އައްޑޫ ސިޓީގައި ބާއްވާ އެންމެ ދުވަސްވީ އަދި އެންމެ ފޯރިގަދަ ފުޓުސަލް މުބާރާތް ކަމަށްވާ ގޯދިއްޔާ ފުޓުސަލް މުބާރާތް މިރޭ ފަށައިފިއެވެ. މި މުބާރާތް މިފަހަރު ބާއްވަނީ މުބާރާތުގެ ޓައިޓަލް ސްޕޮންސަރ ހެޕީމާކެޓާ ގުޅުވައިގެން "ހެޕީމާކެޓް ގޯދިއްޔާ ފުޓުސަލް ކަޕް 2019" ގެ ނަމުގައެވެ.
މަރަދޫ ވެމްބޮޅުފިށި ސްޓޭޑިއަމުގައި މިރޭ ބޭއްވި ރަސްމިއްޔާތުގައި މި މުބާރާތް ފަށްޓަވައި ދެއްވީ އައްޑޫ ސިޓީ ކައުންސިލްގެ މަރަދޫ އަވަށުގެ ކައުންސިލަރ އިބްރާހީމް ފައިސަލެވެ.
މިފަހަރުގެ މުބާރާތުގައި ބައިވެރިވެފައިވަނީ ޖުމްލަ 16 ޓީމެވެ. މި ޓީމްތައް ވަނީ 4 ގުރޫޕަކަށް ބަހާލައިފައެވެ. އެއީ އޭ، ބީ، ސީ، ޑީ ގުރޫޕެވެ. ގުރޫޕް އޭ ގައި ހިމެނެނީ އެފްސީ ބޭރުމަތި، މާކަރީ ޔުނައިޓެޑު، ޕަޓާސް، އެފްސީ ސްޕްރިންޓެވެ. ބީ ގުރޫޕުގައި ހިމެނެނީ ޔުނައިޓެޑު ފުރެންޑްސް، އެފްސީ ޒެފިއާ، އެފްސީ ސްކޫޕް ކަންމަތި، ވެންބޮޅު ޔުނައިޓެވެ. ގުރޫޕް ސީގައި ހިމެނެނީ ޒިލޯން، އެފްސީ އަފިރިން، ޔަންގު ވަންސް، އެފްސީ ޒިޔާރަތް ފަންނަ އެވެ. ގުރޫޕް ޑީ ގައި ހިމެނެނީ ފްރެންޑްސް ކުލަބު، މަލްޓި ޖީނިއަސް، އެސްއެމްޓީ، ކުލަބު ސްކަވެންޖާސް އެވެ.
މުބާރާތް ހުޅުވި މެޗުގައި ބައްދަލު ކުރީ އެފްސީ ބޭރުމަތި ޓީމާއި، މާކަރީ ޔުނައިޓެޑެވެ.
މުބާރާތުގެ ފުރަތަމަ މެޗުގައި ބައްދަލުކުރީ އެފްސީ ބޭރުމަތި ޓީމާއި މާކަރީ ޔުނައިޓެޑެވެ. މިމެޗު 2-1 ލަނޑުން ކާމިޔާބުކޮށް މުބާރާތުގެ ފުރަތަމަ 3 ޕޮއިންޓް ހޯދީ މުބާރާތުގެ އެންމެފަހު ދެއަހަރުގެ ޗެމްޕިއަން އެފްސީ ބޭރުމަތިއެވެ. އެޓީމުން މިމެޗު ކާމިޔާބުކުރީ މާކަރީ ޔުނައިޓެޑުން ލަނޑެއް ޖަހައި ލީޑުގައި އޮއްވައި ފަހަތުން އަރައި ދެ ލަނޑު ޖަހައިގެންނެވެ. މެޗުގައި މާކަރީ ޔުނައިޓެޑުގެ ހަމައެކަނި ލަނޑު ޖަހައިދިނީ އެޓީމުގެ ޖާޒީ ނަމްބަރު 6 އަޙުމަދު ވިޝާލެވެ. މި މެޗުގެ ފުރަތަމަ ހާފު ނިމުނީ އެކެއް ސުމެއްގެ ނަތީޖާއިން މާކަރީ ޔުނައިޓެޑު ކުރީގައި އޮވެގެންނެވެ.
