(5 އޭޕްރީލް 2023 ގައި ޝާއިއުކުރި ބަޔާ ގުޅޭ)
ނޫޙު ޢަލައިހިއްސަލާމުގެ ނަންފުޅުގަނެ ، ކީރިތި ޤުރުއާނުގައި އައިސްފައިވާ ، އަލް އަންޢާމު ސޫރަތުގެ 84 ވަނަ އާޔަތް.
وَوَهَبْنَا لَهُ إِسْحَاقَ وَيَعْقُوبَ كُلاًّ هَدَيْنَا وَنُوحاً هَدَيْنَا مِن قَبْلُ وَمِن ذُرِّيَّتِهِ دَاوُودَ وَسُلَيْمَانَ وَأَيُّوبَ وَيُوسُفَ وَمُوسَىٰ وَهَارُونَ وَكَذٰلِكَ نَجْزِى ٱلْمُحْسِنِينَ
" ތިމަންރަސްކަލާނގެ ، އެކަލޭގެފާނަށް ( އެބަހީ : އިބްރާހީމުގެފާނަށް ) އިސްޙާޤުގެފާނާއި ، ޔަޢުޤޫބުގެފާނު ދެއްވީމެވެ. އެއިންކޮންމެ ބޭކަލަކަށް ތެދުމަގު ދެއްކެވީމެވެ. އަދި ، އޭގެކުރިން ، ނޫޙުގެފާނަށް ތެދުމަގު ދެއްކެވީމެވެ. އަދި ، އެކަލޭގެފާނުންގެ ދަރިކޮޅުން ، ދާއޫދުގެފާނާއި ، ސުލައިމާނުގެފާނާއި ، އައްޔޫބުގެފާނާއި ޔޫސުފްގެފާނާއި ، މޫސާގެފާނާއި ހާރޫނުގެފާނަށް ތެދުމަގު ދެއްކެވީމެވެ. އަދި ، އިޙްސާންތެރިންނަށް ތިމަންރަސްކަލާނގެ ޖަޒާދެއްވަނީ އެފަދައިންނެވެ. "
އަލްއަޢުރާފް ސޫރަތުގެ 59 ވަނައާޔަތް
لَقَدْ أَرْسَلْنَا نُوحاً إِلَىٰ قَوْمِهِ فَقَالَ يَاقَوْمِ ٱعْبُدُواْ ٱللَّهَ مَا لَكُمْ مِّنْ إِلَـٰهٍ غَيْرُهُ إِنِّيۤ أَخَافُ عَلَيْكُمْ عَذَابَ يَوْمٍ عَظِيمٍ
" ހަމަކަށަވަރުން ، ތިމަންރަސްކަލާނގެ ނޫޙުގެފާނު ، އެކަލޭގެފާނުގެ ޤައުމުގެ މީހުންގެ ގާތަށް ރަސޫލުކަމައިގެން ފޮނުއްވީމެވެ. ފަހެ ، އެކަލޭގެފާނު ވިދާޅުވިއެވެ. އޭ އަހުރެންގެ ޤައުމުގެ މީހުންނޭވެ ! ތިޔަބައިމީހުން ﷲ އަށް އަޅުކަން ކުރާށެވެ. އެކަލާނގެ ފިޔަވައި އެހެން އިލާހަކު ތިޔަބައިމީހުންނަކަށް ނުވެތެވެ. ހަމަކަށަވަރުން ބޮޑުވެގެންވާ ދުވަހެއްގެ ޢަޒާބު ތިޔަބައިމީހުންނަށް ލިބިދާނެކަމަށް އަހުރެން ބިރުގަނެއެވެ. "
ނޫޙު ޢަލައިހިއްސަލާމްގެ ނަންފުޅަށް ނިސްބަތްކުރައްވައި ، ކީރިތި ޤުރުއާނުގައި ސޫރަތެއް ޚާއްޞަކުރައްވައި ބާވައިލައްވާފައި ވެއެވެ. އެއީ ނޫޙު ސޫރަތެވެ. އެސޫރަތުގައި އެކަލޭގެފާނު ރަސޫލުކަމައިގެން ފޮނުއްވުމާ ގުޅިގެން ކުރިމަތިވެވަޑައިގެންނެވި ކަންކަން ބަޔާންކުރައްވާފައި ވެއެވެ. އެސޫރަތުގެ މޫރިތި އާޔަތްތަކުން ނޫޙުގެފާނުގެ މުޅި ޙަޔާތްޕުޅު ޚުލާޞާކޮށް ގެނެސްދެއްވާފައި ވެއެވެ. ނޫޙު ސޫރަތުގައި ﷲ ސުބްޙާނަހޫ ވަތަޢާލާ ވަޙީކުރައްވައި އަންގަވާފައި ވެއެވެ.
ﷲ ސުބްޙާނަހޫ ވަތަޢާލާ ، ނޫޙުގެފާނު ، އެކަލޭގެފާނުގެ ޤައުމުގެ މީހުންގެގާތަށް ރަސޫލުކަމައިގެން ފޮނުއްވިއެވެ. އެބައިމީހުންނަށް ދެއްވުމަށް ނިންމަވާފައިވާ ޢަޒާބު ފޮނުއްވުމުގެ ކުރިން ، އެކަލޭގެފާނުގެ ޤައުމުގެ މީސްތަކުންނަށް ، އިންޒާރުކުރެއްވުމަށް ، އެކަލާނގެ ނޫޙުގެފާނަށް އަމުރުކުރެއްވިއެވެ. ﷲ ގެ އެ އަމުރުފުޅާގުޅިގެން ، އެކަލޭގެފާނުގެ ޤައުމުގެ މީހުންނަށް ނޫޙުގެފާނު ވިދާޅުވިއެވެ.
