ ނަމޫނާ ވެރިކަމެއް ޕާކިސްތާނުގައި ކުރާށެވެ.
އިންތިޚާބުގައި އަޅުގަނޑާ ވާދަކުރެއްވި ބޭބޭފުޅުން އަޅުގަނޑާމެދު ދެއްކެވި ވިޔާނުދާ ވާހަކަތައް އަޅުގަނޑު ހަނދާން ނައްތައިލައިފީމެވެ. ސިޔާސީ ގޮތުން އެއްވެސް މީހަކަށް ބޮނޑިއެއް ދޭކަށް މަސައްކަތެއް ނުކުރާނަމެވެ. ޤާނޫނީ ކުށެއް ނުކުރާ މީހަކަށް އެއްވެސް އަދަބެއް ނުލިބޭނެއެވެ. އަޅުގަނޑު މަސައްކަތް ކުރާނީ އަޅުގަނޑުމެންގެ އިދާރާތައް ވަރުގަދަ ކުރާށެވެ. މިނިވަން ކުރާށެވެ. ބާރުވެރި ކުރުވާށެވެ.
ގައުމުގެ އާބާދީގެ ބޮޑު ބައެއް ފަގީރު ހާލުގައި އުޅޭއިރު އަޅުގަނޑު އަރާމުގައި އުޅޭކަށް ގަސްތެއް ނުކުރާނަމެވެ. ބޮޑުވަޒީރުގެ ގެއާމެދު ކަންތައް ކުރާނޭ ގޮޕތް ނިންމާނީ ސަރުކާރުންނެވެ. އަޅުގަނޑު އެގެޔަކު ނޫޅޭނަމެވެ. އަޅުގަނޑު ޓެކްސް ފައިސާ ޙިމާޔަތް ކުރާނަމެވެ. އެ ފައިސާ ޚަރަދު ކުރެވެނީ ރަނގަޅު ގޮތުގައިކަމުގެ ޔަގީންކަން ރައްޔިތުންނަށް ލިބޭނޭ ގޮތް ހަދާނަމެވެ.
ވޭތުވެދިޔަ ދެތިން ދުވަހެއްގެ ތެރޭގައި އިންޑިއާގެ މީޑިއާއިން އަޅުގަނޑު ސިފަކޮށްފައި ވަނީ ބޮލީވުޑް ފިލްމެއްގެ ނުބައިބައި ކުޅޭ މީހެއްގެ ގޮތުގައެވެ. އެއީ ވަރަށް ދެރަ ކަމެކެވެ. އެމީހުން ބުނަމުން ދިޔަ ގޮތުގައި އަޅުގަނޑު ވެރިކަމަށް އައުމާއެކު ދުނިޔޭގައި ލެއްވި ހުރިހައި ނުބައިކަމެއް ހިނގަން ފަށާނެއެވެ. އެކަހަލަ ވާހަކަ ދެއްކުން ހުއްޓާލަން ވެއްޖެއެވެ. އަޅުގަނޑު ބޭނުން ވަނީ އިންޑިއާ އެކު އޮންނަ ގުޅުން ރަނގަޅު ކުރާށެވެ. މުޅި ސަރަހައްދަށްވެސް އޮތް އެންމެ ފައިދާ ބޮޑު ގޮތަކީ އެއީއެވެ. ވިޔަފާރީގެ ގުޅުން ދަމަހައްޓާށާއި، ކަޝްމީރުގެ މައްސަލަ ހައްލު ކުރަން ދެފަރާތުން ވާހަކަ ދައްކާން ފެށުމަކީ އަޅުގަނޑު އުއްމީދު ކުރާ ގޮތެވެ. އިންޑިއާއިން ކުރިއަށް އެއް ފިޔަވަޅު އެޅިއްޔާ އަޅުގަނޑުމެން ދެ ފިޔަވަޅު ކުރިއަށް އަޅާނަމެވެ. އެއް ބަޔަކު އަނެއް ބަޔަކަށް ގަޅި އުކުމަކުން ކުރާނޭ ފައިދާއެއް ނެތެވެ. އިންޑިއާއިން ދެކޭ ގޮތުގައި ދުނިޔޭގެ ކޮންމެ ތަނެއްގައި ނިރުބަވެރި އަމަލެއް ހިނގިޔަސް އެއީ ޕާކިސްތާނުން ކުޅަ ކަމެކެވެ. ޕާކިސްތާނުން ބުނާ ގޮތުގައި ބަލޫޗިސްތާނުގައި ހިނގާ ހުރިހައި ހަމަނުޖެހުމަކީ އިންޑިއާއިން ކުރުވާ ކަމެކެވެ. މިކަހަލަ ތުހުމަތުތައް ކުރުމުގެ ބަދަލުގައި ވާހަކަދައްކައިގެން މައްސަލަތައް ހައްލު ކުރަން ވީއެވެ.