ދެވަނަ ހާފުގެ ކުރީކޮޅު އެފްސީ ބޭރުމަތީގެ ޖާޒީ ނަމްބަރު 8 އިބްރާހީމް އަސްވަދު ވަނީ އެޓީމުގެ ފުރަތަމަ ލަނޑު ޖަހައި ސުން ކަނޑުވާލައިފައެވެ. އެ ޓީމު މޮޅުވި ލަނޑު ޖަހައިދިނީ އެޓީމުގެ ޖާޒީ ނަމްބަރ 5 އިބްރާހީމް މުބީން އަޙުމަދު ރަޝީދެއެވެ. މި މެޗުގެ މޮޅު ކުޅުންތެރިއަކަށް ހޮވުނީ އިބްރާހީމް އަސްވަދެވެ.
މިރޭގެ ދެވަނަ މެޗުގައި ބައްދަލުކުރީ ފެދުއަށް ނިސްބަތްވާ ޓީމެއް ކަމަށްވާ ޔުނައިޓެޑް ފްރެންޑްސްއާއި ހިތަދޫ އެފްސީ ޒެފިއާއެވެ. މިމެޗު 4-2 ލަނޑުން ކާމިޔާބުކުރީ އެފްސީ ޒެފިއާއެވެ. މިމެޗުގެ ފުރަތަމަ ހާފު ނިމުނީ 1-1 ލަނޑުން ދެ ޓީމް އެއްވަރު ވެގެންނެވެ. ދެ ޓީމުން ވެސް އިތުރު ލަނޑުތައް ޖަހައިފައިވަނީ ފަހުހާފުގައެވެ.
ޔުނައިޓެޑް ފްރެންޑްސްގެ ދެ ލަނޑުގެ ތެރެއިން ފުރަތަމަ ލަނޑު އެޓީމަށް ކާމިޔާބު ކޮށްދިނީ އެޓީމުގެ ޖާޒީ ނަމްބަރ 20 އިބްރާހީމް މުޙައްމަދެވެ. ދެވަނަ ލަނޑު ޖަހައިދިނީ ޖާޒީ ނަމްބަރ 21 ޢަބްދުﷲ ޢިމްރާނެވެ. އެފްސީ ޒެފިއާގެ ލަޑުތައް ޖަހައިދީފައިވަނީ ޖާޒީ ނަމްބަރ 30 ޙަސަން ރާއިފް އަޙުމަދާއި، ޖާޒީ ނަމްބަރ 7 މުޙައްމަދު އާލިފް ފަހުމީއާއި، ޖާޒީ ނަމްބަރ 9 އިބްރާހީމް ސަޢީދާއި، ޖާޒީ ނަމްބަރ 10 ޙަސަން އިރުފާނެވެ.
މިމެޗުގެ މޭންއޮފްދަ މެޗަކަށް ހޮވިފައިވަނީ އެފްސީ ޒެފިއާގެ ޖާޒީ ނަމްބަރު 30 ޙަސަން ރާއިފް އަޙުމަދެވެ.
މި މި މުބާރާތުގެ ކުޅުން މާދަމާރޭ ވެސް އޮންނާނެއެވެ. މާދަމާރޭގެ ފުރަތަމަ މެޗުގައި ބައްދަލު ކުރާނީ މަރަދޫ ޒިލޯންއާއި މަރަދޫފޭދޫ އެފްސީ އަފިރިން އެވެ. މިމެޗު ފެށުމަށް ހަމަޖެހިފައިވަނީ 21:30 ގައެވެ. ދެވަނަ މެޗުގައި ބައްދަލުކުރާނީ ފްރެންޑްސް ކުލަބާއި މަލްޓި ޖީނިއަސް ސިޓީއެވެ. މިމެޗު ފަށާނީ 22:30 ގައެވެ.
Varah rangalhu article eh