(20 އޭޕްރީލް 2023 ގައި ޝާއިއުކުރި ބަޔާ ގުޅޭ)
ސަލާމްލެއްވި ހޫދުގެފާނާއި އެކަލޭގެފާނުގެ ޤައުމުގެ މީސްތަކުންނާ ބެހޭގޮތުން ، ކީރިތި ޤުރުއާނުގެ މޫރިތި ސޫރަތްތަކުގެ ވަރަށްގިނަ އާޔަތްތައް ބާވާލައްވައި ، މީސްތަކުންނަށް ފިލާވަޅެއްގެ ގޮތުގައި ބަޔާންކުރައްވާފައި ވެއެވެ.
އަލްމުއުމިނޫން ސޫރަތުގެ 32 ވަނަ އާޔަތުން ފެށިގެން 38 ވަނައާޔަތުގެ ނިޔަލަށް ބަޔާން ކުރައްވާފައި ވެއެވެ.
" ފަހެ ، ތިމަންރަސްކަލާނގެ އެއުރެންގެ ގާތަށް ، އެއުރެންގެ ތެރެއިން ރަސޫލަކު ފޮނުއްވީމެވެ. ތިޔަބައިމީހުން ﷲ އަށް އަޅުކަންކުރާށޭ އަންގަވަމުންނެވެ. އެކަލާނގެ ފިޔަވައި އެހެން އިލާހަކު ތިޔަބައިމީހުންނަކަށް ނުވެއެވެ. ފަހެ ، ތިޔަބައިމީހުން ، (އެކަލާނގެޔަށް) ތަޤުވާވެރި ނުވަނީ ހެއްޔެވެ ؟ (32) އެކަލޭގެފާނުގެ ޤައުމުގެ މީހުންގެ ތެރެއިން ކާފަރުވެ ، އަދި އާޚިރަތާ ބައްދަލުވާނޭކަން ދޮގުކޮށްއުޅުނު ، އަދި ، ދުނިޔޭގެ ޙަޔާތުގައި ތަނަވަސްކަމާއި ނިޢުމަތް ، އެއުރެންނަށް ދެއްވި ބޮޑުންގެ މީހުން ބުނޫއެވެ. ތިޔަބައިމީހުންކަހަލަ އާދަމުގެ ދަރިޔަކު ކަމުގައި މެނުވީ ، މީނާ ނުވެއެވެ. ތިޔަބައިމީހުން އެއެއްޗަކުން ، ކައިއުޅޭތަކެތިން އޭނާވެސް ކައި އުޅެތެވެ. އަދި ، ތިޔަބައިމީހުން އެއެއްޗަކުން ބޮއިއުޅޭ ތަކެތިން އޭނާވެސް ބޮއެ އުޅެތެވެ. (33) އަދި ، ހަމަކަށަވަރުން ، ތިޔަބައިމީހުން ކަހަލަ އާދަމުގެ ދަރިޔަކަށް ތިޔަބައިމީހުން ކިޔަމަންތެރިވެއްޖެނަމަ ، އެހިނދު ހަމަކަށަވަރުން ، ތިޔަބައިމީހުންނީ ގެއްލެނިވެގެންވާ ބަޔެއްކަން ކަށަވަރެވެ. (34) ހަމަކަށަވަރުން ، ތިޔަބައިމީހުން މަރުވެއްޖެހިނދު ، އަދި ވެއްޔާއި ކަށްޓަށް ތިޔަބައިމީހުން ވެއްޖެހިނދު ، އަލުން ދިރުއްވައި ނެރުއްވާނޭކަމަށް އޭނާ ތިޔަބައިމީހުންނަށް ވަޢުދުކުރަނީ ހެއްޔެވެ ؟ (35) ތިޔަބައިމީހުންނަށް ވަޢުދުކުރައްވާ ކަންތައް ، ދުރުވެގެން ވެއެވެ. ( ވަރަށް ) ދުރުވެގެން ވެއެވެ. (36) އެ ދިރިއުޅުމަކީ ، ތިމަންމެންގެ ދުނިޔޭގެ ދިރިއުޅުން ފިޔަވައި އެހެން އެއްޗެއްނޫނެވެ. ތިމަންމެން މަރުވަމުއެވެ. އަދި ދިރިއުޅެމުއެވެ. އަދި އަލުން ދިރުއްވައި ފޮނުއްވާނޭ ބަޔަކުކަމުގައި ތިމަންމެން ނުވަމުއެވެ. (37) ﷲ އާމެދު ހަދައިގެން ދޮގެއްބުނި ފިރިހެނަކު ކަމުގައިނޫނީ ، އޭނާ ނުވެތެވެ. އަދި އޭނާއަށް އީމާންވާ ބަޔަކު ކަމުގައި ތިމަންމެން ނުވަމުއެވެ. (38)
އަލްއަޙްޤާފު ސޫރަތުގެ 24 އަދި 25 ވަނަ އާޔަތުގެ މާނައިގާ ވެއެވެ.
