(25 ނޮވެންބަރު 2022 ގައި ޝާއިއުކުރި ބަޔާ ގުޅޭ)
އެކުދިން ޑިގްރީ ނަގައިގެން އެތިބީ ، އެންމެ ތުއްތު އިރުއްސުރެ މިއޮށް ހުރިހާ ދުވަހު ، އެކުދިންގެ ބޭނުންތަކަށާއި ކިޔެވުމަށް އޭނާ އެކަނި ޚަރަދު ކޮށްގެން ނޫންކަމާއި އެކުދިން ، ޓިއުޝަންދީގެންނާއި ރެޔާއި ދުވާލު ބުރަ އެތައް މަސައްކަތެއްކޮށް ، ލާރި ހޯދައިގެންކަން ، މުރުތަޟާއަށް ، ރާފިޢާ ހަނދާންކޮށްދިނެވެ. އެހުރިހާކަމެއް ކުދިން އަމިއްލަޔަށް ބަލަހައްޓަމުން ދަނިކޮށް ، މުރުތަޟާގެ ގެއިން އެކުދިން ނެރެލުމުން ، މިހާރު އުޅޭ ގެޔަށް އައިސް ، ގޭގެ ކުލިވެސް ދައްކަމުން އެގެންދަނީ އެކުދިންވެސް ހޯދާ ފައިސާއިންކަން ހަނދާން ކޮށްދިނެވެ. އެހުރިހާކަމެއް އޭނާއާ އެނާގެ ކުދިން އަމިއްލަ މަސައްކަތުން ހަމަޖައްސަމުން އައިއިރު ، މިވީހާތަނަށް މުރުތަޟާ ދިއްކޮށްލި އެންމެ އަނާއެއްވެސް ނެތްކަމުގައި ބުނެ މުރުތަޟާ ލަދުގަންނުވައިލިއެވެ. ރާފިޢާ ނުބުނަންހުރި އެއްޗެހިވެސް އޭނާގެ ދުލުން ބޭރުވަމުން ދިޔައެވެ.
" މަސައްކަތްކޮށްގެން އަމިއްލަ މަސައްކަތުން ހޯދާ ފައިސާއިން ކިޔެވިއިރު ، ކައިވެނީގެ ޚަރަދުތައްވެސް އަމިއްލަޔަށް ހަމަޖައްސާށޭ އެކުދިންގާތު ބުނާށެވެ! އަހަރެންގެ އިޙްސާންތެރިކަން ޤަބޫލު ނުކުރެވޭއިރު ، އަހަރެންގާތު ކަންކަމު ކިޔުމުގެ ބޭނުމަކީ ކޮބައި ހެއްޔެވެ ؟ " މުރުތަޟާ ރާފިޢާއާ ދިމާއަށް އެއްޗެހި ކިޔައިގަތެވެ.
ލަދުވެތިކަމުގެ ކަންފުޅެއްވެސް ނުދައްކައި މުރުތަޟާގެ ދުލުން ބޭރުކުރަމުން ގެންދިޔަ ، އިހާނެތި ބަސްތަކުގެ އަޑުއިވި ، ކަޝަފް އިނީ ރޮވޭގޮތް ވެފައެވެ. އޭނާގެ ލޮލަށް ޖަމާވަމުންދިޔަ ކަރުނަތައް ބަންޑުންދާކަށް ގިނައިރެއް ނުނަގާނެއެވެ. އެހެންނަމަވެސް ދެއަތްތިލަ ބާރަށް ތަގުޅިކޮށްގެން ކެތްކޮށްލައިގެން އެއިނީ ހަމައެކަނި އޭނާގެ މަންމައަށް ޓަކައެވެ. ކުރީ ފަހަރަކުވެސް ، ބައްޕައާ ދިމާއަށް އެއްޗެހި ކިޔައިގަނެވުނީމަ މަންމަ އޮތީ ރޮއެ ރޮއެފައި އޭނާއަށް އަޑުލައިފައެވެ. އެއީ ކަޝަފް ބޭނުންވާ ކަމެއްނޫނެވެ.