އަޅުގަނޑުމެން ޗައިނާއާ އޮތް ގުޅުންވެސް ބަދަހި ކުރާނަމެވެ. ޗައިނާއިން އެންމެ ފުރަތަމަ އަޅުގަނޑުމެން ދަސްކުރާނޭ ފިލާވަޅަކީ ފަގީރުކަން ނައްތައިލާނޭ ގޮތުގެ ފިލާވަޅެވެ. ދެއިރު ކާން ނުލިބޭ ފަގީރުންގެ ހާލަތު ރަނގަޅު ކުރާނޭ ގޮޕތުގެ ފިލާވަޅެވެ. ދެވަނައަށް ޗައިނާއިނބް ލިބިގަންނާންވީ ފިލާވަޅަކީ ކޮރަޕްޝަން ނައްތައިލާނޭ ގޮތުގެ ފިލާވަޅެވެ. ކޮރަޕްޝަންގެ ސަބަބުން ފައިދާއެއް ލިބިގަތަނުދޭނޭކަން ޗައިނާއިން ވަނީ އަމަލުން ދައްކައިދީފައެވެ.
އެމެރިކާއާއެކު އޮންން ގުޅުން ބަދަހިކުރާނަމެވެ. އަފްޣާނިސްތާނާއެކު ޖެހިފައިވާ މައްސަލަތައް ހައްލުކޮށް ގުޅުންތައް ރަނގަޅު ކުރާނަމެވެ.
ޖަވާބުދާރީވުމަކީ ސަރުކާރުގެ ނުވަތަ ދައުލަތުގެ ކޮންމެ މުލާޒިމަކަށް ވާޖިބު ކަމެކެވެ. ފުރަތަމަ ފެށޭނީ އަޅުގަނޑާ ހަމައިންނެވެ. ފުރަތަމަ ބަލާނީ އަޅުގަނޑުގެ މައްސަލައެއް އޮތްތޯއެވެ. ދެނަ ބަލާނީ އަޅުގަނޑުގެ ވަޒީރުންގެ މައްސަލަތަކެވެ. އެއްވެސް މީހަކަށް ޖަވާބުދާރީ ނުވެއެއް ނުހުރެވޭނެއެވެ.
އިންތިޚާބުގައި އޮޅުވާލިކަމުގެ ތުހުމަތު އިދިކޮޅުން އެބަކުރެއެވެ. އެކަންތައްވެސް ތަހުގީގު ކުރާނަމެވެ. އެކަމުގައި އަޅުގަނޑު ބައިވެރިވެ އެއްބާރުލުން ދޭނަމެވެ.
ޕާކިސްތާނުގައި މިހައިތަނަށް އެއްވެސް މީހަކު ވެރިކަން ކޮށްފައި ނެތްފަދަ ރަނގަޅު ގޮތަކަށް އަޅުގަނޑު ވެރިކަން ކުރާނަމެވެ. އެންމެ އިސް އެއްޗަކީ ގާނޫނުކަން ދައްކައި ދޭނަމެވެ.
ގައުމުގެ ވެރިކަން ކުރުމުގެ ފުރުސަތު އަޅުގަނޑަށް ދެއްވި ކަމަށްޓަކައި ﷲ އަށް ޙަމްދު ކުރަމެވެ."
ބޮޑުވަޒީރުކަމަށް ހޮވިވަޑައިގަތް ނަމަވެސް އަދި ޢިމްރާން ޚާން ވެރިކަމާ ހަވާލުވެވަޑައެއް ނުގަނެއެވެ. ހަވާލުވެވަޑައިގަންނަވާނީ އިލެކްޝަންސް ކޮމިޝަނުން ރަސްމީ ނަތީޖާ އިޢުލާނު ކުރީމައެވެ. އެކަމަށް އަދި ހައެއްކަ ދުވަސް ވާނޭ ކަމަށް ޕާކިސްތާނުގެ މީޑިއާއިން ބުނެއެވެ.
