"އަދި މަޑުކުރޭ.މަޑުކުރޭ. ކޮތަރު ވިއްކާމީހުން ކާރީ ބޮސް ކޮތަރު ވާހަކަދައްކަނީ!" ފެންޑާމަތީ ތިބި މީހުންނަށް، އެ އަނގައިން ދޫކޮށްލި ބަހުގެ އިތުރަށް ލޮލާއި ބޮލުގެ އިސާރަތުން ވެސް އެ އަމުރެއް އިއްވައިފައި އެ މީހަކު ގޭތެރެއަށް ވަދެގެން ހިނގައްޖެއެވެ. ވާހަކައިގެ ރާގުންނާއި ބަސްމަގު ހުރި ގޮތުން، ވާހަކަ އަމާޒުވީ ތިން ދިވެހީންނަށް އެއީ ބޭރުމީހެއްކަން ރޭކައިލާކަށް ސިކުންތެއް ވެސް ނުނެގިއެވެ.
އެތެރެއަށް ވަދެގެން ދިޔަ މީހާގެ ހިލަވަޅު އޮބުމުން، ދެ ފަރާތުގައި ތިބި ދެ މީހުންނަށް ބަލައިލައިފައި އައްޔޫބަށް ހައިރާންކަމާ އެކު ކިޔައިލެވުނެވެ.
"ކޮތަރު ވިއްކާމީހުންނޭ! ކޮތަރުވާހަކައޭ!"
"އެއީ ބަންގާޅުމީހެއް، ކޮއްކޯ! އޭނާ އެ ބުނަނީ ކޮތަރެއްގެ ވާހަކައެއް ނޫން. ކޮތަޅުގެ ވާހަކަ. އެ މީހުންގެ ބަހުގައި ޅަވިޔަނީގެ އަޑު ނޯންނާތީ ދިވެހިބަހުން 'ކޮތަޅު' ކިޔަން 'ކޮތަރު' ކިޔެނީކަމަށް ލަފާކުރެވެނީ." އައްޔޫބުމެން ގޮވައިގެން މި ގެޔަށް އައިސް އިން ރައިވެރި މޮހޮންމަދުބެ ހިނިގަނޑެއް ޖަހައިލައިފައި ބުނެލިއެވެ.
"ތިޔައީ ވުމާ ވަރަށް ގާތް ގޮތެއް!" އައްޔޫބުގެ އެކުވެރިޔާ އިސްހާގު ބުނެލިއެވެ. "އާންމުކޮށް ހުރިހައި ބޭނުންތަކަށް، ވަކިން ޚާއްސަކޮށް ދަނޑުފަނގުގެ ބޭނުންތަކަށް ތިމާވެއްޓާ ރައްޓެހި، އެކި ސައިޒުގެ ސުތުލި ގޯންޏާއި ކޮތަޅު ވިޔެ އުފައްދައިގެން އެ ތައާރަފުކުރުމުގެ ބުރެއްގައި މާލެއިން އެ ކާރުޚާނާގެ ބަޔަކު މިއަދު މި ރަށަށް އައިސްގެން އެބައުޅޭ ވިއްޔަ!"
ބައްދަލުކުރަން ބޭނުންވި "ބޮހު"ގެ އިންތިޒާރުގައި ގޮނޑި ހޫނުކުރަން ޖެހުނު ހިނދު އައްޔޫބަށް ކަޅި އުފުއްލައިލައިގެން އިނދެވުނީ މި ތަނަވަސް ފެންޑާގެ ފަޚުރެއްކަމަށްވާ އަލި ބިއްލޫރިގަހަށް މިރޭ ބޭރުން ވޮށްދޫނީގެ އައިނެއް އައިސް ބީތާވެ، އެއިން އެސޮރުމެންނަށް ނުނެއްޓެވިގެން އުޅޭ މަންޒަރަށެވެ. އެހެނަސް އޭނަގެ ޚިޔާލުތައް އުދުހިގަތީ އަމިއްލަ ހާލަށް، އިއްޔެގެ ވަގުތަކަށެވެ.
