ސައޫދީ އަރަބިއްޔާއާއި އީރާނާ ދެމެދު ޑިޕްލޮމެޓިކް ގުޅުން އަލުން ގާއިމުކުރުމަށްފަހު، ސައޫދީ އަރަބިއްޔާގައި ހުޅުވާ އީރާނު އެންބަސީ މި ހަފުތާ ތެރޭގައި ހުޅުވާނެކަން އީރާނުގެ ޚާރިޖީ ވުޒާރާއިން ހާމަކޮށްފިއެވެ.
ސައޫދީ އަރަބިއްޔާގެ ޑިޕްލޮމެޓިކް އޮފިޝަލަކާ ހަވާލާދީ އިއްޔެ އާއްމުވީ ޚަބަރެއްގެ ތެދުކަން ޔަގީންކޮށްދެއްވަމުން އީރާނުގެ ޚާރިޖީ ވުޒާރާގެ ތަރުޖަމާނު ނާސިރު ކަނާނީ ވިދާޅުވީ މި ހަފުތާ ތެރޭގައި އެންބަސީ ހުޅުވާނެކަމުގައެވެ.
"(ގުޅުން އަލުން ގާއިމުކުރުމާ ބެހޭގޮތުން ދަގައުމުން ސޮއިކޮށްފައިވާ) އެއްބަސްވުން ތަންފީޒުކުރުމުގެ ގޮތުން ރިޔާޟުގައި ހުންނަ އީރާނު އެންބަސީއާއި، ޖިއްދާގައި ހުންނަ އަހަރުމެންގެ ކޮންސިއުލޭޓާއި، އޮގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) އަށް ކަނޑައަޅާފައި ހުންނަ އަހަރުމެންގެ އޮފީސް އަންގާރަ ދުވަހާއި، ބުދަ ދުވަހު ހުޅުވާނެ." އޭނާ ވިދާޅުވިއެވެ.
އަލަށް ހުޅުވާ އީރާނު އެންބަސީގެ އެންމެ ޑިޕްލޮމޭޓަކަށް ހުންނަވާނީ އީރާނުން ސައޫދީ އަރަބިއްޔާއަށް ކަނޑައެޅި އާ ސަފީރު ޢަލީ ރިޒާ އިނާޔަތީއެވެ. އޭނާއަކީ ކުރިން އީރާނުން ކުވޭތަށް ކަނޑައަޅާފައި ހުންނެވި ސަފީރެވެ.
އިނާޔަތީ ސައޫދީ އަރަބިއްޔާގައި ހުންނަވާ އީރާނުގެ ސަފީގެ މަގާމަށް ހަމަޖެއްސިކަން އީރާނުގެ ނޫސްތަކުން ވަނީ ފާއިތުވި ހަފުތާގައި ހާމަކޮށްފައެވެ. އިނާޔަތީ ވަނީ މީގެ އީރާނުގެ ޚާރިޖީ ވަޒީރުގެ އެހީތެރިޔާގެ މަގާމާއި، ޑިރެކްޓަރ ޖެނެރަލް އޮފް ގަލްފް އެފެއާޒްގެ މަގާމުވެސް ފުރުއްވާފައެވެ.
އެންބަސީ ހުޅުވައި، އަހަރުތަކަކަށް ދެމިގެން ދިޔަ ދެގައުމުގެ ހަތުރުވެރިކަން ނިމުމަކަށް ގެންނަން ދެގައުމުން ނިންމީ ޗައިނާގެ މަސައްކަތުން އެކުލަވާލި އެއްބަސްވުމެއްގައި ސޮއިކުރުމަށް ފަހުއެވެ. މި ރަސްމިއްޔާތު އޮތީ ފާއިތުވި މާރިޗު މަހު ޗައިނާގެ ވެރިރަށް ބޭޖިންގގައެވެ.
Mi habaruge follow-up kobaaabaaa
Thibuni thaneh hulhuvai hidhumaiy dheynves fashaifi. Ekamaaa gulhigen aaabvaaahakaeh oitho balanvegen noos mihulhuvaaaleee. Ekamaku follow up netheemaaaa dhen ehen nooohakah mijehily