" މުޅި ޢުމުރުގައިވެސް ، މުރުތަޟާގެ ފަރާތުން އަހަރެން އެއްވެސް ކަމަކަށް ނޭދެމެވެ. އެއްވެސް ކަމަކާ ހިތްހަމަ ނުޖެހިގެން ޝަކުވާއެއް ނުކުރަމެވެ. އެކަމަކު ، ބައްޕަ ކަމަށްވާތީ ، މުރުތަޟާގެވެސް ޒިންމާއެއް ކުދިންގެ މައްޗަށް އޮންނާނެ ނޫންހެއްޔެވެ؟ އެއީ ހަމައެކަނި އަހަރެންގެ ކުދިންނެއް ނޫނެވެ. މުރުތަޟާގެވެސް ކުދިންނެވެ.
އޭނާގެ ކުދިންގެ ވަރަށް ބޮޑެތި ޒިންމާތަކެއް އުފުއްލާފައިވާނެކަމުގައި މުރުތަޟާ ބުނެއެވެ. އަދި އެކަން މީހަކު ޤަބޫލުކުރުމާއި ނުކުރުމަކީ އޭނާއަށް ކަމެއް ކުރެވެން އޮތްކަމެއް ނޫންކަމުގައި ބުނެއެވެ. މުރުތަޟާއަށް ޤަބޫލުކުރެވޭގޮތުގައި ، ރާފިޢާއިން ހީކުރަނީ އޭނާ އަތުގައި ބޮޑު ޚަޒާނާއެއްގެ ތަޅުދަނޑި އޮތްކަމަށެވެ. އަދި ބޭނުން އިރަކު ބޭނުންވަރަކަށް ނަގައިގެން ޚަރަދު ކޮށްކޮށް ހުންނަންވީ ކަމަށެވެ. އޭނާއަށް މުސާރަ ލިބެނީ އެންމެ ތަނަކުންނެވެ. އެލިބޭ ލާރިކޮޅުންވެސް ދިރިއުޅުމުގެ ކަންކަން ހަމަޖައްސައިލެވެނީ ހަމަ ކިރިޔާއެވެ. އޭނާއަކީ ރާފިޢާއިން އެހީކުރާވަރަށް ރުފިޔާ ލިބޭ މީހެއްނޫނެވެ. މުރުތަޟާ އޭނާގެ މާލީ ޙާލަތު ބަޔާންކޮށްދީ ނިމުނު އިރު ރާފިޢާމެންނަށްވުރެވެސް ޙާލު ދެރައެވެ. ރާފިޢާއަށް އެހެން އެއްވެސް ގޮތެއް އޮތްނަމަ ، މުރުތަޟާގާތު ، ޞިދްރާގެ ކައިވެންޏަށް ޚަރަދެއްކުރުމުގެ ވާހަކައެއް ނުދައްކާނެއެވެ. އެކަން ޚުދު މުރުތަޟާއަށްވެސް އެނގޭނެއެވެ. އެހެންނަމަވެސް ، މުރުތަޟާ އުފުއްލިކަމަށް އެބުނާ ބޮޑު ޒިންމާގެ މަތިން ހަނދާންކޮށްލުމަށްޓަކައި ، ރާފިޢާމެންނަށް ކޮށްދިން ކަމެއް އޭނާގެ ހަނދާނަކަށް ނާދެއެވެ. މުރުތަޟާ އެއްވެސް އެއްޗެއް ނުދިނަސް އަމިއްލަޔަށް ހުރިހާ ކަމެއް ހަމަޖައްސަން ރާފިޢާ ނިންމިއެވެ. ފައިސާ ނެތިއްޔާ ، މިހާރު ކައިވެނި ނުކޮށް ، ފައިސާ ލިބުނީމަ ކައިވެނިކުރަން މަޑުކުރުން އެއީ ، އެދެކެވުނު ވާހަކަތަކުން މުރުތަޟާއަށް ފެނުނު ނަތީޖާއެވެ. ރާފިޢާ އެންމެ ފިރިހެންދަރިޔެއް ވިހޭނަމަވެސް ، އޭނާ ހުރީހީ ރާފިޢާއާ އެކީގައިކަމަށް މުރުތަޟާ ބުނެއެވެ. އެކަމަކު އެކަމެއް ރާފިޢާއަކަށް ނުވިއެވެ. މުރުތަޟާގެ ވިސްނުމުގައި ބޭނުން ޖިންސަކުން ކުދިން ވިހަން ، ރާފިޢާ އަކީ ކުދިންވިހާ މެޝިނަކަށް ހަދައިލިއެވެ. އެހެންނަމަވެސް ، އޭނާގެ ދަރިފުޅުގެ ޙަޔާތައް އެލިބުނު އަލިކަން ނިއްވައި ލެވިދާނެ އެއްވެސް ހުރަހެއް ކުރިމަތިވާކަށް ރާފިޢާއެއް ނޭދެއެވެ.
