(2 މާރިޗު 2026 ގައި ޝާއިއުކުރި ބަޔާ ގުޅޭ)
ގޭ ކުދިން ބަދިގެ ފަރާތުން އައިސް ދެކުނު ދޮރުން ފަހަރަކު ކުއްޖަކު ލޯބޮޑުކޮށް، ބޯދީ ބަލައިލައެވެ. މައުސޫމުކަމާއި ހައިރާންކަން އެކުވެފައިވާ ޅަނދޮޅު މޫނުތަކެކެވެ. އެއީ ހައްތާވެސް އަންހެންކުދީންނެވެ. ރާތާގާބަރި ހުރި ގޮތަށް އެކި ފުރައިގެ އެކި ކުދީންނެވެ. އެންމެ ފަހުން، ކިރުބޯ ޅަދަރި ކިހިލިޖަހައިގެން ގަޔަށް ދޫ ކަޅު ހެދުމަކާއި ރަތްބުރުގާއެއްގައި ހުރި ދެބައިއުމުރަށްދާ އަންހެނަކު އައިސް ގެޔަށް ވަދެއްޖެއެވެ. ގައި ކުލަވަރު މާ އޮމާން ނޫނަސް ކަޅެއްވާ ނޫނޭ ބުނެވޭހައި ވެސް އަލި އޮޅައްޔެވެ. ހައްޓަށް ބަލާއިރު ފަސްތަނުގައިބެހެއްޓިމުޅޯއްޓެއް ފަދަ އަންހެނެކެވެ. ފެނުމާ އެކު ވެސް މިއީ ރާވެރިބޭގެ އަންހެނުންކަން އައްޔޫބުމެން ދެނެގެންފިއެވެ. ހަމަ އެ ބީދައިން އެ އަންހެނާ ވެސް ފިރިމީހާ ގެއަށް ގެނެސްގެން މި އުޅެނީ ކޮން ބައެއްކަން ދެނެގެންފި ކަހަލައެވެ. ފުރަތަމަ ބަހަކަށް ވެސް އޭނަގެ ދުލުން ނިކުތީ "އައްލަ މަހުސަދީ. ދެންދޯ!" ރަށުގެ ދިގު ރާގުގަނޑުގައެވެ.
އެ އަންހެނާގެ ވާހަކައިގެ ރާގުންނާއި ކަޅިމަތި ހުރި ގޮތުން، ނުދަންނަ ދެ ބީރައްޓެއްސަކު ގެޔަށް ގެނެސްގެން ނުރުހުނީކަން އައްޔޫބުމެން ދެނެގެންފިއެވެ. އަންހެނުން ރުއްސަން މަސައްކަތްކުރާ ބީދަޔަކަށް ފިރިމީހާ ބުނެލިއެވެ.
"ފުޅާ، ބުނަންތަ؟ މި ރަށަށް ވަޒީފާ ހޯދަން އައި މި ދެ ކުދިންނާ ހަވާލުވާނެ މީހަކު ނުވެ އަތިރިމައްޗަށް ގިނަވެފައި ތިބިތަން ފެނިގެން ގެނެވުނީ. އެ ކުދިންނަށް އަލި މަގެއް ފެންނާންދެން ނުވަތަ އެނބުރި ރަށަށް ދެވެންދެން މި ގޭގައި ތިބެވިދާނެތާ! ދެރަނުވޭ ޝަރީފާ. އަހަރެމެން ދެމަފިރިންގެ މި ތިބީ ހައްތާ ވެސް އަންހެންދަރިން. ތިޔަ ތިބީ ބޮޑު ދެ ފިރިހެނުން. އެ މީހުންގެ ފުށުން އަހަރެމެން ކަހަލަ އެކަނިވެރި ބަޔަކަށް ފަސޭހައެއް ނޫނީ ނުފޯރާނެ. މި ގެއިން މާ މޮޅު އެއްޗެއް ކާން ނުލިބިދާނެކަމުގެ އިސާރާތެއް ވެސް ކުރީބައިގައި ކޮށްލިން!"