އެއީ މެންދުރުން ފަސްވެ އަސުރުދަމަށް އެޅެމުން ދިޔަ ވަގުތެވެ. އައްޔޫބު އިނީ ދޮންވެލިގަނޑުމައްޗަށް ހަނިއަރިޔަށް ކޮޅަށް ޖަހައިފައި ހުރި އޭނަގެ ފޮށިމަތީ ލުއިލުއި ގޮތަކަށް ފޫޖައްސައިލައިގެންނެވެ. މި ޕްލާސްޓިކު ފޮއްޓަކީ އޭނާ ފަދަ ވިހި ބާވީސް އަހަރުގެ ބޮޑު ފިރިހެނެއްގެ ބަރު ހިފާވަރަށް ވުރެ ތަންކޮޅެއް ހަލުކާ އެއްޗެއްކަމަށް ފެންނާތީ އޭނާ "ހަލާކުވިޔަސް" ފޮށި ހަލާކުވިޔަ ނުދޭން ދުރާލައި ސަމާލުވެލައިގެން އިން ކަހަލައެވެ. އޭނަގެ ކަނާތްފަރާތުގައި އޭނަގެ އެކުވެރި އިސްހާގު ވެސް ހަމަ އެފަދަ ލުއި ގޮތަކަށް ފޮށިމަތީ ފޫޖައްސައިލައިގެން ފޯނާ ކުޅަލަކުޅެލައި އެބަ އިނެވެ. ގާގަލުން ފެހި ކާން ތޮށިމަތީ ރާބުޅާގަނޑުގަނޑު ހުއްޓި ތިބޭ ބީދައިން، މިތާ ބައިބައިހަދައި ހުއްޓި މި ތިބީ ހުސް ބަންގާޅުމީހުންނެވެ. ރިސޯޓެއްގައި ވަޒީފާއަދާކުރަމުން އައި އައްޔޫބާއި އިސްހާގެކޭ އެއްފަދައިން، ބަންގާޅުމީހުން ވެސް އެ މީހުން ވަޒީފާއަދާކުރި ރިސޯޓަށް ބައެއް އިތުރުކޮށްހެދުމަށް ބަންދުކޮށް، ވަކި މުއްދަތެއް ނެތް ގޮތެއްގައި މުއައްޒިފުން "ނޯޕޭލީވް"ގައި ފޮނުވައިލައިފައިވަނިކޮށް މި ރަށުން ވަޒީފާ ލިބޭ ވާހަކަ އަހައިގެން،ވަޒީފާގެ ބޭނުމުގައި މި ރަށަށް އައީ ފެންއޮތްތާކަށޭމަސްދާނީ ބުނާ އުސޫލުންނެވެ.
މާލެއިން އައި "ޒިންދަގީ" ބޯޓުން ފައްތިޔާދޯންޏެއްގައި ރަށަށް މުދާ ބާލާ މަންޒަރު ދެކޭން އައްޔޫބު ބަނޑުމައްޗަށް ހުރަސްކޮށްލި އަތަށް އަނެއް އަތުގެ އުޅަނބޮށި ދީގެން ދަތްދޮޅީގައި އަތްތިލަ ވިއްދައިލައިގެން އިނެވެ. މިއީ މާ ރަނގަޅަށް ދަންނަ މީހަކު ނޫޅޭ ބީރައްޓެހި ރަށެއް ނަމަވެސް އޭނާ ދަތުރުމަތީ ދެކެފަރިތަވެލައިފައިވާ "ބޮންދުން" ގެ ބައެއްގެ ތެރޭގައި އިނދެވުނީތީ އައްޔޫބުގެ ބީރައްޓެހިކަން ހިސާބަކަށް ކުޑަވާ ގޮތްވިއެވެ. އެހެން ނަމަވެސް ހަޔާތުގެ ކުރިމަގާމެދު ކުރެވޭ ފިކުރާއި ޚިޔާލުތަކުން އެއްކިބާވެލެވޭނެ ގޮތެއް ނުވި ތާނގައި، ހިތަށް ވެރިވެފައިވާ ނުތަނަވަސްކަން ވެސް ދުރުކޮށްލެވޭ ގޮތެއް ނުވިއެވެ. ކުއްލިއަކަށް، ވިދައިލި ވިދުވަރެއްހެން، އޭނަގެ ހިތުތެރޭ ވިދައިލީ އޭނަގެ ލޮބުވެތި މާމަ އަބަދުވެސް ބުނެއުޅޭ ބަހެކެވެ. "ކޮންމެ ފުރަމެންދަމެއްގެ ފަހުން އަންނަނީ ފަތިހެކެވެ. ކޮންމެ ވިއްސާރައެއްގެ ފަހުން އަންނަނީ އަލި ރީތި ދުވަސްތަކެވެ!"