އެއްވެސްކަމެއްގައި އެއްވެސް މިންވަރަކަށް ބައްޕަ އެހީނުވާއިރު ، އިރުއިރުކޮޅުން ބައްޕަގެނެސްގެން މަންމަ ވާހަކަ ދައްކާތީ ، ކަޝަފް ހިތްހަމަ ނުޖެހިފައިހުރެ ރާފިޢާ އާ ސުއާލު ކުރިއެވެ. ކައިވެނި ކަހަލަ ދިރިއުޅުމާ ގުޅިފައި ހުންނަ ކަންކަމަކީ ، ބައްޕަޔަކާ ނުލައި ނިންމެން އޮންނަ ކަންކަން ނޫންކަން ، ރާފިޢާ އޭނާގެ ދަރިފުޅަށް ވިސްނައިދިނެވެ.
" މަންމަ އޭނާގެ ކިބައިން ލަފާވެސް އަހައިފީމުއެވެ. އެހީއަށްވެސް އެދިއްޖައީމުއެވެ. ޙާޞިލްވީ ކޮންކަމެއް ހެއްޔެވެ ؟ " ކަޝަފް އޭނާގެ މަންމަ އާ ސުއާލުކުރިއެވެ.
ކުދިން ކޮންމެ އެއްޗެކޭ ހީކުރިނަމަވެސް ، މުރުތަޟާ ފިޔަވައި އެކަހަލަ ވާހަކައެއް ދައްކާލައި އެހީއަކަށް އެދޭނެ އެހެން މީހަކު ، ރާފިޢާގެ ނެތެވެ. ކަމެއް ކޮށްދިނަސް ، ނުދިނަސް އެއީ އޭނާގެ ކުދިންގެ ބައްޕައެވެ. ހެޔޮ ހިތެއް ޖައްސަވައިގެން ފަހަރެއްގައި ކަމެއްކޮށްދީފިއްޔާ އެކަން އެވީއެވެ. ނުބުނުމަށްވުރެ ، ބުނުމުން ލިބިދާނެ ފައިދާ ބޮޑެވެ. އެކަމާމެދު ކަންބޮޑުވެގެންގޮސް ރާފިޢާ ހުރީ ހަދާނެގޮތް ބޮޑުވެފައެވެ. ކަޝަފް އޭނާގެ މަންމަ ހަމަޖައްސައިލުމަށްޓަކައި ވާހަކަ ދައްކަމުން ގެންދިޔައެވެ. އަދި ކަޝަފް ނިންމައިގެންހުރިގޮތް ސާފުކޮށްދިނެވެ. އެއަހަރު ، އޭނާ ސީ އައި އެސް އިމްތިޙާނުގައި ބައިވެރިއެއް ނުވާނެއެވެ. އޭގެ ބަދަލުގައި ވަޒީފާއެއް އަދާކުރާނީއެވެ. އަދި ކަންކަން ހަމަޖެހުނީމަ ދެން އަންނަ އަހަރު ސީ އައި އެސް ހަދާނީއެވެ. މަންމަ ، ޞިދްރާގެ ކައިވެނީގެ ކަންކަން ކުރިޔަށް ގެންދިއުމަށް ކަޝަފް އެދުނެވެ. ފައިސާގެ އިންތިޒާމް އޭނާ ހަމަޖައްސާނެއެވެ. އިރާދަ ކުރެއްވިއްޔާ ކޮންމެވެސް ގޮތެއް ފެންނާނެއެވެ.
