ބަންގްލާދޭޝްގައި ކާބޯތަކެތި އުފައްދާ ކާރުޚާނާއެއްގައި ރޯވި ބޮޑު އަލިފާންގަނޑެއްގަައި 52 މީހުން މަރުވެއްޖެއެވެ. ވެރިރަށް ޑާކާގެ އިރުން 25 ކިލޯމީޓަރު ދުރުގައި އޮންނަ ނާރަޔަންގަންޖްގެ ރޫޕްގަންޖް އަވަށުގައި ހުންނަ ފެކްޓަރީގައި ރޯވި އެ އަލިފާންގަނޑުގެ ތެރޭގައި ފިިހިގެން ގިނަ ބަޔަކު މަރުވި އިރު، އެއްބަޔަކު ވަޖީ ސަލާމަތްވާން ކުޑަދޮރުތަކުން ފުންމާލާފައެވެ.
ޚަބަރުތައް ބުނާގޮތުގައި ބުރާސްފަތި ދުވަހު ހަވީރު ރޯވި އަލިފާންގަނޑު 24 ގަޑިއިރު ފަހުން، މިއަދު ހަވީރުވެސް ހުރީ އަނދައަނދައެވެ. އަލިފާންނިވާ 19 މީހުންގެ މަސައްކަތުން މިއަދު ހަވީރު 5:30 (ރާއްޖޭ ގަޑިން 5:00) ގައި ޝީޒާން ޖޫސް އުފައްދާ ހާޝިމް ފުޑް އެންޑް ބެވަރެޖް ފެކްޓަރީގައި ރޯވި ބިޔަ އަލިފާންގަނޑު ނިވާލެވުނުއިރު، އަނދައި ދެއްޔަށް ވެފައިވާ 49 ހަށިގަނޑު ވަނީ އެތަނުން ނެރެވިފައެވެ. އޭރުވެސް އިމާރާތުގެ 5 ވަނަ ފަންގިފިލާއިން ދުންއަރަމުން ދެއެެވެ.
އެކިވަރުގެ އަނިޔާއާއެކު 30 މީހުން ސަލާމަތްވިއިރު، އެއްވެފައި ތިބި ގިނަ އާއިލާތަކަކުން ތިބީ އެމީހުންގެ ގާތްތިމާގެ މީހުންގެ ޚަބަރެއް ވޭތޯ އިންތިޒާރުގައެވެ. ސަލާމަތްވި ގިނަ މީހުންނަކީ ފުރާނަ ސަލާމަތްކުރަން ވެގެން ފުންމާލި މީހުންނެވެ. ފުންމާލި މީހުންގެ ތެރޭން 3 މީހަކު ވަނީ މަރުވެފައެވެ.
"އަދިވެސް ގިނަ ބަޔަކު މަރުވެފައިި ވެދާނެ ކަމުގެ ކަންބޮޑުވުން އެބައޮތް. މީހުން ހޯދައި ސަލާމަތްކުރުމުގެ މަސައްކަތް ފެށިގެން މިހާރު ކުރިއަށް ދަނީ." ފަޔާ ސާވިސް އެންޑް ސިވިލް ޑިފެންސް (ޑާކާ ރީޖަން) ގެ ޑެޕިއުޓީ ޑިރެކްޓަރު ދެބާޝިޝް ބަރްދާން ވިދާޅުވިއެވެ.
އޭނާ އިތުރަށް ވިދާޅުވި ގޮތުގައި ފެކްޓަރީން ނެރެވުނު ހަށިތައް ވަނީ ކޮންބަޔަކުކަން ނޭނގޭ ވަރަށް އަނދައިގެން ގޮސްފައިއެވެ. އަދި އާއިލާތަކާ ހަށިތައް ހަވާލުކުރެވޭނީ ޑީއެންއޭ ޓެސްޓު ހަދައިގެން ކޮންބައެއްކަން އެނގުމުންނެވެ.
ޑާކާ ފަޔާ ޑިޕާޓްމަންޓްގެ ވެރިޔާ ދީނޫ މޯނީ ޝަރްމާ ވިދާޅުވިގޮތުގައި ފެކްޓަރީގައި އަލިފާން ރޯވީ ފަސޭހައިން އަލިފާން ހިފާ ގިނައަދަދެއްގެ ކެމިކަލް އެތަނުގެ ތެރޭގައި ރައްކާކޮށްފައި ހުރުމުގެ ސަބަބުންނެވެ.
"ތިންވަނަ ފަންގިފިލާއިން ފައިބަން ހުރި ދެ ސިޑީގެ ދޮރުވެސް ހުރީ ބަންދުކޮށްފައި. އެއްބަޔަކު އެބަބުނޭ އެތަނުގައި 49 މީހުން ތާށިވެފައި އެބަތިއްބޭ. އަަހަރެންނަކަށް ނޭނގޭ އެމީހުންނަށް ވީގޮތެއް." ސަލާމަތްވި މީހަކު ކިޔައިދިނެވެ. ފެކްޓަރީގައި މަސައްކަތްކުރާ އެހެން މީހަކު ބުނިގޮތުގައި އެންމެ ތިރީ ބައިގައި ރޯވުމުން ގިނަ ބަޔަކު ސަލާމަތްވާން އެރީ ފެކްޓަރީގެ ޓެރެސް މައްޗަށެވެ. މުޅި ފެކްޓަރީގައި އަލިފާން ހިފީ އޭގެފަހުންނެވެ.
މިނިސްޓަރ އޮފް ސްޓޭޓް ފޯ ލޭބާ އެންޑް އެމްޕްލޯއިމަންޓް ބޭގަން މޮންނޫޖާން ސޫފިޔާން ވިދާޅުވި ގޮތުގައި ވާކާސް ވެލެފައާ ފައުންޑޭޝަން ފަންޑުން މި ހާދިސާގައި މަރުވި މީހުންގެ އާއިލާތަކަށް އެހީވެދޭނެއެވެ. އަދި އަނިޔާވި މީހުންނަށްވެސް އެހީވުމަށް ވަނީ ނިންމާފައެވެ.
ބަންގްލާދޭޝްގައި އިމާރާތްތަކުގެ ސަލާމަތީ ކަންކަން ދޯދިޔާވުމުގެ ސަބަބުން އަލިފާން ރޯވުމަކީ އާއްމު ކަމެކެވެ. ފާއިތުވި ފެބުރުވަރީ މަހު ޑާކާގެ އެޕާޓްމަންްޓް އިމާރާތެއްގަައި އަލިފާން ރޯވުމުގެ ސަބަބުން 70 މީހަކު ވަނީ މަރުވެފައެވެ.