ކޮންމެވެސް ވަރަކަށް 'ލޮހޭގޮތްވެގެން' ޝަރީފާ ތަންކޮޅެއް މައިތިރި އަޑަކުން ފިރިމީހާ ކުރެން އަހައިލައިފިއެވެ."އެހެންވިއްޔާ ތިޔަ ދެ މީހުން ނިދާނީ ކޮންތާކު؟"
"އާނ. ނިދާނެ ތަނެއް ދޯ!" މޮހޮންމަދު ފުށްކިބަ ކަހައިލިއެވެ. ކުރިން ވިސްނައިފައި ނެތް ކަމެއް އޭނަގެ އަންހެނުން ހަނދާންކޮށްދިން ކަހަލައެވެ.
"މިގޭ ކުދިން ބޮޑުއަށީގައްޔާއި ދިމާއެނދުގައި ނިދަން އެ ތިބެނީ ދުމައްޓެއްގައި މަސްޖަހާހެން ވިއްޔަ. ދެން އެ ދެ މީހުން ކޮންތާކު ނިދާނީ؟"
އައްޔޫބާއި އިސްހާގާ ދިމާއަށް މޮހޮންމަދު ބަލައިލިއެވެ."ތިޔައީ ދެ ފިރިހެނުންނު! ކަލޭމެން ދެ ކުދިން މިރޭ ނިދަން ޖެހޭނީ ތަޅަންގަނޑުމަތީގައި ފަންގި ފަތުރައިގެން. މާދަމާ އެހެން ދެ ދިމާއަކުން ދެ ފަތްޖެހިއެނދު ލިބޭތޯ ބަލާނަން!" އެންމެ ރަނގަޅުތަ؟"
"އެންމެ ރަނގަޅުވާނެ މޮހޮންމަދުބޭ. ތަޅަންގަނޑުމަތީ ފަންގި ފަތުރައިގެން ނިދަން ޖެހުނަސް މިރޭ އެ ގޮތަށް ފުއްދައިލާނީ!" އައްޔޫބާއި އިސްހާގާ ދެ މީހުން އެއް އަޑަކުން ކަހަލަ ގޮތަކަށް ބުނެލިއެވެ.
"ކޮބައިތަ ކަލޭމެން ދެ ކުދިންގެ ނަމަކީ އަދި ރަށަކީ؟"ރާވެރިޔާ އަހައިލައިފިއެވެ.
"ސާބަސް. ސާބަސް ދޮންމޮހޮންމަދާ! ނޫނޭ، މަށަށް ލިބިފައި މިހިރީ ފިސާރި ފިރިއެއް! ގެޔަށް ގެނައުމުގެ ކުރިން އެ މީހުން ކުރެން ވަނަވަރު އަހާލާކަށް ވެސް ނޭނގުނުތަ؟" އެއް އަތް އުކުޅުގައި ވިދެލައިގެން ހުރެ ފިރިމީހާއާ ދިމާއަށް ލޯވަށްކޮށްލައިފައި ޝަރީފާ ބުރުއްސައިގަތެވެ.
"އެ ކުދިން މޮޅީން އިސްޖެހި ބިތްޖެހިފައި ތިބިތަން ފެނިފައި މަގޭ ހިތަށް ރަހުމުވަދެގެން ގެނެވުނީ. ދެން އަހަންވީ ކޮން ވަނަވަރަކާމަނަވަރެއްގެ ވާހަކައެއްތަ؟ ތިޔައީ ތާކު ތިބި ވިޔަޔާނުދާ ދެ ކުދިންނެކޭ މަގޭ ހިތެއް ނުބުނޭ. ކުދީންނޭ ކޮބައިތަ ކަލޭމެންގެ ނަމަކީ؟"
ދެ މީހުން ދެ ފަހަރު ދެ މީހުންގެ ފުރިހަމަ ނަމާ އެކު ކުރު ތައާރަފެއް ވެސް ދީފިއެވެ.އަދި ރިސޯޓުގައި އަދާކުރީ ރޫމްބޯއީންގެ ވަޒީފާކަމަށް ވެސް ބުނެދީފިއެވެ. ހަމަ އެ ނޭވާގައި މަތީ ވަޒީފާއެއްގެ އުންމީދުގައި، އިސްހާގު، ދުރުން ތާލީމު ދޭ މަރުކަޒަކުން އިތުރަށް ކިޔަވަމުންދާކަން ވެސް ހާމަކުރިއެވެ.
