ރައީސް ޔާމީންގެ ރަނިންމޭޓަކަށް ހުންނަވައިގެން ރިޔާސީ އިންތިޚާބު ކާމިޔާބު ވެއްޖެ ކަމަށްވާނަމަ އެކަން ވެގެންދާނީ ދިވެހި އަންހެނުންގެ މަގާމް ރާއްޖެއާއި ދުނިޔޭގައި ވެސް ޕްރޮމޯޓު ކުރުމަށް ލިބިގެންދާނެ ރަނުގެ ފުރުސަތަކަށް ކަމަށް ރައީސް ޔާމީންގެ ރަނިންމޭޓް ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ރޭ ޒުވާނުންނާ ބައްދަލުކުރައްވައި ދެއްކެވި ވާހަކަފުޅުގައެވެ.
"އަޅުގަނޑު ރައީސް ޔާމީން އަރިހުގައި ލީޑާޝިޕްގައި އެމަނިކުފާނަށް އެހީތެރިކަން ދެއްވުމަށް ހުރުމަކީ އިސްލާމްދީނުގައި އަންހެނުންނަށް ދެއްވާފައިވާ މަތިވެރި މަގާމް ދިވެހިރާއްޖެއާއި ބައިނަލް އަގުމާވީ މުޖުތަމައަށް ޕްރޮމޯޓު ކުރުމަށް ލިބިގެންދާ ވަރަށްބޮޑު ރަނުގެ ފުރުސަތަކަށް،" އެމަނިކުފާނު ވިދާޅުވިއެވެ.
ޝަހީމް ވިދާޅުވީ އިސްލާމްދީނުގައި އަންހެނުންނަށް ވަނީ ވަރަށް މަތިވެރި މަގާމެއް ދެއްވައި ކަމަށެވެ. އެގޮތުން ފިރިހެނުންނާ އެއްސަފެއްގައި މަސައްކަތް ކުރުމުގެ ފުރުސަތު އަންހެނުންނަށް ލިބިދީފައިވާ ކަމަށް އެމަނިކުފާނު ވިދާޅުވެއްޖެއެވެ.
"އިސްލާމް ދީނަކީ އަންހެނުންނަށް ވަރަށްމަތިވެރި މަގާމެއް ދީފައިވާ ދީނެއް. ފިރިހެނުންނާ އެއްސަފެއްގައި މަސައްކުރުމުގެ ފުރުސަތު ދެއްވާފައިވާ ދީނެއް،" ޝަހީމް ވިދާޅުވިއެވެ. ދައުލަތުގެ އިސްމަގާމްތަކުގައްޔާއި ކުންފުނިތަކުގެ އިސް މަގާމްތަކުގައި ވެސް އަންހެނުން ތިބުމަށް އިސްލާމް ދީން ހުރަސް ނާޅާ ކަމަށްވެސް އެމަނިކުފާނު ވިދާޅުވިއެވެ.
އެމަނިކުފާނު ވިދާޅުވީ ސަރުކާރުގެ އިސްމަގާމްތަކަށް އަންހެނުން ބޭފުޅުން އިސްކުރެއްވުމަށް މިހާރުވެސް ރައީސަށް ދަންނަވައިގެން އެކަން ކުރައްވާ ކަމަށެވެ. އެގޮތުން އިސްލާމިކް މިނިސް އެފެއާޒު މިނިސްޓްރީގެ ޑެޕިޔުޓީ މިނިސްޓަރަކަށް ޑރ. މުނީޒާ ހަމަޖެއްސެވުމާއި އިސްލާމިކް ޔުނިވަރސިޓީގެ ވައިސް ޗާންސެލަރ ކަމަށް އަލްއުސްތާޒާ އާއިޝަތު ޚަލީލާ ހަމަޖެއްސެވީ ވެސް އެމަނިކުފާނުގެ އެދިވަޑައިގަތުމަށް ކަމަށް ވެސް ވިދާޅުވިއެވެ.
ޒުވާނުންނާ ބައްދަލު ކުރައްވައި އެމަނިކުފާނު ދެއްކެވި ވާހަކަފުޅުގައި ވިދާޅުވީ ތައުލީމީ ދާއިރާއިންނާއި ކުޅިވަރުގެ ދާއިރާއިންނާއި އިޖުތިމާއީ ދާއިރާއިން ވެސް އަންހެނުންނަށް ފުރުސަތު އޮންނާނެ ކަމަށެވެ.
އެމަނިކުފާނު ގައުމުގެ ލީޑަރޝިޕްގައި ރައީސް ޔާމީން އަރިހުގައި ހުންނެވިހާ ހިނދަކު އަންހެނުންނަށް އޮތް ފުރުސަތު ތަކަށް އެއްވެސް ހަނިކަމެއް ނާންނާނެ ކަމަށާއި އަންހެނުން ބާރުވެރި ކުރެއްވުމަށް ރައީސް ޔާމީން ކުރައްވާ މަސައްކަތްޕުޅުތަކަށް އަބަދުވެސް އެހީތެރިކަން ފޯރުކޮށް ދެއްވާނެ ކަމަށް ވެސް ޝަހީމް ވިދާޅުވިއެވެ.