މަންމަ ހަމަޖައްސާލާފައި ކޮޓަރިޔަށް ދިއުމުން ، ފަހަތުން ޞިދްރާ ގޮސް ވަދެއެވެ. އަދި ޞިދްރާގެ ކައިވެނި ކުރިޔަށް ނުގެންދާން މަންމަ ގާތު ބުނުމަށް އެދެއެވެ. އޭނާ އެކައިވެންޏެއް ނުކުރާނެއެވެ. މަންމައާއި ކަޝަފަށް ތަކުލީފެއް ލިބޭނެ ގޮތަކަށް އޭނާގެ ކައިވެނިވާކަށް ޞިދްރާއެއް ނޭދެއެވެ. ކަޝަފް ވިސްނާ ގޮތުގައި އެއީ އެއްވެސް މީހަކަށް ލިބޭ ތަކުލީފެއް ނޫނެވެ. އެހެންނަމަވެސް ، މަންމައާއި ކަޝަފް ބުރަމަސައްކަތް ކޮށްގެންނާއި ދަރަންޏަށް ހޯދާ ފައިސާއިން އޭނާގެ ކައިވެނީގެ ކަންކަން ހަމަޖެހިގެންދާކަށް ޞިދްރާ ބޭނުމެއް ނޫނެވެ. ޞިދްރާއާ ހުރެ ، ކަޝަފްގެ ކިޔެވުން ހުއްޓާލައި ވަޒީފާ އަދާކުރާކަށް ޞިދްރާއެއް ނޭދެއެވެ. މިއަހަރަކީ ކަޝަފް ސީ އައި އެސް ހަދަންޖެހޭ އަހަރެވެ. އެ ކޯސް ނުހަދައި އޭނާގެ ކައިވެންޏަށްޓަކައި ކަޝަފް ، އެކަން ޤުރުބާންކުރުން އެއީ ޞިދްރާއަށް ހިތްހަމަ ޖައްސައި ލެވޭނެކަމެއް ނޫނެވެ. އެކަމަކު ، ކައިވެނީގެ އެ ހުށަހެޅުމަކީ އެހާ ރަނގަޅު ހުށަހެޅުކަމަށް ވާއިރު ، އެންމެ ކުއްޖެއްގެ ކައިވެނިވެސް ކާމިޔާބުގޮތަކަށް ނިމުމުން މަންމަގެ ހިތަށް ލިބޭނެ ހަމަޖެހުން ޞިދްރާއަށް ވިސްނައިދެވޭތޯ ކަޝަފް މަސައްކަތް ކުރިއެވެ. ސީ އައި އެސް އަކީ ދެން އަންނަ އަހަރަކުން ، އެއަހަރު ނުވިއްޔާ އޭގެފަހުން އަންނަ އަހަރަކުން ބައިވެރި ވެވިދާނެ އެއްޗެކެވެ. އެއީ ކަޝަފްގެ ވިސްނުން ހުރި ގޮތެވެ. ޞިދްރާ ވިސްނާ ގޮތުގައި ، ހަމަ އެގޮތަށް ޞިދްރާގެ ކައިވެނިވެސް ލަސް ކުރެވިދާނެއެވެ. އެކަމަކު އެއީ ޞިދްރާގެ ބޮލުގެ ރިހުމަކަށް ނުހެދުމަށް ކަޝަފް އޭނާގެ ކޮއްކޮގެ ކިބައިން އެދެއެވެ. ކަޝަފް އެހެން ބުނިނަމަވެސް ، އެއީ އޭނާގެ ބޮލުރިހުމަކަށް ނުވާނެ ގޮތެއް ޞިދްރާއަކަށް ނުވިސްނެއެވެ. ޞިދްރާއަށް ހުރީ ރޮވިފައެވެ. ބައްޕަހެން އެއްވެސްކަމެއް ނުފެންކަމަށް ހަދަން ، މޫނުބަނދެގެން ހުންނާކަށް ޞިދްރާ ބޭނުމެއް ނޫނެވެ. ބައްޕަ އެހަދަނީކީ އެއްވެސް ކުއްޖެއްގެ ބަފަޔަކު ހަދާނެ ގޮތެއް ނޫނެވެ. ފަހަރެއްގައި ބަފަޔެއްގެ އައު މިސާލެއް މުރުތަޟާގެ ފަރާތުން ދުނިޔެއަށް ދައްކަނީކަމުގައި ވެދާނެކަމަށް ކަޝަފް ބުނެއެވެ.
