ހެޕީމާކެޓް ގޯދިއްޔާ ފުޓުސަލް ކަޕް ސެމީފައިނަލްގެ ފަހު ދެ ޖާގަ ޔަންގްވަންސާއި ފްރެންޑްސް ކުލަބު ހޯދައިފިއެވެ.
މި މުބާރާތުގެ ސެމީގެ ޖާގަ ޔަންގްވަންސް ހޯދީ މާކަރީ ޔުނައިޓެޑާ ދެކޮޅަށް މިރޭ ކުޅުނު މެޗު 2-0 ލަނޑުން މޮޅުވެގެންނެވެ. ފޯރިގަދަ ކުޅުމެއް ފެނިގެންދިޔަ މިމެޗުގައި ޔަންގްވަންސްގެ ދެ ގޯލް ޖަހައިދީފައިވަނީ ޙުސައިފަތު ރަޝީދާއި، އިސްމާޢީލް މުނީޒެވެ. މި މެޗުގެ މޮޅު ކުޅުންތެރިއަކަށް ވެސް ހޮވިފައިވަނީ މުނީޒެވެ.
ސެމީގެ ފަހު ޖާގަ ހޯދަން ނުކުތީ އެފްސީ ސްކޫޕެ ކަންމައްޗާއި ފްރެންޑްސް ކުލަބެވެ. މިމެޗު 6-2 އިން މޮޅުވެ ސެމީގެ ފަހު ޖާގަ ކަށްވަރުކުރީ ފްރެންޑްސް ކުލަބެވެ.
މެޗުގައި ފްރެންޑްސް ކުލަބުން ޖެހި 6 ލަނޑުގެ ތެރެއިން އެއްލަނޑަކީ ސްކޫޕެ ކަންމަތި އަތުން ބައިކޮޅަށް ވަދެފައިވާ ލަނޑެކެވެ. މި މެޗުގައި އަޔާޒު އަޙުމަދު ވަނީ ދެ ލަނޑުޖަހައިދީފައެވެ. ޙުސައިން ޣައްސާން ލަބީބާއި، މުޙައްމަދު ރިފްޢަތާއި، މުޙައްމަދު ޢިމްރާން މިއިން ކޮންމެ ކުޅުންތެރިއަކުވަނީ ލަނޑެއް ޖަހައިފައެވެ.
ސްކޫޕްކަންމަތީގެ ގޯލުތައް ޖަހައިފައިވަނީ ހޫދު ލަތީފާއި، ޙުސައިން ފައިސަލެވެ.
މުބާރާތުގެ ކުޅުން ދެން އޮންނާނީ މިމަހު 30 ވަނަ ދުވަހުގެ ރޭގައެވެ. އެރޭ އޮންނާނީ ސެމީފައިނަލްގެ ދެމެޗެވެ. ފުރަތަމަ މެޗުގައި ބައްދަލުކުރާނީ އެފްސީ ޒެފިއާ އަދި އެފްސީ ބޭރުމަތި އެވެ. ސެމީގެ ދެވަނަ މެޗުގައި ބައްދަކުރާނީ ފްރެންޑްސް ކުލަބާއި ޔަންގްވަންސް އެވެ.