މި ރަށުން އާންމު ގޮތެއްގައި ލިބެން ހުރީ ކޮން ކަހަލަ ވަޒީފާއެއްކަން ވެސް މި އެނގުނީ މި ރަށަށް އައިމައެވެ. ވަޒީފާ ހޯދަން އައިސް ތިބި މީހުން ހިތާހިތުން މިނެކިރައިލައިފައި، މި ރަށު ހަރުކުލައިގެ މީހަކު، ފިލާވަޅެއް ނަގައިދޭ ކަހަލަ ރާގަކަށް، އޭނާ ކައިރީގައި ހުރި ކޮންމެވެސް ބީރައްޓެހި ރަށެއްގެ ޒުވާނާއަށް ކިޔައިދިނެވެ.
"ބުނަންތަ ކޮއްކޯ! ފަހަކަށް އައިސް މި ރަށު ގިނަ މީހުންގެ މަސައްކަތަކީ ދަނޑުވެރިކަން. ޚާއްސަކޮށް ފަތްކޭލުގެ ދަނޑުވެރިކަން. ރަށަކީ ތިން ފޫޓެއްހައި އަޑީގައި އާނުއޮތް ބިންގަނޑު މޮޅު މާ ރަށެއް ވިއްޔަ. ފެން ފުންކަމުން ފަތްކެޔޮ މޮޅަށް ހެދެނީ އާނު ކަނޑައިގެން އިންދީމާ. އެކަމަކު މި އާނު ކެނޑުމެކޭ ހިނި އަރައި ފަރުބަދަކެނޑުމެކޭ މާކަ ބޮޑު ފަރަގެއް ނުހުރޭ. ފާންތިލަ އަތުކޮޅަށް ދަމައިލައި، ގައިގައި ހުރި ހިތްވަރެއްލައިފައި ވީއްލައިލީމާ އާނުގަނޑުން ފަހަރަކު ވަކިވެގެން ދަނީ ހުޅުނބު ފަތެއް ވަރުގެ އެތިފުކެއް ވިއްޔަ! ރަށުގެ އާނަކީ އެހައި ވެސް ހަރު ހިލަ އާނެއް. ރަށުގެ ކޮންމެ މީހެއްގެހެން އަތުގެ ހަންބޯވެ ކުރަލައިފައި އެ ހުންނަނީ އާނުކެނޑުމަށް ކުރަން ޖެހޭ ބުރަ މަސައްކަތުގެ ސަބަބުން. ނަމަވެސް އާނުކަނޑައިގެން ވަޅުވަޅުގަނޑުގައި ނިރުތައް އިންދުމުން ކާން ލިބޭ ކެޔޮ، އެއީ ކަލެޔާ ބުނާކަށް ވާ ފޮނި ކޭލެއް އިނގޭ! އަނެއްކާ ކެޔޮގަނޑުގަނޑުގައި ޖަހާ އަރި ގިނަވެފައި ވަށް ފަލަކަމުން އެއިން ކެޔޮގަނޑެއް އެކަނި އެކަކަށް އުފުއްލައިގެން އެއް ތަނުން އަނެއް ތަނަށް ގެންދިއުމާ ނުކުޅަދާނަވާނެ. މަ މި ބުނި ކޭލުގެ ތެރޭގައި ހިމެނެނީ މާޅޮސްކެޔޮ، ބޮޑުކެޔޮ، ބޮންތިރަތްކެޔޮ، ފުސްކެޔޮ، ސަންފާކެޔޮ، ކަނދިލިކެޔޮ، ވޮށިކެޔޮ މިހެން ގޮސް ކިޔާނެ ކަމެއް ނެތް. ދިވެހިންގެ ތެރޭގައި ނަންކުރެއްވިހައި ވައްތަރެއްގެ ފަތްކެޔޮ! މީގެ އިތުރަށް ލަންކާގެ އާނަމާލު ފަދަ މަލިކުބޮޑުކެޔޮ ފަދަ ބައެއް ބޭރުގެ ވައްތަރުތައް ވެސް މި ފަހަކަށް އައިސް ކާމިޔާބުކަމާ އެކު އިންދައި ހައްދައިފިން. ފީވަކާއި ފުވައްމުލަށް އަނބަށް މަޝްހޫރު ފަދައިން މި ރަށް މިހާރު މަޝްހޫރުވެފައި ވަނީ ފަތްކޭލަށްކަން އެނގޭތަ ކޮއިފުޅާ؟..."
