ރާއްޖޭގެ ފަތުރުވެރިކަމުގެ ދާއިރާގައި މަސައްކަތް ކުރައްވާ ބޭފުޅުން ފަތުރުވެރިކަން ޕްރޮމޯޓު ކުރުމަށް ރާއްޖެއިން ބޭރަށް ދަތުރުކުރެއްވުމުގައި ފޮރިން މިނިސްޓްރީން ވެދެވެންއޮތް ހުރިހާ އެހީތެރިކަމެއް ދެއްވާނެ ކަމަށް އެމިނިސްޓްރީގެ މިނިސްޓަރ ޢަބްދުﷲ ޝާހިދު ވިދާޅުވެއްޖެއެވެ.
މިނިސްޓަރ ޢަބްދުﷲ ޝާހީދު މިހެން ވިދާޅުވީ ޓޫރިޒަމް މިނިސްޓްރީން މިރޭ ބޭއްވި "ބުރަބި" ޖަލްސާ ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ.
އެމަނިކުފާނު ވިދާޅުވީ މިއަހަރު ވެސް ވަނީ ބައެއް ގައުމުތަކަށް ދަތުރުކުރުމުގައި ލުއިފަސޭހަތަކެއް ހޯދައިދެވިފައި ކަމަށެވެ. މިހާރުވެސް ބެންކޮކާއި، ދުބާއީއާއި، ރަޝިޔާއަށް ވަޑައިގަންނަވަން ދަތި ނުވާނެ ކަމަށް އެމަނިކުފާނު ވިދާޅުވިއެވެ.
"ފަތުރުވެރިކަމުގެ ދާއިރާގައި މަސައްކަތް ކުރައްވާ ބޭފުޅުން ފަތުރުވެރިކަން ޕްރޮމޯޓު ކުރެއްވުމަށް ރާއްޖެއިން ބޭރަށް ދަތުރު ކުރެއްވުމުގައި އަޅުގަނޑުމެންގެ މިނިސްޓްރީގެ ދާއިރާއިން ވެދެވެންއޮތް ހުރިހާ އެހީއެއް ވެދޭނަން. މިއަހަރު މިހާރުވަނީ ބައެއް ގައުމުތަކަށް ދަތުރު ކުރުމުގައި އިތުރު ލުއިފަސޭހަތަކެއް ހޯދައިދެވިފައި. ބެންކޮކަށް ވަޑައިގެންނެވުމަކީ މިއަދު މާއުނދަގޫ ކަމަކަށް ނުވާނެ. ހަމައެތަނަށް ވަޑައިގަންނަވާއިރަށް ޖާހަދޭނެ ވިސާ. ދުބާއީއަށް ވަޑައިގަންނަވާކަށް ދަތިފުޅެއް ނުވާނެ. ރަޝިޔާއަށް ވަޑައިގަތީމާ ދިވެއްސެއްހޭ އަހާލާނެ. ފަޚުރުވެރިކަމާއެކީ އަޅުގަނޑުމެން މޭގައި އަތްޖަހާލައިފައި ބަނޑުމަތީގައި އަތްޖަހާލާފައި ބުނެވޭނެ އަޅުގަނޑުމެންނަކީ ދިވެހިންނޭ،" މިނިސްޓަރ ވިދާޅުވިއެވެ.
"އިރާދަކުރެއްވިއްޔާ މާޗުމަހުގެ ދެވަނަ ދުވަހު މާލޭގައި ހުޅުވޭނެ ޝެންގަން ވިސާ ލިބުމުގެ ފުރުސަތު. މި ފެށިގެން ދަނީ ހަމައެކަނި ޖަރުމަނަށް ކަމަށްވިޔަސް މާޗުމަހުގެ ދެވަނަ ދުވަސް އަންނައިރު ޔޫރަޕުގެ އިތުރުގައުމުތައް އެ ޕްރޮސެސްގައި ބައިވެރިވާނެ ކަމުގެ ޔަގީންކަން އަޅުގަނޑަށް މިހާރުވަނީ ލިބިފައި. އަދި އަންނަ އަހަރުގެ ތެރޭގައި ދުނިޔޭގެ ބައެއްއެހެން ގައުމުތަކަށް ވެސް އެފުރުސަތުތައް ހުޅުވިގެންދާނެ،" މިނިސްޓަރ ވިދާޅުވިއެވެ.
ފޮރިންމިނިސްޓްރީއަކީ ގިނަ އެމްބަސީތަކާއި ސަފީރުންތަކެއް މަސައްކަތް ކުރަމުންދާ މިނިސްޓްރީއެއް ކަމަށް ޝާހިދު ވިދާޅުވިއެވެ. އެއިން ކޮންމެ އެމްބަސީއަކީ އަދި ސަފީރަކީ ވެސް ފަތުރުވެރިކަމުގެ ދާއިރާގައި މަސައްކަތް ކުރައްވާ ބޭފުޅުންނަށް ވެސް ޚިދުމަތް ދެއްވުމަށް ތިއްބެވި ބޭފުޅުންކަން ޔަގީން ކުރެއްވުމަށް މިނިސްޓަރ އެދިވަޑައިގެންނެވިއެވެ. އެތަންތަނުގެ ބޭނުން ފުރިހަމައަށް ހިފުމަށް އެދިވަޑައިގަންނަވާ ކަމަށްވެސް މިނިސްޓަރ ވިދާޅުވިއެވެ.