ޞިދްރާއަށް ރޮވެމުން ރޮވެމުންގޮސް ދެއްކުނީ ކޮންވާހަކައެއްކަންވެސް ހަނދާން ނެތޭވަރު ވިއެވެ. އޭނާ ދުނިޔެއަށް އުފަން ކުރުވީ ކީއްވެގެންތޯ ބައްޕަ ކައިރިޔަށްގޮސް ސުއާލުކުރާނަމޭ ޞިދްރާގެ ހިތަށް އެރިއެވެ. އަދި އަންހެން ކުއްޖެއްގެ ގޮތުގައި އުފަންވުމުން ، އެހާ ރުޅިއަންނަމަ ނަމަ ދުނިޔެއިން ނައްތައިނުލީ ކީއްވެގެންތޯވެސް ސުއާލުކުރަން ހިތަށް އެރިއެވެ. އެކުދިން އެވަނީ ބައްޕައެއްގެ އަޅައިލުމެއްނެތި ، ދުނިޔޭގައި ގަނަތެޅެންޖެހި މާކުރިން މަރުވެފައެވެ. މަޔެއްގެ ލޯބިނެތްނަމަ އެކުދިން މިހާރު ތިބޭނީ ވަޅުލައިފައެވެ. ކަޝަފް އޭނާގެ ކޮއްކޮގެ މޫނަށް ބަލައިލައި ހިތުގައިވާ އުދާސްތައް ދުރުކޮށްދެވޭތޯ މަސައްކަތް ކުރަމުން ގެންދިޔައެވެ. އަދި ޞިދްރާގެ މޫނުމައްޗަށް ވެއްޓިފައިވާ އިސްތަށިތައް ނަގައި ފަހަތަށް އެއްލައި ކޮއްކޮގެ މޫނުގައި ފިރުމައިލިއެވެ.
------------------------
ވަޒީފާއަކާ ބެހޭގޮތުން ، ކަޝަފް ވަނީ ސާރ އަބްރާރާ ވާހަކަ ދައްކާފައެވެ. އަދި އަބްރާރް ބުނެފަ އޮތްގޮތަށް އޭނާގެ ސީވީ ތައްޔާރުކޮށްގެން ގޮސް އަބްރާރާ ޙަވާލު ކުރިއެވެ. ލިޔުންތަކަށް ބަލައިލުމަށްފަހު ، އެއީ ވަރަށް ފުރިހަމަ ސީވީއެއްކަމަށް އަބްރާރު ބުނެއެވެ. އަދި ވަޒީފާއަކާ ބެހޭގޮތުން އެއްވެސް ވަރަކަށް ފިކުރު ބޮޑުނުކުރުމަށް ކަޝަފަށް ނަޞޭޙަތްތެރި ވިއެވެ. އިރާދަ ކުރެއްވިއްޔާ ، ހަފުތާއެއްހާ ދުވަހުގެ ތެރޭގައި ކަޝަފްގެ ވަޒީފާ ހަމަޖެހިގެންދާނެކަމުގެ އުފައުވެރި ޚަބަރު އަބްރާރު ދިނެވެ. ކަޝަފްގެ ސީވީ ބަލާފައި ކޮންމެ މީހަކުވެސް ، އުފަލުން ވަޒީފާދޭނެކަމުގައި އަބްރާރް ބުންޏެވެ. ސީވީއާއެކު އެއްވެސް ފަރާތަކުން ކަޝަފާމެދު ދެކޭގޮތުގެ ލިޔުމެއް ހިމެނިފައިނުވާތީ އެކަމާ ކަޝަފް ހުރީ ކަންބޮޑުވެފައެވެ. އެކަންވެސް ހަމަޖައްސައިދޭނެކަމަށް އަބްރާރް ބުނެއެވެ.