"ހަސަން އައްޔޫބާއި ހުސެން އިސްހާގު، އެހެންނު؟ ހަސަނާއި ހުސޭނު ވިއްޔާ ދެރައެއް ނުވާނެ. ވަރަށް ހިތްވަރު ވެސް ގަދަވާނެ!"މޮހޮންމަދު އޭނަގެ އެ ހުންނަ މަޖާ، ބަސްމޮށުންތެރި ގޮތުގައި ބުނެލިއެވެ. އެ ވާހަކައިންނާއި، ނަމެއް ކަމެއް އަހައިލުމެއްނެތި ދެ ބީރައްޓެއްސަކު ގެޔަށް ގެނައި ފިރިމީހާގެ ފުށުން ފެންނާން ހުރި ރަށްފުށުގެ މާސޫމު ގޮތްގަނޑުން ނޫންކަމެއް ވެސް ނޭނގެއެވެ. ޝަރީފާ ގާތަށް ވެސް ހިނި އައިސް، ދުފައި ރަތްކޮށްފައި ހުރި ދަތްގަނޑު މަޅައިލައިގެން ހުރި ގޮތަށް ހުއްޓި ހުރެއްޖެއެވެ. މި މަންޒަރު ފެނި، ދެ ބީރައްޓެހިންގެ ހިތަށް ވެސް ފިނިކަން ލިބި ރަށާއި ތަނަށް ދިރޭ ގޮތްވެއްޖެއެވެ.
އައްޔޫބާއި އިސްހާގު ގާތު މަޑުކޮށްލާށޭ ބުނެފައި މޮހޮންމަދު އެގޭ ބަދިގެދޮށުގައި ހުރި ކުރުފަންތީގެ ރާރުކަށް އަރައި ރާގުޑި ބާލައިގެން އައިސް އެހެން ގުޑިއަކަށް ރާފޮދު ދެބައިކޮށްލައި، ދެ މީހުންނަށް ދެ ގުޑި ދިއްކޮށްލަމުން ބުނެފިއެވެ.
"އަހަރެން މި ދަނީ ހަވީރު ރުކަށް، އިނގޭ!ކަލޭމެން ކުދިން ގިފިލިން ފެންވަރައިލައި މިސްކިތަށް އަރައިލައިފައި އައިސް ދަތުރު ވަރުބަލި ފިލުވައިލައިހަދަން ތިބޭ! ކަލޭމެން ދެ ކުދިންނަށް ވަޒީފާ ހަމަޖެހޭތޯ މި ރަށު ތުނޑީހިންނަ ލިޔުއްވައިގެން އުޅޭ އަބުދުބޭ ގާތަށް މާދަން ރޭ ކަލޭމެން ކުދިން ގޮވައިގެން ދާނަން. މި ރަށުގައި އެންމެ ގަދަޔަށް ދަނޑުވެރިކަންކުރާ މީހަކީ އަދި ގާތުގައި އެންމެ ގިނަ މީހުން ގެންގުޅޭ އެންމެ އަތްމަތި ތަނަވަސް، މުއްސަނދި މީހަކީ ވެސް އޭނާ. ކަލޭމެން ދަތުރުކުރި "ޒިންދަގީ" ނާލުބޯޓުގެ ވެރިޔަކީ ވެސް އޭނާ. މީގެ އިތުރަށް ސަތޭކަ ފޫޓުގެ ކަންނެލި ދޯންޏަކާއި ހަމަ އެހައިކަށްހައިވަރުގެ، ބަހުރުލޮނުން މަސް ފިނިކުރެވޭ ގޮތަށް މެސެނު ބަހައްޓައިފައި ހުރި، އެންމެ މި ޒަމާނުގެ ބޮޑު މަސްދޯންޏެއް ވެސް އޭނަގެ މިލްކުގައިވޭ. ދެން އަދި ކޮބާ؟ މި ރަށުގައި ހުރި އެންމެ ވިޔަފާރިވާ ބޮޑު ފިހާރައިގެ ވެރިޔަކީ ވެސް އޭނާ. އެހެންވީމާ ދަނޑަކުން ފަނގަކުން ނޫނަސް އޭނާ އެ ހިންގާ ތަފާތު ވިޔަފާރިތަކުގެ އޮފީހު ބައިން، ނޫން ނަމަ އޭނާ އަލަށް ބިނާކޮށް އާރާސްތުކޮށް، ހުޅުވަން ތައްޔާރުވެފައިވާ ތިރީސް ކޮޓަރީގެ ގެސްޓުހައުސުން ވެސް ތިޔަ ކަހަލަ ދެ ޒުވާނަކަށް އޭނާއަށް ވަޒީފާ ހަމަޖައްސައިދެވިދާނެހެން ހީވަނީ. އޭނާ މި ވަގުތު ހުރީ ދަތުރުވަރިއެއްގައި މާލޭގައި. މާދަމާ ހަވީރުގެ ފެރީން ރަށަށް އަންނަ ވާހަކައެއް އެހިން!"
