ފާއިތުވީ އަހަރެއްހާ ދުވަސް ތެރޭގައި ދިވެހި ޚާރިޖިއްޔާއަށް ލިބިގެންދިޔަ ކުރިއެރުމާއި، ބޭރު ދުނިޔޭގެ އިތުބާރު ހޯދުމުގައި ޚާރިޖިއްޔާގެ މުޅި ޓީމުން ކުރެއްވި މަސައްކަތް ފާހަގަ ކުރައްވައި، ޚާރިޖީ ވަޒީރު އަބްދުﷲ ޝާހިދު، ދިވެހި ޚާރިޖީ ޓީމަށް ޝުކުރު އަދާކުރައްވައިފިއެވެ.
ޖުމްހޫރީ ދުވަހުގެ ރަސްމީ ޖަލްސާގައި ރާއްޖޭގެ ޚާރިޖިއްޔާ ހޯދި ކާމިޔާބު ފާހަގަ ކުރައްވައި ރައީސުލްޖުމްހޫރިއްޔާ އިބްރާހިމް މުޙަންމަދު ސޯލިޙު ދެއްކެވި ވާހަކަފުޅަށް އިޝާރާތް ކުރައްވައި، ފޮރިން މިނިސްޓަރު ޝާހިދު ވިދާޅުވީ އެ ޖަލްސާގައި ރައީސް ސޯލިޙު ދެއްވި އެންމެ މުހިންމު އެއް މެސެޖަކީ ޚާރިޖިއްޔާއިން ރާއްޖެއަށް އިތުރު ކުރިއެރުން ލިބި، ބޭރު ދުނިޔޭގެ އިތުބާރު ލިބިފައިވުން ކަމަށެވެ.
"މި އަރުތަ ޙާސިލް ކުރުމުގައި ޚާރިޖީ ޓީމުން ކުރެއްވި ހަރުދަނާ، އިޚްލާސްތެރި މަސައްކަތް ފާހަގަކޮށް ޝުކުރު ދަންނަވަން." މިނިސްޓަރު ވިދާޅުވިއެވެ.
ޖުމްހޫރީ ދުވަހުގެ ރަސްމީ ޖަލްސާގައި ރައީސް އިބްރާހިމް މުޙަންމަދު ސޯލިޙު ވަނީ ފާއިތުވީ އަހަރެއްހާ ދުވަހުގެ ތެރޭގައި ދިވެހި ޚާރިޖިއްޔާއިން ކުރެއްވި މަސައްކަތަށް ވަރަށް ބޮޑަށް ތައުރީފު ކުރައްވާފައެވެ. ރައީސް ވިދާޅުވީ މިދިޔަ އަހަރެއްހާ ދުވަހަކީ ޚާރިޖީ ދާއިރާއިން ރާއްޖެއަށް ވަރަށް ކާމިޔާބު އަހަރެއް ކަމަށެވެ.
"ޚާރިޖީ، އަދި އަވައްޓެރި ރަޙްމަތްތެރިކަން އޭގެ ހަގީގީ މަގަށް އިއާދަކުރެވި، ބަޔެއް ގައުމުތަކާއެކު ގުޅުން ޤާއިމް ކުރެވިއްޖެ. އަދި ހެޔޮއެދޭ ބަޔެއް ޤައުމުތަކުން މިދިޔަ އަހަރެއްހާ ދުވަހުގެ ތެރޭގައި ހިލޭ އެހީގެ ގޮތުގައި 3.21 ބިލިޔަން ރުފިޔާ ރާއްޖެއަށް ދީފި" ރައީސް ސޯލިޙު ވިދާޅުވިއެވެ.
ރައީސް ވިދާޅުވީ އަބޫދާބީން ރާއްޖެއަށް މިއަހަރު ހިލޭ އެހީގެ ގޮތުގައި ދޭން ނިންމާފައި އޮތް 25 މިލިޔަން ޑޮލަރު، 50 މިލިޔަން ޑޮލަރަށް ބޮޑުކުރަން ނިންމި ކަމުގެ ޚަބަރުވެސް، މިމަހުގެ 10 ވަނަ ދުވަހު އިރުއޮއްސެމުން ދަނިކޮށް، ރައީސަށް ފޯނު ކުރައްވައި މިނިސްޓަރު ޝާހިދު ދެއްވާފައިވާ ކަމަށެވެ.
މިނިސްޓަރު ޝާހިދު ވިދާޅުވެފައި ވަނީ ބައިނަލް އަޤްވާމީ ދާއިރާގައި ރާއްޖެ ވަރަށް ބޮޑަށް ފަހަތަށް ވެއްޓިފައި ވަނިކޮށް، ދުނިޔޭގެ ޤައުމުތަކުގެ އިތުބާރާއި އިޙްތިރާމް އަލުން އަނބުރައި ރާއްޖެއަށް ހޯދިއްޖެ ކަމަށެވެ. ފާއިތުވީ އަހަރަކީ ޚާރިޖީ ދާއިރާގައި ކާމިޔާބު އަހަރެއްގެ ގޮތުގައި ފާހަގަ ކުރެއްވިއިރު، މިނިސްޓަރު ވިދާޅުވެފައި އިންސާނީ ހައްގުތަކާއި، ޑިމޮކްރަސީ އާއި ތިމާވެއްޓަށް އަންނަ ބަދަލު ތަކަކީ ރައީސް ސޯލިޙުގެ ޚާރިޖީ ސިޔާސަތުގެ އެންމެ މައިގަނޑު ތަނބުތައް ކަމަށެވެ. އެ ތަނބުތަކުގެ މައްޗަށް ބިނާކޮށް، މިހާރުވެސް ރަޙްމަތްތެރިކަން އޮތް ގައުމުތަކާއި، އަދި ޒަމާންވީ ރަޙްމަތްތެރިންނާ ގުޅުން ބަދަހި ކުރުމުގެ މަސައްކަތް ކުރިޔަށް ގެންދަވާނެ ކަމަށެވެ.
މީގެއިތުރުން އައު ރަޙްމަތްތެރި ގައުމުތައް ހޯދަން މަސައްކަތް ކުރުމާއި، ރާއްޖެއިން ބޭރުގައި ދިރިއުޅޭ ދިވެހިންނަށް ކުރިމަތިވާ ކަންކަން ޙައްލު ކޮށްދިނުމަށް އިތުރަށް ކުރަންޖެހޭ މަސައްކަތްތައް ޚާރިޖިއްޔާއިން ކުރުންވެސް ފާހަގަ ކުރައްވާފައިވެއެވެ.
ކޮން ކާމިޔުަަބެއް ލިބުނީ؟ ކޮމަންވެލްތާ އަލުން ގުޅުނީތަ؟ ގަތަރާ އަލުން ޚާރިޖީ ގުޅިުން ގާއިމުކުރެވުނީތަ؟ ރާއްޖެއަށް މާލީ އެހީ ހޯދުނީތަ؟ ޚާރިޖީ ވަޒީރު ބޭރަށް ކުރެއްވި ދަތުރުފުޅުތަކުގެ ޚަރަދުވެސް ނުލބޭ. އެކަމަކުވެސް ކާމިޔާބޯ. ކޯޗެއް ކާމިޔާބުވެގެން މިއުޅެނީ.