އެދުވަހުގެ މެންދުރުފަސްވީ އިރުވެސް ކަޝަފް ހުރީ އެއްވެސް އެއްޗެއް ނުކައެވެ. އެއްޗެއް ކައިފިންތޯ އަބްރާރް ސުއާލުކުރުމުން ، ބަނޑުހައި ނުވާކަމުގައި ކަޝަފް ބުންޏެވެ. ހަމައެއާއެކު ، ޅެންބައިތެއް ކިޔައިލުމަށްފަހު ، ކަޝަފް ދާންވާނީ އޭނާއާއެކު މެންދުރު ކައިގެންކަމުގައި އަބްރާރު ބުންޏެވެ. އާނއެކޭ ބުނަން ނުކެރި އެތައް އިރަކު ލަދުން އިނދެފައި ، އެންމެ ފަހުން ކަޝަފް އެކަމަށް އެއްބަސް ވިއެވެ.
އަބްރާރް ސާރ އާއެކު މެންދުރުގެ ކެއުމަށްފަހު ، ކަޝަފް ގެޔަށް ދިޔައިރު ހުރީ ވަރަށް ހަމަ ޖެހިފައެވެ. އޭނާގެ މޫނުމަތިން އުއްމީދުގެ އަލިކަން ފުރަތަމަ ފަހަރަށް ފެނިލިއެވެ. އެ މޫނުގެ އުޖާލާކަމަށްވަނީ ދިރުން ލިބިފައެވެ. ލޮލުގެ އަލިކަމަށް ދިރުމެއްވަނީ ލިބިފައެވެ. އޭނާގެ ޙަރަކާތްތަކުގައިވަނީ ، އިތުރު ބާރެއް އެކުލެވިފައެވެ. ރޫޙަށްވަނީ ދިރުން ލިބިފައެވެ. ދިޔަގޮތަށްގޮސް ފުރަތަމަވެސް ނެގީ އޭނާގެ ޑައިރީއެވެ. އެ ޑައިރީގައި ލިޔާނެ އެތައް އެއްޗެއް އޭނާގެ ހިތުގައި އެދުވަހު އެބަ އެނބުރެއެވެ.
ކަޝަފްގެ ދިރިއުޅުމުގައި ކުރިމަތިލާންޖެހުނު ގޮންޖެހުންތަކުގައި އެތައް ފަހަރަކު އޭނާވަނީ ، އޭނާގެ އަމިއްލަ ގޮތް ދޫކޮށް އެހެންމީހުންނަށް ފުރުޞަތު ދީފައެވެ. އަދި އެތައް ޤުރުބާނީތަކެއްވަނީ ވެފައެވެ. އެހާތަނަށް ކަޝަފަށް ޤަބޫލުކުރެވިފައި އޮތް ގޮތުގައި އޭނާގެ ޢާއިލާގެ ދިރިއުޅުމަށް އެއީ ހަމައެކަނި ނަމެކެވެ. އެދިރިއުޅުމުގައި ދިރުމެއް ، އުއްމީދެއް ނެތެވެ. ކުޑަކުޑަ އުފަލަކަށްޓަކައިވެސް އަދި ދިރިހުރިކަމުގެ ހަނދާނަކަށްޓަކައިވެސް ، ހާދަބުރަ މަސައްކަތްތަކެއް ކުރަން ޖެހެއެވެ. ކަޝަފްމެންގެ ދިރިއުޅުން އެހާ ދަތިކޮށް ﷲ ތަޢާލާ ދައްކަވާފައި އެވަނީ ކީއްވެގެން ބާވައޭ ކަޝަފްގެ ހިތަށް އަރައެވެ. ނިކަމެތިކަމުގެވެސް އިންތިހާއެވެ. ދުނިޔެއަށް އުފަންވުމަށް މެދުވެރިވި ބައްޕަގެ ރަޙުމުގެ ކަންފުޅެއްވެސް އެއިން ކުއްޖެއްގެ މައްޗަކަށް ނުވެއެވެ. ކަޝަފްގެ މިޚިޔާލަކީ އެތައްފަހަރަކު ކަޝަފްގެ ހިތުގައި އުފެދި ޖަވާބެއް ނުލިބި އޮތް ސުއާލެކެވެ. އެހެންނަމަވެސް އެއްވެސް ދިމާލަކުން އޭނާއަށް އެސުއާލުގެ ޖަވާބެއް ނުލިބެއެވެ.