ދެން ދެކުނުދޮރުން ބޯދީގެން ހުރި އޭނަގެ ދޮށީ ދަރިފުޅަށް ބަލައިލައިފައި--"ދަރިފުޅާ އަމީލާ. މި ބޭބެމެންނަށް އޮއްޓަރުކުރެއްވި ކާއެއްޗެއް ތައްޔާރުކޮށްދޭން އުޅެބަލަގަ. ކަނޑު މަޑު ނޫން ދުވަހެއްގެ ދަތުރަށް ފަހު، ރަނގަޅަށްވިއްޔާ މިހާރު ތިބޭނީ ހައިވެ ހާންތިވެފައި."
މިފަހަރު އަމީލާ ސީދާ އިސްހާގަށާއި އައްޔޫބަށް ނިކަން ވިސްނުންތެރި ގޮތަކަށް ބަލައިލައިފައި ހިތްހެޔޮ، އޯގާވެރި ރާގަކަށް އަހައިލައިފިއެވެ. "މާފުށް މޮޑެދެންތަ؟ ނޫނީ ދެލޮނުކެޔޮ.."
"ކަނބުލޯއަށް ފަސޭހައިން ހަދައިދެވޭނެ އެއްޗެއް ހަދައިދީ!" އެ ލަޠީފީ މޫނަށް ކަޅިޖަހައިނުލައި ބަލަހައްޓައިގެން ހުރެ އިސްހާގު ބުނެލިއެވެ. އެ ކަޅި އިތިކޮށްލާނެ ހޭވަރިކަމެއްވީ ކައިރީގައި ހުރި އައްޔޫބު އުޅަނބޮށިން އަރިކަށީގައި ކޮއްޓައިލުމުންނެވެ.
އަމީލާ ބަދިގެއާ ދިމާއަށް ބެހެއްޓުމުން އައްޔޫބާއި އިސްހާގު "ދޮންމޮހޮންމަދުބެއަށް" ފަށްފަށުން ޝުކުރު އަދާކުރިއެވެ. މިފަދަ ދުވަހެއްގައި، މި ރަށުން މިކަހަލަ މީހުންގެ މައްޗަށް އަގަލު ހުރި، ހެޔޮލަފާ މީހަކާ ޖެހުނީތީ ހިތާހިތުން އުފާކުރަމުންނެވެ.
ހުސް ހަރުވާޅަށް ހަދައިލައިގެން އެތެރެގެތެރެއިން ނިކުތް މޮހޮންމަދު ފަހަތުން އޭނާ އަންހެނުން ވެސް ގެއިން ނިކުމެގެން ދިޔުމުން، އިސްހާގަށް އިންޒާރުގެ ތޫނު ނަޒަރެއް ދީ، ކަންފަތްދޮށަށް ގުދުވެލަމުން އައްޔޫބު ބުނެފިއެވެ.
