ކުރިއަށްއޮތް ރިޔާސީ އިންތިޚާބުގައި ރީރަޖިސްޓްރީ ކުރުމަށް އިލެކްޝަންސް ކޮމިޝަން (އީސީ) އިން ގާއިމް ކޮށްފައިވާ އެއްވެސް ޑެސްކެއްގައި އެއްވެސް ސިޔާސީ ޕާޓީއަކުން ހަރަކާތްތެރިވަމުން ނުދާ ކަމަށް އެ ކޮމިޝަނުން ވިދާޅުވެއްޖެއެވެ.
ކޮމިޝަންގެ ރައީސް އަހުމަދު ޝަރީފް ވިދާޅުވީ އީސީގެ ރީރަޖިސްޓްރޭޝަން ޑެސްކް ތަކުގައި ޕީޕީއެމްގެ މީހުން ހަރަކާތެރިވަމުންދާ ކަމަށް ބުނެ ސިޓީތަކެއް ލިބިފައިވާ ކަމަށެވެ. މައުލުމާތު ލިބިފައިވާ ގޮތުގައި އެ ސިޓީތަކަކީ އެމްޑީޕީން ނުވަތަ ސަރުކާރާ ވާދަވެރި ޕާޓީތަކުން ފޮނުވައިފައިވާ ސިޓީތަކެކެވެ.
"ބައިވަރު ސިޓީތައް އެބަހުރި ލިބިފައި އިލެކްޝަންސް ކޮމިޝަނުން ރީރަޖިސްޓްރީ ކުރާ ޕޮއިންޓުތަކުން ސިޔާސީ ޕާޓީތަކުން ހަރަކާތްތެރިވާ ކަމަށް. އެއީ ދޮގު ވާހަކައެއް، އެއީ އެއްގޮތަކަށް ވސް ސައްހަ ވާހަކައެއްނޫން،" އީސީގެ ރައީސް އަހުމަދު ޝަރީފް ވިދާޅުވިއެވެ.
ޝަރީފް ވިދާޅުވީ ރިޔާސީ އިންތިޚާބާ ގުޅޭ ކޮންމެ ކަމެއްގައި ވެސް ޝަކުވާއެއް ހުށަހަޅައިފި ކަމަށްވާނަމަ އެކަމެއް ބެލުމަށްފަހު ޝަކުވާ ހުށަހެޅި ފަރާތަކަށް ޖަވާބު ދެއްވާނެ ކަމަށެވެ. އެއްވެސް ޝަކުވާއެއް އޮތް ކަމަށްވާނަމަ ހުށަހެޅުމުގެ ފުރުސަތު އޮންނާނެ ކަމަށް ވެސް އޭނާ ވިދާޅުވިއެވެ.
"އަޅުގަނޑުމެން އިލެކްޝަންސް ކޮމިޝަންގެ ރީރަޖިސްޓްރީ ކުރާ އެއްވެސް ޑެސްކެއްގައި އެއްވެސް ސިޔާސީ ޕާޓީއެއްގެ ހަރަކާތެއް ނުހުންނާނެ ހިންގާފައެއް. އަދި ޕާޓީގެ ޓެގް އަޅައިގެންތިބި ބަޔަކު ތިބިކަމަށް ބުނާބުނުމަކީ ވެސް ދޮގެއް،" ޝަރީފް ވިދާޅުވިއެވެ.
