ގޭގައި ތިބޭއިރު ފައިދާހުރި ކަންކަމުގައި މަޝްއޫލުވެގެން އުޅުމަށް ދަރިވަރުންނަށް އެޑިއުކޭޝަން މިނިސްޓަރު، ޑރ. ޢާއިޝަތު ޢަލީ އިލްތިމާސްކުރައްވައިފިއެވެ. މިކަމަށް އިލްތިމާސްކުރެއްވީ ކުޑަކުދިންގެ ދުވަހުގެ މުނާސަބަތުގައި ދެއްވި އޯޑިއޯ މެސެޖެއްގައެވެ. މިމެސެޖްގައި މި ބަންދުގެ ތެރޭގައި ދީނީކަންކަމަށް ސަމާލުކަންދިނުމަށާއި، މައިންބަފައިންނަށް އެހީތެރިވުމަށާއި، އާއިލާގެ މީހުންނާއި ރައްޓެހިންނާއި ގުޅުން ބޭއްވުމަށް މިނިސްޓަރު ނަސޭޙަތްތެރިވިއެވެ.
"ސްކޫލަށް ދިޔުމަކީ މުހިއްމު ކަމެއް ނަމަވެސް އެއަށްވުރެ މުހިއްމީ ތިޔަކުދިންގެ ސަލާމަތްތެރިކަން. އަޅުގަނޑު ތިޔަކުދިންނަށް ދޭން އޮތް ނަސޭހަތަކީ ބޮޑެތި މީހުންގެ ބަސްއަހައިގެން، ގޭގަ ތިބެއިރު ފައިދާހުރި ކަންކަމުގައި މަޝް؟އޫލްވެގެން އުޅުން. އެގޮތުން ނަމާދުކޮށް ޤުރުއާންކިޔަވައި، ފޮތްކިޔައި ގޭތެރޭ ކަންތައްތަކުގައި މަންމަމެންނަށް އެހީތެރިވެދީ އުޅުން. އެހެން ގޭގައި އުޅޭ އާއިލާގެ މީހުންގެ ހާލު ބަލައިލަން ގުޅާލައި އަދި ރައްޓެހިންނާއި އޮންނަ ގުޅުން ވެސް ދަމަހައްޓަން. ކެތްތެރިކަން އިސްކޮށް އެކަކު އަނެކަކަށް އަޅާލަން." މިނިސްޓަރު ވިދާޅުވިއެވެ.
މިނިސްޓަރު ވަނީ މިބަންދުގައި އާކަންތައްތަކެށް ދަސްކޮށް އާ ތަޖުރިބާތަކެއް ކުރުމަށް ދަރިވަރުންނަށް ހިތްވަރުދެއްވާފައެވެ. "ކޮންމެ ކުއްޖަކުވެސް ބަލަންވީ ބަންދު ފިލައި ސްކޫލަށް ނުކުންނައިރުދެތިން ހަތަރު އާކަމެށް ދަސްކޮށް، އާ ތަޖްރިބާތަކެއްކޮށް، ޔަޤީންކަމާއި ޙަރުދަނާކަމެއް ތިމާގެ ކިބައިގައި އަށަގަންނުވަން." މިނިސްޓަރު ވިދާޅުވިއެވެ. އަދި މިބަންދުގެ ދުވަސްތަކަކީ ދަރިވަރުންގެ ޙަޔާތުން ގެއްލޭ ދުވަސްތަކެއްގެ ގޮތުގައި ނުހެދުމަށް ވެސް މިނިސްޓަރ ނަސޭހަތްތެރިވިއެވެ.
އެހެން އަހަރުތަކާއި ޚިލާފަށް މި އަހަރު ކުޑަކުދިންގެ ދުވަސް ދަރިވަރުންނާއި ބައްދަލުކުރިއިރު ހުރިހާ ދަރިވަރުން ތިބެން މިޖެހުނީ ގޭގައި ކަމަށާއި އިރާދަކުރެއްވިއްޔާ މި އަންނަ އަހަރު މިދުވަސް ދަރިވަރުންނާއި ބައްދަލުކުރާނީ ވަރަށް މަޖާ، ހިތްގައިމު ދުވަހެއްގައިކަމަށްމިނިސްޓަރު ވިދާޅުވިއެވެ. އަދި ކުދިންނާއި ބައްދަލުނުވާތީ މުދައްރިސުންނާއި އޭނާ ދެރަވާކަމަށާއި ބައްދަލުވާނެ ދުވަހަކަށް އިންތިޒާރުކުރަްވާ ކަމަށް މިނިސްޓަރު ފާހަގަކުރެއްވިއެވެ. މިނިސްޓަރު އިތުރަށް ވިދާޅުވި ގޮތުގައި މިހާލަތުން އަޅުގަނޑުމެން ސަލާމަތްކުރެވޭތޯ ވަރަށް ގިނަ ބޭފުޅުން މަސައްކަތް ކުރާކަމަށް ވިދާޅުވިއެވެ. އަދި ގޭގައި ތިބެގެން ދަރިވަރުން އެހީތެރިވަނީ މުޅި ޤައުމު މިބަލިން ސަލާމަތްކުރުމަށް ކަމަށާއި، ﷲގެ އިރާދަފުޅުން ވަރަށް އަވަހަށް މިކަމުން ސަލާމަތްވެ ސްކޫލްތައް ހުޅުވި ކިޔެވުން ފެއްޓޭނެކަމަށް ވިދާޅުވިއެވެ.
