މަޖިލީހަށް ހުށައަޅާ މައްސަލަތަކާއިމެދު ޢަމަލުކުރަނީ ޤާނޫނު އަސާސީ ތަންދޭ އެންމެ ފުޅާ މިނެއްގައި ކަމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާއަށް މަޑުއްވަރީ ދާއިރާގެ މެންބަރު އާދަމް ޝަރީފް ހިޔާ ފްލެޓުގެ ފިނިޝިންގ އާ ގުޅޭ ގޮތުން ހުށަހެޅުއްވި މައްސަލައާއި ގުޅިގެން ވޯޓަށް އެހުމުގެ ކުރިން ވާހަކަ ދައްކަވަމުންނެވެ.
އެމަނިކުފާނު ވިދާޅުވީ އެއީ ޑިމޮކްރަސީ ނެގެހެއްޓުމަށްޓަކައި މުހިންމު ކަމެއްކަމަށެވެ.
" ބައެއް މެންބަރުން ވާހަކަފުޅު ދައްކަވާއިރު، އެ ވާހަކަތައް ހުއްޓުވުމަކީ އެންމެ ފައިދާހުރި ގޮތްކަމަށް ބައެއް މެންބަރުން ދެކެވަޑައިގަންނަވާ. ނަމަވެސް ބަހުސްކޮށް ރައްޔިތުންނަށް ކަންކަން އޮޅުއްފިލުވައިދިނުން އެއީ އެންމެ ރަނގަޅުގޮތް." ރައީސް ނަޝީދު ވިދާޅުވިއެވެ.
ރައީސް ނަޝީދު މިހެން ވިދާޅުވެފައިވާއިރު، އިދިކޮޅު ބައެއް މެންބަރުން ހުށައަޅަ މައްސަލަތަކުގައި ނުވަތަ ވާހަކަ ދައްކަމުން ގެންދާއިރު ނިޒާމީ ނުކުތާ ނަންގަވާ ވާހަކަދެއްކުމަށް ހުރަސް އަޅަމުން ގެންދާކަމަށް އެ މެންބަރުން ވިދާޅުވެފައިވެއެވެ.