"އޭ އިސްހާގާ ބުނަންތަ ވާހަކައެއް. މި ގޭގަ އެ ތިބީ ހުސް އަންހެންކުދިން. ބައެއް ކުދިން އެ ތިބީ ބޮޑުވެ ސާދަފަނަރަ ފުރަޔަށް އަރައި ހާކާވެފައި. އަނެއްކާ މިތާ މަލަކަށް ދޫކުރާނެ މަލެއް ނެތޭ ބުންޏަސް ހެޔޮވެދާނެ! މި ގޭގައި އުޅޭއުޅުމުގައި ނަމަނަމަ އެއިން ކުއްޖެއް ގައިގައި ނުރުހުމުގައި ފުށް އިނގިލިކުރި ވެސް ޖައްސައިނުލައި އުޅެވޭތޯ ބަލާތި، އިނގޭ! މަށަށް ހީވާ ގޮތުން ވިއްޔާ އެ ކުދިންގެ މަންމަ، ގޮތް ނޭނގޭ ބީރައްޓެހި ދެ ފިރިހެނުން ގެޔަށް ގެނެސްގެން ފުރަތަމަ އެހައި ނުރުހިގެން އެ އުޅުނީ ވެސް މި ބުނި ރޮނގުން ވިސްނައިފައި. މި ޒާތު ކަންކަމުގައި ފިރިހެނުންނަށް ވުރެ މާ ދުރަށް އަންހެނުން ވިސްނުން ފޯރުވާނެ!"
"ހާސް ނުވޭ ޔާރު!" ފިލްމީ ރާގެއްގައި އިސްހާގު ފޮޅުވައިލިއެވެ. "ކަލެއެކޭ އެއްފަދައިން ނުވަތަ ކަލެޔަށް ވުރެ ވެސް ބޮޑަށް މަ ތިޔަ ކަމާ ވިސްނަމުން ގެންދާނަން. އެކަމަކު ބުނަންތަ މި ރަށުން ދިޔުމުގެ ކުރިން މި އަމީލާއާ މަށަށް ހިތާވެވޭނެހެން ހީވަނީ!"
"ތިޔައިގައި ގޯހެއް ނެތް." އައްޔޫބު ހީނގެންފައި ވައިއަޑަކުން ބުނެލިއެވެ." މިހާރު ވެސް ތިހިރީ ހަމަ ރަނގަޅަށް ހިތާވެވިފައި. ހުއްސަރިބައި ދުވަސް ނަމަ، މަ ވެސް މި ތަނުން މަލެއް ބިނދެވޭތޯ ބެލީމުސް!"
"އަހަރެންގެ ވާންހުރި މައިދައިތަގެ ދުލުން މިއަދު އެ ބޭރުކޮށްލި 'އައްލަ މަހުސަދީ'ގެ މާނަޔަކީ ކޮބައިތަ؟"
"ކިހިނެއް އެނގޭނީ؟ މި ރަށު މީހުން ކަންތައް އިންތިހާއަށް ބޮޑުވީމާ ބުނާ ބަހެއްކަމަށް ވެދާނެ. ކަލޭ ހިތް އެދޭ މިސްރާބަށް ދަތުރުކޮށް، އަމީލާގެ އަނގައިން ރަންރުހޭބަސް އަތުލައި، ކައިވެންޏަށް ވަލީ ހޯދާން ފޮނުވުމުން އަނެއްކާ މައިދައިތަ 'އައްލަ މަހުސަދީ'އަށް ނާރައިފިއްޔާ ނަސީބު---"
"ބޮހާއި ބައްދަލުކުރަން އަންނަންވީ!" އައްޔޫބު ޚިޔާލުތަކުގެ ދުނިޔެއިން ހޭލައްވައިލީ އެއްކަލަ ބަންގާޅުކަލޭގެ އަމުރުވެރި އަޑެވެ. އެ އަޑަށް މޮހޮންމަދުބެއާ އިސްހާގާ އެކު އައްޔޫބު ވެސް އިންތަނުން ހިއްލައިލައިގެން އެ ބަންގާޅު މީހާ ފަހަތުން ހިނގައިގެންފިއެވެ. ގެއިން ނިކުމެގެން ގޭގެ ހުޅަނގުކޮޅުގައި އޮތް ގޯޅިއަކުން ދިމާ ދެކުނަށެވެ. އެއީ އަށްކަން އެޅިގައު ޖެހި ފުޅާ ގޯޅިއެކެވެ. އިންފާރު ކައިރީ އިސްކޮޅު ސައިޒުގެ ދޮންފަތް ނުވަތަ ރިހާކުރު ނޫނީ ރަތްބަގީޗާ ގަސްތައް ހައްދައި، އަނެއް ފަރާތުގައި ބޮޑު ސައިޒުގެ ގަސްމުށިތައް ޖަހައިފައިވެއެވެ. މިއީ ވިލާބޯ އުޑުމަތިން ތަރިއެއްގެ ލިސާން ވެސް ފާއްދައިލައިފައި ނެތް ކަޅުފޮއިގެ ރެއެކެވެ. ނަމަވެސް، ކުރުދަނޑީގައިލައި ތަރުތީބުން ދެ ފަރާތުގައި ޖަހައިފައިވާ ބޯޅަތަކެއްގެ ހަނދުވަރީ އަލި، ކޮންމެވެސް ވަރެއްގެ ދަހިވެތިކަމަކާ އެކު، ހިޔަނިތައް ހޫރި ރޮއި ހޭރެމުންދާ ގޯޅިން އަނދިރިކަން ފޮހެލަދީފައިވެއެވެ.