------------------------
ޒަރޫންމެންގެ ކާމޭޒުމައްޗެވެ. ހަވީރުގެ ސައިގަޑީގައި ޒަރޫން އޭނާގެ މަންމަ އާއި ބައްޕައާއެކު ސަޔަށް އިންސާފު ކުރަމުން ގެންދިޔައެވެ. ސައިބޯން ހަމަފެށިތަނާ ޖުނައިދުގެ ފޯނުގެ ރަނގަބީލުވާން ފެށިއެވެ. އެއީ އަބްރާރެވެ. ޖުނައިދާ ، އަބްރާރް ގުޅީ ކަޝަފަށް ލިޔުމެއް ހޯދުމަށްޓަކައެވެ. އެކަން ހަމަޖައްސައިދޭނެކަމަށް ޖުނައިދު ބުނެއެވެ. ފޯނު ބޭއްވުމަށްފަހު ، އަބްރާރު އެގުޅީ އޭނާގެ ދަރިވަރަކަށް ވަޒީފާއެއް ހޯދައިދިނުމާ ބެހޭގޮތުންކަމުގައި ޖުނައިދު ބުނެއެވެ. އެހެންނަމަވެސް އެއީ ކޮން ނަމެއްކިޔާ ކުއްޖެއްކަމެއް އަބްރާރް ނުބުނެއެވެ.
އަބްރާރް ސާރ ލަފާދިންގޮތުގެމަތިން ، ކަޝަފް ދާން ބުނި އޮފީހަށް ވަޒީފާއާ ބެހޭ ވާހަކަ ދައްކާލަން ކަޝަފް ޒިޔާރަތް ކުރިއެވެ. ކަޝްފްގެ ސީވީ ބެލުމަށްފަހު ، ކުންފުނީގެ ފަރާތުން ކަޝަފްގެ ވަޒީފާ ކަށަވަރުކޮށްދިންކަން ، ކަޝަފްގެ މޫނުމަތިން ފެނުނު އުފާވެރިކަމުގެ ހިނިތުންވުމުން އެކަނިވެސް ޔަޤީން ކުރެވެއެވެ.
ގެޔަށްގޮސް މަންމަޔާ އެވާހަކަ ދައްކަމުން ދިޔައިރުވެސް ކަޝަފް އިނީ އުފަލުން ފޮޅިފައެވެ. އެއީ ވަރަށް ރަނގަޅު ވަޒީފާ އެކެވެ. ފަންސާސް ލައްކަ ރުފިޔާގެ ޕެކޭޖެއް އެވަޒީފާއަށް ލިބެއެވެ. އޭގެ އިތުރަށް ބޯނަސްވެސް ލިބެއެވެ. ރާފިޢާވެސް އެ އުފާވެރި ޚަބަރު އަހާފައި އުފަލުންގޮސް ރޮވުނެވެ. ﷲ އަށް ޝުކުރު އަދާކުރިއެވެ. އެއީ އޭނާއަށް ހާދަ އުފާވެރި ޚަބަރެކެވެ. މުޅި ދުވަސް އުޖާލާވެގެން ދިޔައެވެ. އެވަޒީފާ ކަޝަފަށް ހޯދައިދިނުމުގައި ސާރ އަބްރާރް އޭނާއަށް ވަރަށް ބޮޑަށް އެހީތެރިވެދިން ކަމުގައި ކަޝަފް އޭނާގެ މަންމަ ގާތު ބުނެއެވެ. ކަޝަފަށް ބޭނުންވާ ، ޙަވާލާދޭ ސިޓީ ހޯދައިދިނީ ސާރ އަބްރާރެވެ. އެހެން ނޫންނަމަ އެހާ ފަސޭހައިން ވަޒީފާއެއް ނުލިބޭނެއެވެ.
(ނުނިމޭ)