އެ މީހާ މި ރަށުގެ ކޭލަށް އެ ކޮށްލި ތާރީފެއްގެ ފޮނިކަމުން ކަނޑު ދަތުރެއްކޮށް، ހެނދުނުއްސުރެ ކާއެއްޗެއް އަނގަޔަށް ނުލައި ތިބި އައްޔޫބާއި އިސްހާގުގެ މޭފުރިއަރައި ތަލިތަތްލަވާން ވެސް ފެށި ކަހަލައެވެ.
އަޅުންގެ ބާޒާރަކުން އަޅުން ހޮވައި ނަގާހެން ރަށުގެ އެކިއެކި މުއްސަނދީން، ފޯރާމީސްމީހުން، ރޫފަޔާއި އިސްކޮޅަށް ބަލައި ގައިގައި ޖޯރުހުންނާނެކަމަށް ފެނުނު ތަރުތީބުން ބަންގާޅުމީހުން ހޮވައި ނަގަމުންދިޔައެވެ. ނަމަވެސް އައްޔޫބާއި އިސްހާގާ ޖެހުމުން، އެއީ ސަމައްތަރުހެޔޮ، އިސްކޮޅު ހުރި ކުދީންނަށް ވިޔަސް، ކޮންމެ މީހަކުވެސް ބޭގަރާރު ގޮތަކަށް ބޯހޫރައިލައިފައި ބުނެލައެވެ."ކަލޭމެން ތިޔައީ ދިވެހީންތާއެވެ. ކޮން ރަށެއްގެ ކުދިންނެއް ހެއްޔެވެ؟"
އެ މީހުންނަށް ޖަވާބުދާރީވަމުން އައްޔޫބު ބުނެއެވެ."މަށަކީ ތުރާކުނު ކުއްޖެއް. ދެން މިތާ މީނީ ކުރިނބީ ކުއްޖެއް!"
"ބޮޑުތިލަދުންމަތީ މީހުންތާ!"
އެއްބަސްވުމުގެ ގޮތުން އައްޔޫބު ބޯޖަހައިލައެވެ. އެ ހިސާބުން ކޮންމެ މީހަކުވެސް ތުންފިއްތައިލައިފައި ދަނީއެވެ.
މި ގޮތުން އެންމެ ފަހުން އައިސް ޚަބަރު އަހައިހެދި މީހާ އަޑުނީވޭ ފަށަށް ފޭވެލުމުން، އިސްހާގަށް ބަލައިލައިފައި އައްޔޫބު މަޑު އަޑުން ބުނެލިއެވެ.
"މާޒީގައި ހިނގައިދިޔަ ކޮންމެވެސް ކަމަކާ ވިދިގެން ބޮޑުތިލަދުންމަތީ މީހުންނާމެދު މި ރަށު މީހުންގެ ޚިޔާލުގައި އަނެއްކާ ނުބައި ތަސައްވަރެއް އޮންނަނީކީ ނޫންބާ؟ އެހެންކަމަށްވާ ނަމަ އެ އިސާރަތްކުރަނީ އަހަރެމެން ދުނިޔެއަށް އައުމުގެ ވެސް ފަންސާސްފަސްދޮޅަހަކަށް އަހަރު ކުރިން، ބޮޑުހަނގުރާމައިގެ ދުވަސްވަރު ރާއްޖެ ތަޖުރިބާކުރަމުން ދިޔަ ތަދުމަޑުކަމަށް އިހުތިޖާޖުކުރުމުގެ ގޮތުން، ބޮޑުތިލަދުންމަތީ މީހުން ހިންގި މަޝްހޫރު 'އުތުރުގަޑުބަޑަށް' ނޫންބާ؟"
"ވެދާނެ!" ފިކުރެއްގެ ތެރެއަށް ގެއްލިފައި އިން އިސްހާގު އޮރިދަމައިގަތް ކަހަލަ ގޮތަކަށް ދެ އަތަށް ދެ ކޮނޑު އަރުވައިލަމުން ބުނެލިއެވެ.
