އެމެރިކާގައި އާއްމު ތަންތަނުގައި މީހުންގެ ގަޔަށް ބަޑިޖަހައި މެރުމުގެ ހާދިސާތައް އިންތިހާއަށް އިތުރުވަމުން ދާއިރު، ފާއިތު އެއް މަހުގެ ތެރޭގައި ގަައުމުގައި އާއްމު ތަންތަނުގައި ބަޑިޖެހުމުގެ 45 ހާދިސާ ހިނގާފައި ވެއެވެ.
ބަޑި ބޭނުންކޮށްގެން ހިންގާ ނުރައްކާތެރި އަމަލުތަކުގެ ރިކޯޑް ބަލަހައްޓާ، ގަން ވަޔަލެންސް އެކްޝަން (ޖީވީއޭ) ގެ ރިޕޯޓެއްގައި ހާމަކޮށްފައިވާ ގޮތުގައި މި ބަޑިޖެހުމުގެ ހާދިސާތަކުގައި 72 މީހުން މަރުވެ 100 އަށްވުރެ ގިނަ މީހުން ޒަޚަމްވެފައި ވެއެވެ. މިއާއެކު މިއަހަރު ފެށުނު ފަހުން ހިނގާފައިވާ މިފަދަ ބަޑިޖެހުމުގެ ހާދިސާތައް ވަނީ 120 އަށް އަރާފައެެވެ.
މާރިޗު މަހުގެ 16 ވަނަ ދުވަހު އެޓްލާންޓާ ސަރަހައްދުގެ 3 ސްޕާއެއްގައި ބަޑިޖަހައި 8 މީހުން މަރާލި ހާދިސާއިން ފެށުނު މި މައްސަރު ނިމިފައި ވަނީ މި އެޕްރީލް މަހުގެ 15 ވީ ބުރާސްފަތި ދުވަހު އިންޑިޔާނާޕޮލިސްގެ ފެޑްއެކްސް ފެސިލިޓީއެއްގައި ތިބި މީހުންގެ ގަޔަށް ބަޑިޖަހައި 8 މީހުން މަރާލި ހާދިސާއިންނެވެ.
އާއްމު ތަންތަނުގައި ބަޑިޖަހައި އާއްމުން މެރުުމުގެ ހާދިސާތަކުގެ އިތުރަށް، އެހެން ގޮތްގޮތުން ދިން ބަޑީގެ ހަމަލާތަކުގައި މިއަހަރުގެ ފުރަތަމަ 3 މަސްދުވަހު އެމެރިކާގައި 4500 އަށް ވުރެ ގިނަ މީހުން މަރުވެ، 8100 އަށްވުރެ ގިނަ މީހުން ޒަޚަމްވެފައި ވެއެވެ. 200 އަށްވެރު ގިނަ ކުޑަކުދިންގެ ބަޑިޖަހާފައި ވެއެވެ.
އެެމެރިކާގައި ބަޑި ގެންގުޅުން ކޮންޓުރޯލުކުރަން ކުރެވޭ މަސައްކަތަށް އެންމެ ބޮޑު ހުރަހެއް ކުރިމަތި ކުރަނީ ބަޑިގެންގުޅޭ މީހުންގެ ބާރުގަދަ ޖަމްއިއްޔާއިންނެވެ. ޚާއްސަކޮށް ރިޕަބްލިކަން ޕާޓީގެ މައްޗަށް މިޖަމްއިއްޔާގެ ނުފޫޒުގަދައެވެ.
އިތުރުވަމުންދާ ބަޑިޖެހުމުގެ ހާދިސާތަކަކީ އެމެރިކާއަށް ކުރިމަތިވެފައިވާ ބޮޑު ގައުމީ ލަދެއްގެ ގޮތުގައި ސިފަކުރައްވާފައިވާ ރައީސު ޖޯ ބައިޑަން ވަނީ ބަޑި ގެންގުޅުން ކޮންޓުރޯލުކުރުމަށް، ބަޑިގެންގުޅުމާ ބެހޭ ގާނޫނުތަކަށް އިސްލާހު ގެނައުމަށް ކޮންގްރެސްއަށް ގޮަވައިލައްވާފައެވެ.
"އެމެރިކާގައި ބަޑީގެ ބޭނުންކޮށްގެން ހިންގާ އަނިޔާވެރި އަމަލުތަކުގެ މައްސަލައަކީ އަހަރުމެންގެ ގައުމުގެ ޒަމީރަށް ކުރިމަތިވެފައިވާ ބޮޑު ގޮންޖެހުމެއް. އެކަމާމެދު ފިޔަވަޅު އަޅަންޖެހޭ." ބަޑިގެންގުޅުމާ ބެހޭ ގާނޫނުތައް އިސްލާހުކުރުމާ ގުޅޭގޮތުން ފާއިތުވި މާރިޗު މަހު ހައުސް އޮފް ރެޕްރެޒެންޓެޓިވްސްގައި ކުރިއަށް ދިޔަ ބަހުސުގައި ވާހަކަފުޅު ދައްކަވަމުން ކެލިފޯނިޔާ ތަމްސީލުކުރައްވާ މެންބަރު އަދި ހައުސް އޮފް ރެޕްރެޒެންޓެވިސްގެ ސްޕީކާ ނެންސީ ޕެލޯސީ ވިދާޅުވެފައި ވެއެވެ.
އާއްމު ތަންތަނުގައި ބަޑިޖަހައި މީހުން މެރުން އެމެރިކާގައި އަހަރުން އަހަރަށް އިތުރުވަމުން ދާއިރު، 2109 ވަނަ އަހަރު މިފަދަ ހާދިސާތަކުގައި މަރުވެފައި ވަނީ 417 މީހުންނެވެ. 2020 ވަނަ އަހަރު 600 މީހުން މަރުވެފައި ވެއެވެ.