" ފަހެ ، އެއުރެންގެ ވާދީތަކާ ދިމާއަށް ކުރިމަތިލައި ، އުދަރެހަށް ހުރަސްވީ ވިލާގަނޑެއްގެ ސިފައިގާ އެއުރެންނަށް އެ (ޢަޒާބު) ފެނުނުހިނދު އެއުރެން ބުނޫއެވެ. މިއީ ތިމަންމެންނަށް ވާރޭ ވެއްސައިދޭނެ ވިލާގަނޑެކެވެ. ( އެންގެވިއެވެ ) އަދި ކިއެއްތަ ! އެއީ އަވަސްވުމަށް ތިޔަބައިމީހުން އެދިގެން އުޅުނު ކަންތަކެވެ. ވޭންދެނިވި ޢަޒާބު އޭގައި ހިމެނިގެންވާ ގަދަ ވަޔެކެވެ. (24) އެ ވައި އޭގެ ވެރިރަސްކަލާނގެ އަމުރުފުޅަށް ، ކޮންމެ އެއްޗެއް ނެތިކޮށް ހަލާޚުކޮށްލަތެވެ. ފަހެ ، އެއުރެން އުޅުނު ތަންތަން މެނުވީ ފެންނާންނެތްބަޔަކު ކަމުގައި އެއުރެން ވެއްޖައޫއެވެ. ކުށްވެރިވިމީހުންނަށް ތިމަންރަސްކަލާނގެ ޖަޒާދެއްވަނީ އެފަދައިންނެވެ.
ހޫދުގެފާނުގެ ޤައުމުގެ މީހުން ނެތިފަނާކުރެއްވުން ބަޔާންކުރައްވާ ، ކީރިތި ޤުރުއާނުގެ އަލްޙާއްޤަ ސޫރަރުގެ 6 އަދި 7 ވަނަ އާޔަތުގައި ﷲ ތަޢާލާ ވަޙީކުރައްވާފައިވާ ބަސްފުޅުގެ މާނައިގާ ވެއެވެ.
" އެއީ ، ޢާދުބާގައިގެ މީހުން ދަންނާށެވެ ! ފަހެ ، ގަދަފަދަ ފިނިވަޔަކުން އެއުރެން ހަލާޚު ކުރެއްވިއެވެ. (6) އެކަލާނގެ ، އެއުރެންގެ މައްޗަށް 7 ރެޔާއި އަށްދުވާ ވަންދެން ވިދިވިދިގެން އެވައި ފޮނުއްވިއެވެ. ފަހެ ، އެޤައުމުގެ މީހުން ހޭނެތިގެން ވެއްޓިފައިވާތީ ތިބާ ދެކޭނޫއެވެ. އެއުރެންނެކޭ ، ހޮއިހެދިފައިވާ ކަދުރު ރުކުގެ ބުޑުތަކެކޭ އެއްފަދައެވެ. " (7)
ހޫދުގެފާނުގެ ޤައުމުގެ މީހުންކުރެ ، އެކަލޭގެފާނަށް ނުކިޔަމަންތެރިވި އެންމެން ނެތި ފަނާވެއްޖައުމަށްދާނދެން ، އެޤައުމަށް ކުރިމަތިވި ތޫފާން މެދުނުކެނޑި ކުރިޔަށް ދިޔައެވެ. ވައިގެ ތޫފާނުގައި އެބައިމީހުންގެ ހަށިތަކުގެ މައްޗަށް ފަސްއެޅި ، ފޮރުވެއްޖައުމަށް ދާނދެނެވެ. ހޫދުގެފާނަށް ތަބާވީ އެންމެހައި މީސްތަކުންނަށް ، ﷲ ސަލާމަތްކަން ދެއްވިއެވެ. ސަލާމަތްވީ މީސްތަކުންނައިގެން ، ހޫދުގެފާނު ، ޙަޟުރަމަވްތަށް ހިޖުރަކުރެއްވިއެވެ. އަދި އެސަހަރުގައި އެކަލޭގެފާނަށް ތަބާވީ މީސްތަކުންނާއކު ، ﷲ އަށް އަޅުކަން ކުރެއްވުމުގައި ، ރައްކާތެރިކަމާއެކު ، ދިރިއުޅުއްވަމުން ގެންދެވިއެވެ.
(ނިމުނީ)