އައްޔޫބު ކޮޅުކޮޅަށް ބަލައިލައިފައި އަހައިލިއެވެ. "އޭތް ކޮބައިތަ އަހަރެމެންނާ ހަވާލުވެ ވަޒީފާ ހޯދުމުގެ ކަންތަކުގައި އެހީތެރިވެދޭން ވައުދުވި ރަހުމަތްތެރިޔާ؟"
"ރަހުމަތްތެރިޔާއޭ؟ ރައްޓެއްސެއްގެ ރައްޓެއްސެކޭ ކިޔާބަލަ!" އިސްހާގު ޒީލަގަދަ ރާގަކަށް ދަމައިލިއެވެ. "މި ރަށަށް ލެފީއްސުރެ އަހަރެން މި މަސައްކަތްކުރަނީ އޭނަޔާ ގުޅޭތޯނު؟ ކޮންމެ ފަހަރަކު ވެސް ލިބޭ ޖަވާބަކީ ކަލޭ ތިޔަ ގުޅަން އެދޭ މީހާގެ ފޯނު އޮތީ ނިވައިލައިފައޭ."
"ބޮޑުތިލަދުންމަތީ މީހުންކަން އެނގުނު ހިސާބުން އޭނާ ވެސް އަނެއްކާ އަހަރެމެންމަތިން ފޫހިވީތަ؟" އަމިއްލަ ބޮލުގައި މަލާމާތުގެ 'ގޯނި'އަޅުވަމުން އައްޔޫބު ހިނިގަނޑެއްޖަހައިލިއެވެ.
ޖަވާބުގައި އިސްހާގު އެއްކަލަ ފާޑަށް ދެ ކޮނޑު އަރުވައިލިއެވެ. އަދި ބަރު ހިތަކައިގެން ނަމަވެސް ރަހުމަތްތެރިޔާގެ ހިނިގަނޑުގައި ބައިވެރިވެލިއެވެ.
"ޒިންދަގީ" ބޯޓުން ވަޒީފާ ހޯދާން އައި ތިރީސް އެތައް ބަންގާޅުމީހުންނެއް، އެ މީހުންނާ ހަވާލުވީ ސާހިބުންނާ އެކު އެއްގަމަށް ދާން ހިނގައިގެންފިއެވެ. އައްޔޫބާއި އިސްހާގު ބާކީވެ، އިސްޖެހިފައި ތިބިތަން ފެނިގެން އެ ދެ ކުދިން ކައިރިޔަށް އައިސް ހުއްޓުނީ ހަރުވާޅު މައްޗަށް މުންޑުގަނޑު އަރުވާޖަހައިލައިފައި ހުރި، މެދުމިނު އިސްކޮޅެއްގެ ރާވެރިއެކެވެ. އެއީ އިސްހާގުމެން މި ރަށަށް ފޭބިއިރު ވެސް މިތާ، މި ހިޔާ ބޮޑު ނިކަގަހުގެ އަނެއް ފަރާތު ދޮންވެލިގަނޑުމަތީ ފައްތައިލައިގެން، ހޭވައްޓައިލައި އަތުގައި އޮތް ބަޅުވަޅިން އެތްއޮޅާން ބޭނުންވާނެ ފަތްކަހާން އިން ބޭބެއެވެ. މިހާރު ކެހި ފަތް، ބޮޅުބޮޅަށް އޮޅައި، މުއިރުން ބަނދެލައި، ދެ އަތުން ދެބައި ހިފައިގެން، ބަޅުވަޅި ފުށުނގަށް ޖަހައިގެން ހުރެ، ގެޔަށް ދާން ހިނގައިގެންފައި ވެސް ޚަބަރުބަލައިލާނަމޭ ހިތައި އިސްހާގުމެން ކައިރިއަށް އެ ބިއްކޮށްލީއެވެ. ކުރިމައްޗަށް ހުއްޓި އައްޔޫބާއި އިސްހާގުގެ މޫނަށް ބަލައިލައިފައި ނިކަން އޯގާވެރި، އުފާވެރި އަޑަކުން އެ މީހާ އަހައިލައިފިއެވެ.