" ތިޔަބައިމީހުން ﷲ އަށް އަޅުކަންކުރާށެވެ ! އަދި ތިޔަބައިމީހުން އެކަލާނގެއަށް ތަޤުވާވެރިވާށެވެ! އަދި ތިޔަބައިމީހުން ، އަހުރެން ކިޔަމަންވާށެވެ ! އޭރުން ، އެކަލާނގެ ، ތިޔަބައިމީހުންގެ ފާފަތައް ފުއްސަވައިދެއްވާނެތެވެ. އަދި ، ކަނޑައަޅުއްވާފައިވާ މުއްދަތަކަށް ، ތިޔަބައިމީހުން ފަސްކުރައްވާނެތެވެ. އެބަހީ ؛ ތިޔަބައިމީހުންގެ އަޖަލު ޖެހެންދެން ދުނިޔޭގައި ލައްވާނެތެވެ. އޭ އަހުރެންގެ ޤައުމުގެ މީހުންނޭވެ ! އަހުރެންނަކީ ، ތިޔަބައިމީހުންނަށް ބަޔާންވެގެންހުރި އިންޒާރުކުރާ މީހަކީމެވެ. "
ނޫޙު ޢަލައިހިއްސަލާމުގެ ގޮވައިލެއްވުމަށް ، އެކަލޭގެފާނުގެ ޤައުމުގެ މީސްތަކުން ފުރަގަސްދިނެވެ. އަދި އެކަލޭގެފާނު ދޫކޮށް ފިލަން ދުވުނެވެ. އެކަލޭގެފާނު ، ދީނަށްގޮވައިލައްވާވަރަކަށް ، އެކަލޭގެފާނުގެ ދަޢުވަތާ ، އެބައިމީހުން ދުރަށް ދިޔައެވެ. ހަމައެއާއެކު ، ނޫޙުގެފާނު ، އެކަލޭގެފާނުގެ ރިސާލަތު ހާމަކުރެއްވުމުގައި ހުރިހާ ގޮތަކުން ތަޖުރިބާ ކުރެއްވިއެވެ. އެއުރެންނަށް ހަރުއަޑުން ގޮވައިލެއްވިއެވެ. ފާޅުގައި ގޮވައިލެއްވިއެވެ. އަދި ވަންހަނާކޮށް ސިއްރިޔާތުގައިވެސް ގޮވައިލެއްވިއެވެ.
ﷲ ގެ ކުޅަދުންވަންތަވެރިކަމުން މަތިމައްޗަށް އުޑުތައް ހައްދަވައި ، އިރުހަނދާއި ތަރިތައް ދައުރު ކުރައްވައި ، ބިންއުފައްދަވައި ، އިންސާނުންނަށް ވަޢުދުވެވޮޑިގެންވާ ނިޢުމަތްތަކާއި ރަޙުމަތުގެ ވާހަކައިން ، އެކަލޭގެފާނު ، އެބައިމީހުންނަށް ހަނދާން ކޮށް ދެއްވިއެވެ. އެހެނަސް ، އެބައިމީހުން އެކަލޭގެފާނާ ދުރަށްދިއުން ނޫންކަމެއް ނުވިއެވެ. އެންމެފަހުން ، އެކަލޭގެފާނު ގޮތްހުސްވެވަޑައިގެން ، ﷲ އަށް ދެންނެވިއެވެ.
" އަޅުގެވެރި ރަސްކަލާކޯއެވެ ! ހަމަކަށަވަރުން ، އެއުރެން މިއަޅާއަށް އުރެދިއްޖައޫއެވެ. އަދި އެއުރެންގެ މުދަލުންނާއި ދަރިންގެފަރާތުން ، ގެއްލުމެއްނޫން އެހެންކަމެއް ނުލިބޭ މީހުންނާ އެއުރެން ތަބާ ވެއްޖައޫއެވެ.
ކާރަފުންގެތެރެއިން ހަމައެކަކުވެސް ، ބިންމަތީ ނުލެއްވުން އެދި ، ނޫޙު ޢަލއިހިއްސަލާމް ، ﷲ އަށް ދުޢާ ދެންނެވިއެވެ. އެއަށްފަހު ، ނޫޙުގެފާނުގެ ޤައުމުގެ މީސްތަކުންކުރެ ، އެކަލޭގެފާނަށް ނުކިޔަމަންތެރިވެ ، އުރެދުނުމީހުން ، ޣަރަޤު ކުރައްވައި ﷲ ގެ ކޯފާގެ ތެރެޔަށް ހުށަހެޅުނެވެ. އަދި ، ނޫޙުގެފާނުގެ ނާކޮޅުގެ ޙިމާޔަތުގެ ދަށުގައި ، އެކަލޭގެފާނާއި އެކަލޭގެފާނަށް ތަބާވީ މީސްތަކުން ލައްވައި ، އެކަލާނގެ ޙަޟުރަތުން ރަޙުމަތާއި ނިޢުމަތުން ފުރިގެންވާ ދަރިފަސްކޮޅެއް އާބާދުވެގެން ދިޔައެވެ.
(ނިމުނީ)
