(26 މާޗް 2023 ގައި ޝާއިއުކުރި ބަޔާ ގުޅޭ)
" އަދި ، ( އެއުރެންކުރި ހުރިހައިކަމެއް ) ދެނެވޮޑިގެންވާ ޙާލުގައި ، ހަމަކަށަވަރުން ، ތިމަންރަސްކަލާނގެ އެއުރެންނަށް ކިޔައި ދެއްވާހުށީމެވެ. އަދި ، ( މިކަމުގައި ) ތިމަން ރަސްކަލާނގެ ދުރުވެ ވޮޑިގެނެއް ނުވަމެވެ. "
އިންސާނުންނަކީ ، ކުށްކުރުމުގައި އަދި ނޭދެވޭ ކަންތައްތައް ކުރުމުގައި ދެމިތިބޭ ބަޔެކެވެ. އަދި އެކަންކަން އެގޮތަށް ކުރުމުން ، އިންސާނުން އެބައިމީހުންގެ އަމިއްލަ ނަފުސަށް އަނިޔާ ދިނުމުގައި ދެމިތިބެއެވެ. އެހެންނަމަވެސް ، އިންސާނުން އެބައިމީހުންގެ އަމިއްލަ ނަފުސަށްދޭ އަނިޔާއިން ، ކީރިތި ﷲ އަށް ލިބިވޮޑިގެންވާނެ އެއްވެސް ގެއްލުމެއް ، އުނިކަމެއް ނުވެއެވެ. ﷲ ގެ ރަޙުމަތްފުޅު ، އިންސާނާގެ މައްޗަށް ނުވާނަމަ ، އެބައިމީހުންވާހުށީ ގެއްލެނިވެގެންވާ މީހުންގެ ތެރެއިންނެވެ. އެހެންކަމުން ، އިންސާނުން ﷲ އަށް ބޭނުންވެއެވެ. ކީރިތި ޤުރުއާނުގެ އަލްއަޢުރާފު ސޫރަތުގެ 24 އަދި 25 ވަނަ އާޔަތުގައި ، ﷲ ވަޙީކުރައްވާފައި ވެއެވެ.
އެކަލާނގެ ވަޙީކުރެއްވިއެވެ. ތިޔަބައިމީހުންގެ އެއްބަޔަކު އަނެއްބަޔަކާ ޢަދާވާތްތެރިންކަމުގައިވާ ޙާލު ، ތިޔަބައިމީހުން (ބިމަށް) ފައިބާށެވެ ! އަދި ބިމުގައި ތިޔަބައިމީހުންނަށްޓަކައި ، ޤަރާރުވެ ތިބެނިވި ތަނަކާއި ، ހިނދުކޮޅަކަށް ދުނިޔޭގެ ވަގުތީ އުފަލެއް ވެއެވެ. އެކަލާނގެ ވަޙީކުރެއްވިއެވެ. ތިޔަބައިމީހުން ދިރިއުޅޭހުށީ ، އެތާނގައެވެ. އަދި ، މަރުވާހުށީވެސް އެތާނގައެވެ. އަދި ( ޤިޔާމަތްދުވަހުން ދިރުއްވައި ) ނެރުއްވާހުށީވެސް އެތަނުގައެވެ.
ސަލާމްލެއްވި އާދަމުގެފާނުގެ ދެކަނބަލުން ، ސުވަރުގެއިން ނުކުމެވަޑައިގެން ، ބިމަށް ފައިބައިވަޑައިގެން ، ދިރިއުޅުއްވަން ފެއްޓެވިއެވެ. އެއީ ، ފަހަރެއްގައިވެސް އެއީ އެބޭފުޅުންގެ ދަރަޖަ ދަށްވެގެންދިޔަ ޙާލަތެއްނޫނެވެ. އެއީ އެބޭފުޅުންނަށް ލިބިވަޑައިގެންނެވި ފަޚުރަކާއި ޝަރަފެކެވެ.
ﷲ ވަޙީކުރެއްވި ހިނދެވެ. " ތިޔަބައިމީހުން އެންމެން ( ބިމަށް ) ފައިބާށެވެ ! " ﷲ ގެ މިބަސްފުޅު ، އަމާޒުވަނީ ހަމައެކަނި އާދަމުގެފާނާއި ޙައްވާގެފާނަށް އެކަންޏެއްނޫނެވެ. މިބަސްފުޅު އަމާޒުވަނީ ، ސަލާމްލެއްވި އާދަމުގެފާނާއި އެކަލޭގެފާނުންގެ އަނބިކަނބަލުން ޙައްވާގެފާނާ އަދި އެދެބޭފުޅުންގެ ދަރިފަސްކޮޅަށެވެ. މުޅި އިންސާނިއްޔަތަށެވެ. އަޅުގަނޑުމެން ، އާދަމުގެފާނުގެ ދަރިފަސްކޮޅު ނުވަތަ އިންސާނުންނަކީ ، މިބިމަށް ޚާއްޞަވެ ބިމަށް ނިސްބަތްވާ ބައެއްނޫނެވެ. އިންސާނުންނަނީ ، މިބިންމައްޗަށް ހިނދުކޮޅަކަށް ފޮނުއްވުނު ބަޔެކެވެ. ވަގުތީ ގޮތުންނެވެ. އަޅުގަނޑުމެންނަކީ އާޚިރަތަށް ނިސްބަތްވާ ބަޔެކެވެ. އަދި އެއަށްފަހު ، އާދަމުގެ ދަރިންގެ އަޞްލު މަންޒިލްގައި ، ދާއިމަށް ދެމިތިބޭ ބަޔެކެވެ. ސުވަރުގެއިން ނުވަތަ ނަރަކައިގާ އަޅުގަނޑުމެންނަށް ޙައްޤުވާ ތަނެއްގައެވެ.
