(28 ފެބުރުއަރީ 2025 ގައި ޝާއިއުކުރި ބަޔާ ގުޅޭ)
"ބިރުފުޅު ގެންވަޑައިނުގަންނަވާށެވެ." އޭނާ އަންހެން ކުއްޖާގެ ހިތް ހަމަޖައްސަވައިދެއްވަމުން ވިދާޅުވިއެވެ. "އަޅުގަނޑަކީ ވަގެއް ނުވަތަ ފޭރޭ މީހެއް ނޫނީމެވެ. ތިޔައީ ކޮން ބޭފުޅެއްތޯއެވެ؟ އަޅުގަނޑަށް މީގެ ކުރީން ތިޔަ ބޭފުޅާ ފެނިފައެއް ނެތެވެ. އަޅުގަނޑުގެ ކޮއްކޮގެ އެކުވެރީންގެ ތެރޭގައި ވެސް ތިޔަ ބޭފުޅާއާ ވައްތަރު ކުއްޖަކު ނުހުރެއެވެ."
އަންހެން ކުއްޖާގެ ބިރު ޙައިރާންކަމާއި ކަންބޮޑުވުމަށް ބަދަލު ވާން ފަށައިފިއެވެ. އޭނާ ސިހިފައި ވާ އަޑަކުން ސުވާލު ކުރިއެވެ. "ކަލެޔަކީ ވަގެއް ނުވަތަ ފޭރޭ މީހެއް ކަމުގައި ނުވާ ނަމަ، މި ވަގުތު މި ކޮޓަރިއަށް ތިޔަ ވަނީ ކޮން އެއްޗެއް ނަގާންހެއްޔެވެ؟ މިތަނުން ދާން އުޅޭށެވެ! އެހެން ނޫނީ އަހަރެން ހަޅޭއްލަވައިގެންފާނަމެވެ."
ރަންބީރު ވިދާޅުވިއެވެ. "އަޅުގަނޑު އުފަލުން ތިޔަ ބޭފުޅާއަށް ހަޅޭއްފުޅު ލެއްވެވުމުގެ ހުއްދަ ދެމެވެ. ނަމަވެސް ތިޔަ ބޭފުޅާ އެހެން މީހަކަށް ވިދާޅުވުމުގެ ބަދަލުގައި އަޅުގަނޑުގެ ކޮއްކޮ މިތަނަށް ގެނެސްދެއްވައިފިއްޔާ ވަރަށް ރަނގަޅެވެ."
އަންހެން ކުއްޖާގެ ޙައިރާންކަން ރުޅިވެރިކަމަށް ބަދަލު ވެއްޖެއެވެ. އޭނާ ބުނެފިއެވެ. "ކަލެޔަކީ ވަގެއް ކަމުގައި ނުވާ ނަމަ، ދުނިޔެއިން މޮޔަ ވެފައި ހުރި މީހެއްކަން ކަށަވަރެވެ. އަހަރެން އަހަރެންގެ ބަދުނާމުވުމާ މެދު ފިކުރު ނުކުރާ ނަމަ މިހާރު ހަޅޭއްލަވައި ގޭގެ އެންމެން ހޭލައްވައިފީމުހެވެ."
"އެންމެ ރަނގަޅެވެ. ހަޅޭއްފުޅު ލައްވަވާށެވެ!" ރަންބީރު ހަމަޖެހުމާ އެކު ޖަވާބު ދެއްވިއެވެ.
އަންހެން ކުއްޖާގެ ކަންބޮޑުވުން އަނެއްކާވެސް ބިރު ގަތުމަށް ބަދަލު ވާން ފަށައިފިއެވެ. އޭނާ ބުންޏެވެ. "ކަލޭ ކަލޭގެ ފުރާނަޔާ މެދު ވެސް ބިރެއް ނުގަނޭހެއްޔެވެ؟"
"އެއްގޮތަކަށް ވެސް ނުގަނެއެވެ."
"އެހެން ވީއިރު، ކަލޭ ބޭނުމީ ކޮން ކަމެއްހެއްޔެވެ؟ ކަލެޔަކީ ކާކުހެއްޔެވެ؟ ކަލޭ މި ވަގުތު އަހަރެންގެ ކޮޓަރީގައި ...؟"
"ތިޔައީ ކޮން ބޭފުޅަކުކަން ވިދާޅުނުވާހައި ހިނދަކު އަޅުގަނޑު ތިޔަ ބޭފުޅާގެ އެއްވެސް ސުވާލަކަށް ޖަވާބެއް ނުއަރުވާނަމެވެ."