"ދޮޅިން އަތް ނުނެއްޓި، މޮޅިން ތިޔަ ތިބެނީ ކަލޭމެން ކުދީންނަށް ވަޒީފާއެއް އެއްޗެއް ދޭނެ މީހަކު ހަމަ ނުވީމާތަ؟"
އައްޔޫބާއި އިސްހާގު އެކުއެކީ ކަހަލަ ގޮތަކަށް ބޯޖަހައިލިއެވެ.
ތިމާމެންގެ އަމިއްލަ ނަފުސަށް ޖޯކުޖަހަމުން އައްޔޫބު ބުނެލިއެވެ."ވަޒީފާއެއް އަދާކުރެވޭ ވަރުގެ ސިއްހަތެއް ހުރި ބައެއްކަމަށް ނުފެންނާތީތާ!"
މި ވާހަކައިން ރައިވެރިޔާ ގާތަށް ހިނި އަތުވެއްޖެއެވެ.
"ތިޔައީ އުމުރު މުސްކުޅީންނެއް ނޫނެއްނު! އިއްޔެ މެންދުރުގެކުދީންނު! ކަލޭމެން ކުދިންގެ ސިއްހަތެއް ވާ ދެރައެއް ނޫން! މަށަކީ މޮހޮންމަދު. އާންމު ނަމަކަށް ކިޔައިއުޅެނީ ރައިވެރި ތައިވަރު މޮހޮންމަދު! އެއް ބަޔަކު 'ރައިވެރި' ކަނޑައިލައިފައި ހަމައެކަނި 'ތައިވަރު' ލައިގެން ވެސް ނަންކިޔާ. އަނެއް ބަޔަކު 'ތައިވަރު' ކަނޑައިލައިފައި ހަމައެކަނި 'ރައިވެރި' ލައިގެން ވެސް ނަންކިޔާ!"
އައްޔޫބާއި އިސްހާގާ ދެ ކުދިން އެކަކު އަނެކަކަށް ބަލައިލައިފައި ހީނގަތެވެ. ރައިވެރި ތައިވަރު މޮހޮންމަދަކީ މަޖާ އަދި މީހުންނާ ގުޅޭ މިޒާޖެއްގެ މީހެއްކަމަށް ވިސްނުމަށް ފެންނާތީ އޭނަޔާ ގަޔާވެވުނުލެއް ހަމަ ބޮޑުކަމުންނެވެ.
"މި ރަށުގައި ދަންނަ ރައްޓެއްސެއް، ދާނޭ ގެއެއް ނެތިއްޔާ މަށާ އެކު އަހަރެމެން ގެޔަށް ހިނގާ. ކަނޑުފަރު ލައިގެން ކިޔައިފި ނަމަ ފާނައެއްގެ އަގު ވެސް ދުއިސައްތަ ރުފިޔާއަށް އަރައި، ފަގީރަކަށް ލޮނުކަމެއް ވެސް ލިބުން ދަތި މިކަހަލަ ތަދު ދުވަސްވަރެއްގައި ފަހަރުގައި މާރަނގަޅު އެއްޗެއް ގެއިން ކާން ނުލިބި ހިނގައިދާނެ." ދެން ހީނލައިފައި--"އެކަމަކުވެސް ބޯނެ ރުކުރާ އަދި އިރުންއިރަށް ކާން ގައިމުވެސް ދިވެހިހަކުރާއި ކާށި ލިބޭނެ. ދެ މީހުން މި ގޮތާ ރުހި ގަބޫލިއްޔާ މަށާ އެކު ހިނގާ!"