ގޯޅިން ގޮސް ނިކުމެވުނީ ގަސްރުއް ގިނަ ގޭގެ ވަލު ފަރާތަށެވެ. ފަސްހަހާސް އަކަފޫޓުގެ މި ބޮޑު ގޯތީގެ ބޮޑުބައި ވެސް އޮތީ މި ފަރާތަށެވެ. ރޭނި ގެޔާއި ވަކިން، ރީތިކޮށް ފަށުވިކޮށް ދަނޑިފަނުން އަޅައިފައިވާ މަރިޔާދުގެއެއް އެބަ ހުއްޓެވެ. މިއީ ތާޒާ ވައި ލިބޭ ގޮތަށް ދެ ފަރާތު ބިތުން ދެ ފޫޓެއްހައި އުސްމިނަށް، އަށެއްކަ ފޫޓެއްހައި ދިގުމިނަށް ކަނޑައިލައި، ބިންމަތީ ސާފު ކަށިވެލިލައިފައިވާ ދިވެހިވަންތަ މަރިޔާދުގެއެކެވެ. ކޮންމެ ފަރާތެއްގައި ވެސް މެހުމާނުން ތިބޭން ހަތަރު ފައިޖެހި، ގަސްވަކަރުގެ ތިރި ދިގު ގޮނޑިއެއް ހުއްޓެވެ. ގެޔާއި ގޮނޑީގެ އިތުރަށް ވޮށްބައިނުގައި ލައި، ތަނަށް ލޮލަށް ފަސޭހަ އަލިކަމެއް ފޯރުވައިދީފައިވާ ފާނޫޒު ވެސް މިހާރު މާޒީއާ އެކުވެ ގޮސް، ލޯމަތިން އޮބައިލައިފައިވާ ދިވެހިވަންތަ އަސަރެއް، ހިތަށް ތަދުކުރާ ފަދަ ހިތި ހިތާމަވެރި ގޮތަކަށް، ހިތުގައި ދިރުވައިދެއެވެ. މި ކުޑަ ގޭގެ ހެއްލިހެއްލި ހުރި ބޮޑު އުނދޯލީގައި، ފަންސާސްފުރައިގެ ބޮޑުވައްތަރު ޖަހާ މީހަކު، ފައިދޮށާ ކައިރި ހިސާބެއްގައި އެނބުރޭ މަސްމަހަށް މާކަނާ ބަލަހައްޓައިގެން އިންނަ ކަހަލަ ގޮތަކަށް، އިތިކޮށްލައިގެން އެބަ އިނެވެ. މީހަކީ މި ރަށު ރަތްލާޖެހި އަބުދުބެއެވެ. އޭނަގެ ގެޔަކީ ދެ ފަރާތަށް ފެންޑާލައި، ތަޅުމުގައި މޮޅު ތަށިމުށިޖަހައިހަދައި، ފައްކާކުރެވިފައިވާ ކިތަންމެ ޒަމާނީ ރީތި ގެއެއް ނަމަވެސް އޭނާ އާންމު ގޮތެއްގައި އިންނަނީ އަދި މީހުންނާ ބައްދަލުކޮށްހަދަނީ ވެސް މި މަރިޔާދުގެއިންކަމަށް ވަރަށް ބޮޑަށް ބުރަވެވެއެވެ. އޭނާގެ އެ ބޮޑު ޖާނުގެ ކަޅުކަމާއި ފޭރާމުގެ ސާފު ހުދުކަން ފުރިހަމަޔަށް ތަސައްވަރުކުރެވުމުން އިސްހާގު ހަނދާންވީ ހުދާއި ކަޅުގެ ޒަމާނުގެ ކޮންމެވެސް ތަމަޅަ ފިލްމަކުން އޭނާ ދެކެފައިވާ ދަނޑުބިންވެރިއެއްގެ މަތިންނެވެ. އެހިނދު އަބުދުބެއަށް ނަޒަރެއްދީ، މޮހޮންމަދުބޭގެ ކަންފަތްދޮށަށް ގުދުވެލަމުން، ޖެހިލުންވުމުގެ ރާގަކަށް، އަހައިލެވުނެވެ.