"މަރު ވުމަށް ޓަކައި ކަލެޔަށް އަހަރެންގެ ކޮޓަރި ފިޔަވައި އެހެން ތަނެއް ނުހޯދުނީހެއްޔެވެ؟"
"އާދޭހެވެ! އަޅުގަނޑު މަރު ވުމަށް ޓަކައި ވެސް، ނުވަތަ ދިރިހުރުމަށް ޓަކައި ވެސް އެހެން ތަނެއް ހޯދާކަށް އަދި ބޭނުމެއް ނޫނެވެ."
އަންހެން ކުއްޖާ ރުޅި އައިސްގެން އޭނާގެ ތުންފަތް ހަފަމުންގެންދެއެވެ. ރުޅި އައިސްފައި ހުންނަ އިރު އެޔަށްވުރެ ހިތްދަމައިގަންނަ ގޮތް ހުރި އެއްވެސް މޫނެއް ރަންބީރު މީގެ ކުރީން ދެކެވަޑައިގެންފައެއް ނެތެވެ. ކުއްލިޔަކަށް އަންހެން ކުއްޖާގެ ނަޒަރު އޭނާގެ އަތުކުރިޔަށް ހުއްޓިއްޖެއެވެ. އޭނާގެ އަތުކުރީގައި ވިދަވިދައި އޮތް ތަނޑުގަނޑު ފެނިފައި އޭނާގެ ރުޅި ޙައިރާންކަމަށް ބަދަލު ވެއްޖެއެވެ. އޭނާ އިރުކޮޅަކު ހިމޭނުން އިނުމަށް ފަހު އިލްތިމާސުގެ ރާގުގައި ބުނެފިއެވެ. "ކަލޭ ހަމައެކަނި އަންހެން ކުއްޖަކު ބަދުނާމު ކުރުމަށް ޓަކައި މަރު ވާން ޤަބޫލު ވަނީހެއްޔެވެ؟ ތިޔަހެން ތިޔަ ހަދަނީ އަހަރެން ކަލެޔަށް ކޮން ގެއްލުމެއް ދީފައި އޮވެގެންހެއްޔެވެ؟"
އަންހެން ކުއްޖާގެ ލޮލުން ކަރުނަ ފެނިވަޑައިގަތުމުން ރަންބީރަށް އަސަރު ކޮށްގެން ވިދާޅުވިއެވެ. "މަޢާފު ކުރައްވާށެވެ! އަޅުގަނޑަށް މި ކޮޓަރިއަށް ވަދެވުނީ އޮޅިގެންނެވެ. އަޅުގަނޑުގެ މި ޙަރަކާތް މެހުމާނަކު ހާސް ވުމުގެ ސަބަބެއް ކަމުގައި ހިމެނޭނެކަމަކަށް ހީއެއް ނުކުރަމެވެ."
"ތިޔަ ބުނީ މެހުމާނެކޭ ހެއްޔެ؟ ކާކުގެ މެހުމާނެއް ހެއްޔެވެ؟ މިއީ އަހަރެންގެ އަމިއްލަ ގެއެވެ."
"އެންމެ ރަނގަޅެވެ! މިއީ ތިޔަ ބޭފުޅާގެ ގަނޑުވަރު ކަމުގައި ވިޔަސް، ޝަކުންތަލާ ވީ ތަނެއް ވިދާޅުވެދެއްވަބައްލަވާށެވެ. އަޅުގަނޑު އެހެން މީހަކު ހޭލެއްވުމުގެ ކުރީން އޭނާ ދެކެލާން ބޭނުމެވެ."
"މަނިކުފާނު ތިޔަ ސުވާލު ކުރައްވަނީ މޯހަންޗަންދުގެ ދަރިކަނބަލުންނާ ބެހޭގޮތުން ތޯއެވެ؟"
"އާދޭހެވެ! އަޅުގަނޑަކީ އޭނާގެ ބޭބެއެވެ!"