ގޮތް އިޚުތިޔާރުކުރުމުގެ މިނިވަންކަން
ސަލާމްލެއްވި އާދަމުގެފާނުގެ ދެކަނބަލުން ކުރެއްވި މިތަޖުރިބާޔަކީ ، މުހިންމު ފިލާވަޅެކެވެ. އަދި އެއީ ، އިބިލީހުގެ ވަސްވާހަށް ހެއްލިވަޑައިގެން ނަމަވެސް ، އެދެބޭފުޅުންގެ އަމިއްލަ އިޚުތިޔާރުގައި ކުރެއްވި ކަމެކެވެ. އާދަމްގެފާނުގެ ދެކަނބަލުން ބިމުގައި އުޅުއްވަން ޖެހިވަޑައިގަންނަވާނަމަ ، ޝައިތާނާގެ ރޭވުންތެރިކަމާއި ، ނުބައި ނުލަފާކަން ، އެނގިވަޑައިގަންނަވަން ޖެހެއެވެ. އަދި ކުށެއްކުރެއްވިއްޖެނަމަ ، ދެންވާނެގޮތްވެސް އެނގިވަޑައިގަންނަވަން ޖެހެއެވެ. އަދި ﷲ ގެ ނިމުމެއްނެތް ރަޙުމަތާއި ނިޢުމަތުގެ މަތިވެރިކަންވެސް އެނގިވަޑައިގަންނަވަން ޖެހެއެވެ. އާދަމުގެފާނުގެ ދެކަނބަލުން ، އެގަހުން ފަރީއްކުޅުއްވާނެކަން އެއީ ﷲ ދެނެވޮޑިގެންވީ ކަމެކެވެ. އެދެކަނބަލުންގެ ޟަޢީފުކަން ޝާއިތާނާއަށް ވަންހަނާވެގެންނުވާނެކަންވެސް ، ﷲ ދެނެވޮޑިގެން ވެއެވެ.
މީގެ އިތުރަށް އިންސާނާ ދެނެގަންނަންޖެހޭ އެހެންކަމެއްވެސް އޮވެއެވެ. އެއީ އެއްވެސްކަމެއް ވުމުގެ ކުރިން ، އެކަމެއްވާނެކަން ، ކުރިން ﷲ އަށް އެނގިވޮޑިގެންވާކަމެވެ. އެކަލާނގެ އެހުރިހައިކަމެއް ދެނެވޮޑިގެން ވެއެވެ. އެހެންނަމަވެސް އެކަމެއްވާން ، އެކަލާނގެ މަޖުބޫރެއް ނުކުރައްވައެވެ. އާދަމް ޢަލައިހިއްސަލާމަށް އިޚުތިޔާރުތަކެއް ލިބިވަޑައިގެން ވިއެވެ. އެގަހުން ފަރީއްކުޅުއްވުމާއި ފަރީއްނުކުޅެއްވުމުގައެވެ. އަދި އެގަހުން ފަރީއްކުޅުއްވުމާގުޅިގެން ، އެކަލޭގެފާނަށް އަދަބު ލިބިވަޑައިގެންނެވިއެވެ. އިންސާނުންނަށް އިޚުތިޔާރުތަކެއް ލިބިގެންވެއެވެ. ﷲ އަށް ކިޔަމަންވުމާއި ނުވުމުގައެވެ. ﷲ އަށް ކިޔަމަންތެރިވާ އަޅުންނަށް ، ސަވާބުދެއްވައެވެ. އަދި އެކަލާނގެޔަށް އުރެދޭ އިންސާނުންނަށް ، ޢަޒާބު ދެއްވައި އިންޒާރުކުރައްވާފައި ވެއެވެ.
އާދަމުގެފާނާއި ޙައްވާގެފާނު ފޮނުއްވުނީ ކޮންތާކަށް ؟
އާދަމުގެފާނާއި ޙައްވާގެފާނު ، ފޮނުއްވުނީ ކޮންތާކަށްކަމާކެދު ، އެތައްރިޕޯރޓެއް އައިސްފައި ވެއެވެ. ކީރިތި ޤުރުއާނާއި ، ރަސޫލު ޞައްލަﷲ ޢަލައިހި ވަސައްލަމަގެ ސުންނަތުގައި އެކަމާބެހޭގޮތުން އެއްވެސް ބަސްފުޅެއް އައިސްފައެއް ނުވެއެވެ. އާދަމުގެފާނުގެ ދެކަނބަލުން ދުނިޔެމައްޗަށް ފޮނުއްވުނީ ކޮންތަނަކަށްކަން ، ސާފުވުމާއި ނުވުމަކީ އެހައި މުހިންމުކަމެއް ނޫނެވެ. އެދެކަނބަލުން ފޮނުއްވުނީ ދުނިޔެމައްޗަށްކަން އެބަ އެނގެއެވެ.
(ނުނިމޭ)