"އެއީ އަނެއްކާ ދިވެއްސެއްތަ؟"
"ތިޔަހެން ތިޔަ އަހަނީ އޭނާ ހޮޅިސާޑިއެއް އަނދެ، ކަރުގޮށްއެޅި ކުޑަގިރުވާނުލީ ހުދު ގަމީހެއްލައި، ބައެއް އިންޑިއާމީހުން ފަދައިން ކޮނޑަށް އަތްދުއްލިފޮށައެއް އެއްލައިގެން އިނީމާތަ؟ބަލަ އެއީ ކަލެއެކޭ މަށެކޭ ވެސް އެއްފަދައިން ހަތަރުމަތިފުށް މައް ދިވެއްސެކޭ، ކޮއިފުޅާ!"
އަބުދުބޭއަށް އައްޔޫބާއި އިސްހާގު ތައާރަފުކޮށްދީފައި އޭނާ ކައިރިއަށް އަންނަން ޖެހުނު ބޭނުން ރާވެރިޔާ ކިޔައިދިނުމުން، ދެ ޒުވާނުންނަށް ބަލަހައްޓައިގެން އިރުކޮޅަކު އިނދެފައި، ގާޒީއަކު ޝަރުއީ މައްސަލައެއްގެ ނިޔާ އިއްވާ ކަހަލަ ގޮތަކަށް، ލިޔެފައި އޮތް އެއްޗަކުން ބަލައިގެން ކިޔާ ކަހަލަ ރާގަކަށް، އަބުދުބޭ އަމުނައިގަތެވެ.
"ތިޔައީ ދެ ދިވެހިންތާއެވެ. ކުޑަ މުސާރަޔަކަށް އެ މީހުން މަސައްކަތެއް ނުކުރާނެއެވެ. އަނެއްކާ ދެރަ އެއްޗެއް ނު ކެވޭނެއެވެ. ނުވެސް ބޮވޭނެއެވެ. ނުވެސް ލެވޭނެއެވެ. ބަންކު ބެޑު ޖަހައިފައި ހުރި ކުޑަގޮޅިއެއް ކަހަލަ ތަންކޮޅެއްގައި، ދެ މީހުން ކީއްކުރަން، އެކަނި ނަމަވެސް އުޅޭކަށް ނުރުހެވޭނެއެވެ. ކޮންމެ މީހަކަށް ވަކި ކޮޓަރިއެއް އަދި ވަކި ފާޚާނާއެއް ހުންނަން ޖެހޭނެއެވެ. ހަސް ނެތަސް ހިތް އޮންނާނީ ސިދުރަތުލް މުންތަހާގައެވެ. އެހެންވެ އަހަރެން މިހާރު މި ގެންގުޅެނީ ފިހާރައިގައި ތައިލެންޑު، ފިލިޕިންސްކުދީންނެވެ. ދަނޑުފަނގުގައި ބަންގާޅީންނެވެ. އޮފީހުގައި ލަންކާމީހުންނެވެ. ޖުމުލަކޮށް ބުނާ ނަމަ މުޅިން ވެސް ބޭރުމީހުންނެވެ. ދިވެހީންނަށް ސަލާމެވެ. މަވާ ސަލާމެވެ. މުޅި އުމުރަށް ސަލާމެވެ!"
(ނިމުނީ)