އަންހެން ކުއްޖާގެ މޫނު ކުއްލިޔަކަށް ރީނދޫ ވެއްޖެއެވެ. އޭނާ ބެދެމުންދާ އަޑަކުން ބުންޏެވެ. "މަނިކުފާނު ހުންނެވީ މުސްލިމުންގެ ޤައިދުގައިތޯއެވެ؟"
"އާދޭހެވެ! އަޅުގަނޑު މި އައީ ހަމަ ދެންމެއެވެ. ގަހަށް އަރައިގެން މިހިރަ ކުޑަދޮރުން މި ކޮޓަރިއަށް ވަނީއެވެ. އަޅުގަނޑު ގަސްތު ކުރީ ޝަކުންތަލާ ހާސް ކޮށްލާންކަމަށެވެ. ނަމަވެސް ޝަކުންތަލާއަށް ލިބޭން ވީ ހާސްކަން ލިޔުއްވައިފައި ވަނީ ތިޔަ ބޭފުޅާގެ ނަޞީބުފުޅުގައެވެ. އަޅުގަނޑު ތިޔަ ބޭފުޅާގެ އަރިހުން މަޢާފު އެދެމެވެ. ހަމަ އެއާއެކު، ޝަކުންތަލާގެ ކޮޓަރިއަށް އަޅުގަނޑު ގެންގޮސްދެއްވުން ވެސް އެދެމެވެ. އެހެން ނޫނީ، ތިޔަ ބޭފުޅާ ފަދައިން އެހެން ކޮންމެވެސް މެހުމާނަކަށް އުނދަގޫ ކުރެވިދާނެތީ އަޅުގަނޑު ބިރު ގަނެއެވެ.
އަންހެން ކުއްޖާގެ ހިތަށް ބިރުވެރިކަމާއި ރުޅިވެރިކަމުގެ ބަދަލުގައި މިހާރު ވެރި ވެފައި ވަނީ މުރުއްވަތާއި ހަމްދަރުދީއެވެ. އޭނާގެ ކުރިމަތީގައި ހުރީ ވަގެއް ނުވަތަ ފޭރޭ މީހެއް ނުވަތަ ދުނިޔެއިން މޮޔަ ވެފައި ހުރި މީހެއް ވެސް ނޫނެވެ. ރީތީގެ ދޭވަތާއެއްގެ ސިފަ ލިބިގެންވާ ޒުވާނެކެވެ. އޭނާ ވަނީ މި ޒުވާނާގެ ޚަބަރު އަހައިފައެވެ. މި ޒުވާނާ ފަސް އަހަރު ވާންދެން ޖަލުގައި އޮންނެވުމަށް ފަހު މިއަދު މި ވަޑައިގަތީ އޭނާގެ ކޮއްކޯފުޅާއި ބައްޕާފުޅާ ބައްދަލު ވެވަޑައިގަތުމުގެ އެދުންފުޅުގައިކަމާއި، އޭނާއާ ކުރިމަތި ވާން އުޅެނީ ހިތާމަވެރި ހާދިސާއަކާކަން އިޙުސާސް ކުރެވިއްޖެއެވެ. އޭނާ ރަންބީރާ ދިމާޔަށް ބަލައިލައިފައި، އޭނާގެ ހިތުގައި އަންނަނިވި ލަފުޒުތައް ތަކުރާރު ކުރަމުން ގެންދިޔައެވެ. "މަނިކުފާނު މިތަނަށް ވަޑައިނުގެންނެވި ނަމައެވެ! އަޅުގަނޑަށް މިތާނގައި ނުއޮވެވުނު ނަމައެވެ!"
ރަންބީރު އަންހެން ކުއްޖާގެ މޫނުމަތީން ހިތާމަ އާއި މޮޅިވެރިކަމުގެ އަސަރުތައް ދެކެވަޑައިގެން ސުވާލު ކުރެއްވިއެވެ. "އަޅުގަނޑުގެ ބައްޕަ އާއި ޝަކުންތަލާގެ ޙާލުކޮޅު ކިހިނަކުންތޯއެވެ؟"
އަންހެން ކުއްޖާ ފަސް ޖެހިލައިފައި ޖަވާބު ދިނެވެ. "އެ ބޭފުޅުން މިތާކު ނުއުޅުއްވައެވެ. މަނިކުފާނުގެ ފުރާނަފުޅަކީ އެއްވެސް އަގެއް ހުރި އެއްޗެއް ކަމުގައި ދެކެވަޑައިގަންނަވާ ކަމުގައި ވާނަމަ، ކަލާނގެ ރަސްކަންފުޅަށް ޓަކައި މަނިކުފާނު ވެސް އަވަހަށް މި ތަނުން ސަލާމަތް ވެވަޑައިގަންނަވާށެވެ."
