ސަޢޫދީ ނޫސްވެރިޔާ ޚާޝުޤްޖީގެ ގަތުލާ ބެހޭ އޯޑިއޯ ޓޭޕެއް އޮތް ކަން އެނގިވަޑައިގަންނަވާ ކަމަށާއި އެ ޓޭޕްގެ އަޑު ނާއްސަވާނޭ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.
"އެއީ ވަރަށް ވަރުގަދަ ޓޭޕެއް. ވަރަށް ބިރުވެރި ޓޭޕެއް." އާދީއްތަ ދުވަހު ފޮކްސް ނިވްސްގެ ނޫސްވެރިއަކާއެކު ދެއްކެވި ވާހަކަފުޅެއްގައި ޓްރަމްޕް ވިދާޅުވިއެވެ.
ސީއައިއޭގެ އިސް ބޭފުޅުން ތުހުމަތު ކުރައްވާ ގޮތުގައި ޚާޝުޤްޖީ ގަތުލު ކޮށްފައި ވަނީ ސަޢޫދީ ވަލީ ޢަހްދު މުޙައްމަދު ބިން ސަލްމާންގެ އަމުރުފުޅަކަށެވެ. އެކަމަކު ވައިޓް ހައުސް އަކުން މި ވާހަކަ ގަބޫލެއް ނުކުރެއެވެ.
ސަޢޫދީ ސަރުކާރުން ވަނީ ސީއައިއޭގެ ތުހުމަތު ދޮގޮ ކޮށްފައެވެ. ސަރުކާރުން ބުނާ ގޮތުގައި އެ ޤަތުލަކު މުޙައްމަދު ބިން ސަލްމާންގެ އެއްވެސް ދައުރެއް ނެތެވެ.
ޓްރަމްޕް ވިދާޅުވާ ގޮތުގައި އޯޑިއޯ ޓޭޕާ ބެހޭ ހުރިހައި މައުލޫމާތެއް އޭނާއަށް ވަނީ ލިބިވަޑައިގެންފައެވެ.
ތުރުކީން ވަނީ މި އޯޑިއޯ ޓޭޕް އެމެރިކާއާއި ޔޫރަޕްގެ އިއްތިހާދުގެ ގައުމުތަކަށް ފޮނުވައިފައެވެ.
ޓްރަމްޕް ވިދާޅުވި ގޮތުގައި ޚާޝުޤްޖީގެ ގަތުލުގައި ބައިވެވަޑައިގަތުމެއް ނެތް ކަމުގެ ޔަަގީންކަން މުޙައްމަދު ބިން ސަލްމާން ވަނީ ދެއްވައިފައެވެ.
ޚާޝުޤްޖީ ގަތުލު ކުރީ ސީދާ ކާކުކަމެއް އަދިވެސް ނޭނގޭ ކަމަށް ޓްރަމްޕް ވިދާޅުވިއެވެ.
ޚާޝުޤްޖީ ގަތުކޮށްފައި ވަނީ މިދިޔަ މަހުގެ ތެރޭގައި ތުރުކީގައި ހުންނަ ސަޢޫދީ ސަފާރަތުޚާނާގައެވެ. މި ގަތުލަކީ ރާވައިގެން ހިންގި ޖަރީމާއެއް ކަމަށް ވަނީ ބެލެވިފައެވެ. އޭނާ ގަތުލު ކުރުމަށްޓަކައި ސަޢޫދީ ޢަރަބިއްޔާއިން 15 މީހަކު ތުރުކީއަށް ދިޔަ ކަމަށް ވަނީ ހެކިތަކުން ފެނިފައެވެ.
