ރޯދަމަހު ގޭބިސީތަކުން ކުނި ނަގާ ގަޑިތަކަށް ބަދަލުތަކެއް ގެންނަން ނިންމާފައިވާ ކަމަށް ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން ބުނެފިއެވެ.
އެ ކުންފުނިން ކުރި އިޢުލާނެއްގައި ބުނެފައިވަނީ ކުރިއަށް އޮތް ރޯދަމަހު ގޭބިސީތަކުން ކުނި ނެގުމަށް ހަމަޖެހިފައިވަނީ ރޭގަނޑު އަށަކުން މެންދަމު ބާރައަށް ކަމަށެވެ.
ވޭސްޓް ޓްރާންސްފަރ ސްޓޭޝަންގެ ޚިދުމަތް ހުކުރު ދުވަސް ފިޔަވައި ކޮންމެ ދުވަހަކު ހެނދުނު ނުވަޔަކުން ހަވީރު ފަހަކަށް އަދި ރޭގަނޑު އަށަކުން ދަންވަރު އެކެއް ޖަހަންދެން ލިބޭނެ ކަމަށް ވެސް ވެމްކޯއިން ބުންޏެވެ.
ވެމްކޯއިން ބުނީ ހުކުރު ދުވަހު މެންދުރުފަހު ދޭކުން ހަވީރު ފަހަކަށް އަދި ރޭގަނޑު އަށަކުން ދަންވަރު އެކެއް ޖަހަންދެން ވޭސްޓް ޓްރާންސްފަރ ސްޓޭޝަންގެ ޚިދުމަތް ލިބޭނެ ކަމަށެވެ.
އެ ކުންފުނިން ބުނީ ކޮމަރޝަލް ކަލެކްޝަން ހުކުރު ދުވަސް ފިޔަވައި އެހެން ދުވަސްތަކުގައި ކުރިއަށް ގެންދާނީ ހެނދުނު ނުވަޔަކުން ހަވީރު ހަތަރަކަށް އަދި ރޭގަނޑު ދިހަޔަކުން ފަތިހު ހަތަރެއް ޖެހުމާއި ހަމައަށް ކަމަށެވެ. ހުކުރު ދުވަހު ކުނި ނަގާނީ މެންދުރުފަހު 2:00 އިން ހަވީރު 5:00 އަށް އަދި ރޭގަނޑު 10:00 އިން ފަތިހު 4:00 އަށް ކަމަށް ވެސް ވެމްކޯއިން ބުނެއެވެ.
ރޯދަމަހު މާލެ ސަރަހައްދުގައި ކޯލް އެންޑް ޕިކް-އަޕް ސަރވިސް ގެ ޚިދުމަތް ދޭނީ ހެނދުނު 9:00 އިން ހަވީރު 4:00 އަށް އަދި ރޭގަނޑު 8:00 އިން ދަންވަރު 1:00 އަށް ކަމަށެވެ. މި ޚިދުމަތް ހުކުރު ދުވަހު މެންދުރުފަހު 2:00 އިން ހަވީރު 5:00 އަށް އަދި ރޭގަނޑު 8:00 އިން ދަންވަރު 1:00 އަށް ލިބޭނޭ ކަމަށް ވެސް ވެމްކޯ އިން ބުންޏެވެ.
ވެމްކޯގެ މައި އޮފީސް ހުޅުވާފައި ހުންނާނީ އާދީއްތަ އިން ބުރާސްފައްޗަށް ކޮންމެ ދުވަހަކު ވެސް ހެނދުނު 9:00 އިން މެންދުރުފަހު 1:00 އަށް ކަމަށާއި ކޯލް ސެންޓަރުގެ ޚިދުމަތް ހުކުރުދުވަސް ފިޔަވައި ކޮންމެ ދުވަހަކުވެސް ހެނދުނު 9:00 އިން މެންދުރުފަހު 2:00 އަށް އަދި ރޭގަނޑު 9:00 އިން 00:00 އަށް ދެވޭނޭ ކަމަށް ވެމްކޯއިން ބުނެއެވެ. އަދި ހުކުރު ދުވަހު ކޯލް ސެންޓަރުގެ ޚިދުމަތް ދެވޭނީ ރޭގަނޑު 9:00 އިން 00:00 އަށް ކަމަށް ވެމްކޯއިން ބުނެއެވެ.
އޭގެ އިތުރުން، ރޯދަ މަހު މަގުމަތި ފޮޅައި ސާފުކުރާނީ ރޭގަނޑު 9:00 އިން ދަންވަރު 3:00 އަށް ކަމަށް ވެސް ވެމްކޯއިން ބުނެއެވެ.