ރަންބީރު ހިނިފުޅު ވަޑުވައިލައްވައިފައި ވިދާޅުވިއެވެ. "އަޅުގަނޑު މިހިރީ ވަރަށް ވަރުބަލި ވެފައެވެ. އެހެން ނޫންނަމަ ތިޔަ ބޭފުޅާގެ އަމުރުފުޅަށް ކިޔަމަން ވުމާ މެދު އިންކާރެއް ނުކުރީމުހެވެ."
"އަޅުގަނޑު މި ދަންނަވަނީ ތެދެކެވެ. މަނިކުފާނުގެ ބައްޕާފުޅާއި ކޮއްކޯފުޅު މި ގެޔަކު ނެތެވެ."
"އެ ބޭފުޅުން ވީ ކޮން ތަނަކުތޯއެވެ؟"
"ކަލާކޮށްޓަކައި މަޑުން ވާހަކަފުޅު ދައްކަވާށެވެ. އަޅުގަނޑަށް އެ ބޭފުޅުންގެ އެއްވެސް ޚަބަރެއް ނޭނގެއެވެ. އަޅުގަނޑަށް އެނގޭ ކަމަކީ މަނިކުފާނަކީ މޯހަންޗަންދުގެ ދަރިކަލުން ކަމުގައި ވާނަމަ، މި ގޭގެ ހަތަރު ފާރުގެ ތެރެއަކީ މަނިކުފާނުގެ ފުރާނަފުޅަށް ރައްކައުތެރި ތަނެއް ނޫންކަމެވެ."
ރަންބީރު ދޮރާ ދިމާޔަށް ވަޑައިގެން ތަންޑުގައި އަތްޕުޅު ޖައްސަވަމުން އެނބުރިވަޑައިގެން އަންހެން ކުއްޖާއާ ދިމާޔަށް ބައްލަވައިލައްވައިފައި ވިދާޅުވިއެވެ. "ތިޔަ ކުރައްވާ ސަމާސާ ވަނީ އަޅުގަނޑުގެ ކެތްތެރިކަމުގެ ދާއިރާއިން ބޭރުގައެވެ. މި ގޭގެ ހަތަރު ފާރުން ބޭރުގައި އަޅުގަނޑުގެ ފުރާނަ އަކީ އަގުހުރި އެއްޗެއް ކަމުގައި އަޅުގަނޑު ދެކޭނެކަމަށް ތިޔަ ބޭފުޅާއަށް ހީފުޅު ވީ ކިހިނަކުންތޯއެވެ؟"
"މަޑު ކުރައްވާށެވެ! ކަލާކޮށްޓަކައެވެ! ތިޔަ ފަރާތަށް ވަޑައިނުގަންނަވާށެވެ!" އަންހެން ކުއްޖާ މިހެން ބުނެފައި ދުވެފައި އައިސް ރަންބީރުގެ އަތްޕުޅުގައި ހިފަހައްޓައިފިއެވެ.
އަންހެން ކުއްޖާގެ މި ޙަރަކާތުން ރަންބީރުގެ ޔަޤީންކަމަށް ގުޑުން އަރައިފިއެވެ. ނަމަވެސް އޭނާ ހިނިފުޅު ވެޑުވޭތޯ މަސައްކަތް ކުރައްވަމުން ވިދާޅުވިއެވެ. "އަޅުގަނޑަށް ހީވާ ގޮތުގައި އަޅުގަނޑަށް ތިޔަ ބޭފުޅާއަށް ކުރެވުނު އުނދަގޫފުޅަށް ފުދޭ ވަރަށް ބަދަލު ހިއްޕެވިއްޖެއެވެ. ދެން އިތުރަށް ސަމާސާ ނުކުރައްވާށެވެ."
