ޕޮލެންޑުގެ ހައިވޭއެއްގައި 12 ޓަނުގެ ދިޔާ ޗޮކްލެޓް އުފުލި ޓްރަކެއް ފޮރުޅާލުމުގެ ސަބަބުން އޭގައި ހުރި ޗޮކްލެޓް ހައިވޭ މައްޗަށް ފައިބައި، ހައިވޭ ބަންދުކުރަން ޖެހިއްޖެއެވެ.
އެ ގައުމުގެ އޭ2 މޯޓަރވޭ އިން ދަތުރުކުރަމުން ދިޔަ ޓްރަކް ފުރޮޅާލީ ހުޅަނގު ދެކުނުގައި އޮންނަ ގްރަބޮޒެވޯ އަވަށުގައި، ހައިވޭގެ ދެ ފަޅި ވަކިކުރަން ޖަހާފައި ހުރި ފެންސުގައި ޖެހިގެންނެވެ. ޓްރަކް ފުރޮޅާލުމާއެކު އޭގައި ހުރި ޗޮކްލެޓް ހައިވޭ މައްޗަށް ފައިބައި، ދެކޮޅަށް ދަތުރުކުރާ 6 ލޭނަށް ފެތުރިގެން ދިޔައެވެ.
ދެކޮޅަށް ދަތުރުކުރާ ހުރިހާ ލޭނެއް ބަންދުވުމުގެ ސަބަބުން ހައިވޭގައި ޓްރެފިކް ވަނީ ހުއްޓުމަކަށް އައިސްފައެވެ. ފުލުހުން ބުނީ މަގު ސާފުކުރަން އެތައް ގަޑިއިރެއް ނަގާނެ ކަމުގައެވެ. އެންމެ ބޮޑު މައްސަލައަކީ ފިނިވުމުގެ ސަބަބުން ޗޮކްލެޓް ހަރުވާން ފަށާފައި ވުމެވެ. އެހެންކަމުން ހުރިހާ ޗެކޮލެޓެއް ސާފުކުރަން ވަރަށް ގިނަ ހޫނުފެން ބޭނުންވާނެއެވެ. އަދި އެއީ ހަކުރު އަޅާފައި ހުރި ޗެކްލެޓުކަމަށް ވެއެވެ.
ޗޮކްލެޓް އުފައްދާ ކުންފުނިން ބުނި ގޮތުގައި ޗެކްލްޓް ސާފުކުރުމަކީ ތެޔޮ ސާފުކުރުމަށް ވުރެވެސް އުނދަގޫ މަސައްކަތެކެވެ. އެކަން ކުރެވޭނީ ހޫނުފެން ޖަހައި ކޮޗެލެޓް ދޮވެ ސާފުކޮށްގެންނެވެ.
އަތް ބިނދުން ފިޔަވައި އެހެން ގެއްލުމެއް އެ ޓްރަކްގެ ޑްރައިވަރަށް ލިބިފައި ނުވެއެވެ.
