މަންޓާ އެއަރ އިން ބައިނަލްއަގުވާމީ ދަތުރުތައް ފަށަން ތައްޔާރުވެއްޖެއެވެ.
ޕީއެސްއެމް ނިއުސްއަށް މައުލޫމާތު ދެއްވަމުން މަންޓާ އެއަރގެ ސީއީއޯ މުޙައްމަދު ޚަލީލް ވިދާޅުވެފައިވަނީ އެ އެއަރލައިން އިން މިހާރު މަސައްކަތް ކުރަމުންދަނީ ބައިނަލްއަޤްވާމީ ދަތުރުތައް ފެށުމަށް ކަމަށެވެ.
އެގޮތުން ވަރަށް އަވަހަށް ބައިނަލްއަޤްވާމީ ދަތުރުތައް ފަށާނެކަން ހާމަކުރައްވަމުން ޚަލީލު ވިދާޅުވީ އެންމެ ފުރަތަމަ ދަތުރު ފެށުމަށް ހަމަޖެހިފައިވަނީ އިންޑިއާއަށްކަމަށެވެ.
ކުޑަ ދުވަސްކޮޅެއްގެ ތެރޭގައި ކުރިއެރުންތަކެއް ހޯދާފައިވާ ލޯކަލް އެއަރލައިން، މަންޓާ އެއަރ ރަސްމީކޮށް ލޯންޗްކޮށްފައިވަނީ 2018 ވަނަ އަހަރުގެ ނޮވެންބަރ މަހުގެ 22 ވަނަ ދުވަހުއެވެ.
2019 ވަނަ އަހަރުގެ ފެބްރުއަރީ މަހުގެ 24 ވަނަ ދުވަހު މި އެއަރލައިންގެ ދަތުރުތައް ރަސްމީކޮށް ފަށާފައިވާއިރު، ދ. ކުޑަހުވަދޫ، ބ. ދަރަވަންދޫ އަދި އައްޑޫ ސިޓީއަށް އެ އެއަރ ލައިނުން އަންނަނީ ދަތުރުކުރަމުންނެވެ.
މީގެ އިތުރުން މިމަހުގެ 5 ވަނަ ދުވަހު އެ އެއަރލައިންއިން ވަނީ ޖޭއޭ މަނަފަރު މޯލްޑިވްސް ރިސޯޓްއާއިއެކު ވެފައިވާ އެއްބަސްވުމެއްގެ ދަށުން ހޯރަފުށީ އެއަރޕޯޓަށް ޗާޓަރ ދަތުރުތައްވެސް ފަށާފައެވެ.
މަންޓާއިން މިވަގުތު ޑޮމެސްޓިކް ދަތުރުތަކަށް އޭޓީއާރުގެ ތިން އެއަރ ކްރާފްޓާއި ބީޗް ކްރާފްޓްގެ ބޯޓެއް އަންނަނީ ބޭނުންކުރަމުންނެވެ. އަދި ސީޕްލޭން 11 އެއަރކްރާފްޓް އަންނަނީ ބޭނުންކުރަމުންނެވެ.
މަންޓާ އެއަރއިން ބުނީ މިއަހަރު ނިމުމުގެ ކުރިން ސީޕްލޭންގެ އަދަދު 15 އެއަރކްރާފްޓަށް ބަދަލުވެގެންދާނެކަމަށެވެ.