އަންހެން ކުއްޖާ ފެންކަޅި ވެލައިފައި ބުންޏެވެ. "އަޅުގަނޑު ކަލާނގެ ރަސްކަންފުޅު ގަންދީ ދަންނަވަމެވެ. އަޅުގަނޑު މަނިކުފާނާ ސަމާސައެއް ނުކުރަމެވެ. އަޅުގަނޑުގެ ބަސް ޤަބޫލު ކުރައްވާށެވެ. މަނިކުފާނު ވަޑައިގެންނެވި މަގުން އެނބުރިވަޑައިގަންނަވާށެވެ. މިހާރު މި ގެ މަނިކުފާނަށް ނަންދުނާގެ ކިއްލާއަށް ވުރެ ނުރައްކާތެރިކަން ކުޑައެއް ނޫނެވެ. ވަޑައިގަންނަވާށެވެ! އަވަސް ކުރައްވާށެވެ!" އެ ކުއްޖާ ރަންބީރު ކުޑަދޮރާ ދިމާޔަށް ދަމައިފައި ގެންދާން ފަށައިފިއެވެ. ނަމަވެސް ރަންބީރު އެއްވެސް ޙިއްސެއް ޙަރަކާތެއް ނެތި އަންހެން ކުއްޖާއާ ދިމާޔަށް ބައްލަވާން ހުންނެވިއެވެ. އެ ވަގުތު ބޭރުން ކޮންމެވެސް މީހަކު ދޮރު ތަޅުވައިގެންފައި ގޮވައިލައިފިއެވެ. "ނިރުމަލާއެވެ! ނިރުމަލާއެވެ! ދޮރު ހުޅުވާށެވެ!"
އަންހެން ކުއްޖާ އާދޭހުގެ ނަޒަރަކުން ރަންބީރާ ދިމާޔަށް ބަލާން ފަށައިފިއެވެ.
"ނިރުމަލާއެވެ! ދޮރު ހުޅުވާށެވެ!" ކޮންމެވެސް މީހަކު ކުރިޔަށް ވުރެ ވެސް ކުރަކި އަޑަކުން ހަޅޭއްލަވައިގެންފިއެވެ.
އަންހެން ކުއްޖާ ބިރުން ހުރެ ބުންޏެވެ. "ބައްޕާއެވެ! ކީއް ވީތޯއެވެ؟"
ކޮންމެވެސް މީހަކު އަޑުގައި ނެތް ތަނަށް ހަޅޭއްލަވައިގެންފިއެވެ. "ދޮރު ހުޅުވާށެވެ!"
"ހުޅުވަނީއެވެ. ބައްޕާއެވެ!" މިހެން ބުނެފައި އަންހެން ކުއްޖާ ރަންބީރާ ދިމާޔަށް ބަލާން ފަށައިފިއެވެ. އޭނާގެ ކިބައިގައި ވާ ވާހަކަ ދެއްކުމުގެ ހުރިހައި ބާރެއް ވެސް އޭނާގެ ނަޒަރާ ވަނީ އެކު ވެފައެވެ. ރަންބީރު ވެސް އެ ކުއްޖާއާ ދިމާޔަށް ބައްލަވައިލެއްވިއެވެ. ނަމަވެސް މިހާރު ކަންތައް ވަނީ އޭނާއަށް ބާރު ފޯރުއްވޭ ހިސާބެއްގައެއް ނޫނެވެ. އޭނާ އަންހެން ކުއްޖާގެ އަތް ފޮޅުވައިލައްވައިފައި ތަންޑު ނައްޓަވައިލައްވައިފިއެވެ. ކުއްލިޔަކަށް ވަރުގަދަ އަޑުފަށްގަނޑަކާ އެކު ދޮރުފަތުގެ ދެ ފަޅި އެކުގައި ހުޅުއްވިއްޖެއެވެ. ރަންބީރުގެ ކުރިފުޅުމަތީގައި ވަރުގަދަ މީހެއް ބަރަހަނާ ކަނޑިއެއް ހިފައިގެން ހުއްޓެވެ. އޭނާގެ ފަހަތުގައި ވެސް ހަތިޔާރު އެޅި ބަޔަކު ތިއްބެވެ. އަންހެން ކުއްޖާ "ބައްޕާއެވެ! ބައްޕާއެވެ!" ގޮވަމުން ދުވެފައި ގޮސް އެ ވަރުގަދަ މީހާގެ ގައިގައި އޮޅުލައިގެންފިއެވެ. ރަންބީރު ޙައިރާންފުޅު ވެވަޑައިގެން ހުންނަވައި ތަންކޮޅެއް ފަހަތަށް ޖެހިވަޑައިގެން އޭނާގެ ކަނޑިކޮޅު އުރައިން ދަންމަވައިގެންފިއެވެ.
(ނުނިމޭ)
