ފެނާނަރުދަމާގެ ހޮޅި ވަޅުލުމަށް ހއ. ފިއްލަދޫން 700 އެއްހާ ރުއްގަސް ނަގަން ޖެހޭކަމަށް އެރަށު ކައުންސިލުން ވިދާޅުވެއްޖެއެވެ. ފިއްލަދޫގެ ފެނާނަރުދަމާގެ މަސައްކަތް މިއަހަރު ކުރީ ކޮޅު ފެށޭނެކަމަށް އެ މަސައްކަތް ޙަވާކުލުކޮށްފައިވާ ސާސްއީ ކުންފުނިން ވަނީ ބުނެފައެވެ.
ކައުސިލްގެ ރައީސް މުޙައްމަދު ފަލާޙު ވިދާޅުވީ ރުއްގަސް ކަނޑަން ޖެހެނީ އަލަށް ގޯތި ދޫކުރާ ސަރަޙައްދަށް ހޮޅިވަޅުލަން ޖެހޭތީ ކަމަށެވެ. ފެނާ ނަރުދަމާ ހޮޅި ވަޅުލުމަށް ނަގަންޖެހޭ އާންމުންގެ ރުއްގަހަށް ކައުންސިލުން މިހާރު ވާނީ ބަދަލު ދީފައެވެ. ރުއްގަސްތައް ބޭނުންވާ ތިންފަރާތަކާ ވާހަކަދައްކަމުންދާކަމަށް ކައުންސިލުގެ ރައީސް ވިދާޅުވިއެވެ. ނަމަވެސް ރުއްގަސް ބޭނުންވާ ފަރާތްތަކަށް އެރުއްގަސް ދީފައި ރަށުގައި ކުރަންޖެހޭ މަސައްކަތްތަކަށް ބޭނުންވާ ވެހިކަލް ހޯދާނީތޯ ނުވަތަ ވަކި އަގެއް ކަނޑައަޅައިގެން ރުއްތައް ވިއްކާލާނީތޯ މަޝްވަރާ ކުރަމުންދާކަމަށް ވިދާޅުވިއެވެ. ރަށުގެ ކުނިކޮށްޓަށާއި އެނޫންވެސް މަސައްކަތްތަކަށް ބައެއް ވެހިކަލްތައް ހޯދަން ޖެހިފައިވާކަން ފަލާޙު ފާހަގަކުރެއްވިއެވެ.
ކައުންސިލްގެ ރައީސް ވިދާޅުވީ އެރަށުގެ ބަނދަރު ސަރަޙައްދުގައި ވެސް ރުއްގަސް އިންދަން ޖެހޭ ކަމަށެވެ. ނަމަވެސް ފެނާ ނަރުދަމާ ޤާއިމްކުރުމަށް ނަގަންޖެހޭ ރުއްގަހަކީ ވަރަށް ދިގު ރުއްގަހަށްވާތީ ބަނދަރު ސަރަޙައްދުގައި އެރުއްތައް ޖަހަން ކަމު ނުދާކަމަށެވެ. ބަނދަރު ސަރަޙައްދުގައި ޖަހަން ޖެހޭނީ ތަންކޮޅެއް ކުދި ރުއްތައް ކަމަށް އޭނާ ފާހަގަކުރެއްވިއެވެ.
ފިއްލަދޫއަކީ ވަރަށް ރުއްގިނަ ރަށެކެވެ. ނަމަވެސް ރާއްޖޭގެ ބައެއް ރަށްރަށުން ރިސޯރޓްތަކަށް ރުއްގަސް ވިއްކާ ގޮތަށް ވިޔާފަރި އުޞޫލުން އެރަށުން ރުއްގަސް ނަގައިގެން ނުވިއްކާކަމަށް ކައުންސިލްގެ ރައީސް ވިދާޅުވިއެވެ.
"އަޅުގަނޑުމެންނަށްވެސް އެނގޭ ވަރަށް ގިނަ ރަށްރަށުން އެކަހަލަ ގޮތަކަށް ރުއްގަސް ވިއްކައިގެން ނަފާ ހޯދާކަން އެކަމު އަޅުގަނޑުމެން ބޭނުމެއް ނޫން އެގޮތަށް އެކަން ކުރާކަށް، ދަރުދަމާއަށް ވެސް ރުއްގަސް މި ނަގަނީ ނުނަގައި މަސައްކަތް ކުރިއަށް ނުގެންދެވޭނެތީވެ." ކައުސިލްގެ ރައީސް ވިދާޅުވިއެވެ.
ފިއްލަދޫގެ ގިނަ ރުއްތަކަކީ ވަރަށް ޢުމުރުން ދުވަސްވީ ދިގު ރުއްތަކެކެވެ.