ދާނޭ އެހެން ވަކި ރަނގަޅު ދިމާއެއް ވެސް ފެނިފައި ނެތުމާ އެކު އިސްހާގާއި އައްޔޫބު ފޮށި ހިފައިގެން ރައިވެރި ތައިވަރު މޮހޮންމަދު ފަހަތުން ހިނގައިގެންފިއެވެ. މީހަކީ މޫނު އަލި، ގައިގެ މަސްތައް، ގައިގައި ހިފައިލައިފައި ހުރި ރަބަރެއްހައި ވެސް ހަރު، ރަތްދޮން ކުލަވަރު އަތްވަށް އަނދާ ގޮތް ވެފައި ހުރި މީހެކެވެ. ދެވަންފުރަޔަށް ދާ މީހެއް ނަމަވެސް، އެ ފުރައިގެ ގިނަ ރާވެރިން ފަދައިން އޭނަގެ ދިގުބަޔަށް ހުރި ފަތްބޯ ފަން އިސްތަށިގަނޑުގައި އަދި އެންމެ ނުރައެއް ވެސް ފެންނާކަށް ނެތެވެ. ކުރިމައްޗަށް ލެނބިލައި ހިނގައިލައިފައި އެހެރަ ދަނީ، ފައިވާނުގައި ތަތްވެފައި ހުރި ފަތެއް ހިފައިގެންދާހެން، ރަށް ވެސް ހިފައިގެން ދަނީއޭ ހީވާހައި ހަލުއި ބާރުހުރި ހިނގުމެކެވެ. ފަހުން އައްޔޫބުމެންނަށް އެނގުނު ގޮތުގައި އެއީ މޮހޮންމަދުގެ އާންމު ހިނގުމެވެ. ވިހި ތިރީސް ރުއްއަރާ މީހަކަށްވާތީ އޭނަޔަކީ ވަގުތު ބޭކާރު ގޮތުގައި ނަގައިލުމެއް ނެތް، ވަރަށް ވެސް ހީވާގި ހަރަކާތްތެރި މީހެކެވެ.
ރަށުގެ ހުޅަނގު އަވަށު ވަލުފަށުގައި، އެކަހެރި ގޮތެއްގައި ހުންނަ އެ ގެޔާ ހަމަޔަށް ފޯރިއިރު މާދުރު ނޫން ހިސާބެއްގައި ހުރި މިސްކިތެއްގެ ތާޅަފިލިން އަސުރުނަމާދަށް ބަންގިދޭ އަޑު، ވަޔާ އެކު ބާނިބާންޏަށް އައިސްއައިސް ހުއްޓެވެ. މޮހޮންމަދުމެން ގެއަކީ އިހުގެ ގިނަ ދިވެހި ގޭގެ ފަދައިން ތެޅިގަލުން ރާނައި، ފެންޑާއެއް ނެތި ހަމައެކަނި އެތެރެގެއަކާއި ބޭރުގެއެއްގެ މައްޗަށް އެކުލެވިގެންވާ ސާދާ ގެއެކެވެ. ގެޔާ އިންވެގެން ގޭގެ ފިޔަކަނަށް ދެކުނުފަރާތަށް އިތުރުކުރެވޭ ތިން ކޮޓަރީގެ ބައިގެ ފާރުގަނޑު ހުރީ މަތިހަމަކޮށް ރާނައި ނިމިފައެވެ. މި މަސައްކަތް މި ހިސާބަށް ހުއްޓިފައި ހުންނަތާ ދުވަސްގަނޑެއް ވެއްޖެކަމަށް ފާރުތަކުގެ ކުލަ ދަލީލުކޮށްދެއެވެ. ހަގީގަތުގައި ގެޔަށް އިތުރުކުރެވޭ މި އައު ބައި، މުސްކުޅި ގެއަށް ވުރެ ވެސް ބޮޑެވެ. މި ބަޔަށް ބަލަހައްޓައިގެން ތިބެފައި، އައު ހިތްވަރެއް ލިބިއްޖެ ކަހަލަ ގޮތަކަށް އައްޔޫބާއި އިސްހާގު އެނބުރި ގެއަށް ވަދެއްޖެއެވެ.
(ނުނިމޭ)
