އިންޑިއާގެ އެކި ސަރަހައްދުތަކުން ކޮވިޑް-19އަށް ޓެސްޓުކުރަން 1023836 މީހުންގެ ސާމްޕަލް ހުކުރު ދުވަހު ނަގައިފިއެވެ.
އިންޑިއާގެ ހެލްތު މިނިސްޓްރީން ބުނިގޮތުގައި މީގެ ކުރިން އިންޑިއާއިން 24 ގަޑިއިރުގެތެރޭގައި ކޮވިޑް-19އަށް ޓެސްޓު ކުރަން އެއްމިލިއަން ސާމްޕަލް ނަގާފައެއް ނުވެއެވެ.
ހެލްތު މިނިސްޓްރީގެ އިސްބޭފުޅަކު ވިދާޅުވިގޮތުގައި ސާމްޕަލް ނެގި މީހުންގެ ނަތީޖާތައް ލިބުމުން ކޮވިޑް-19އަށް މިހާރު އިންޑިއާއިން ފައްސިވާކަން އެނގޭ މީހުންގެ އަދަދު އިތުރުވުމަކީ އެކަށީގެންވާ ކަމެކެވެ.
ފާއިތުވި 24 ގަޑިއިރުގެ ރެކޯޑުތަކަށްބަލާއިރު އިންޑިއާއިން 69878 މީހުން ވަނީ ކޮވިޑް-19އަށް ފައްސިވެފައެވެ. ފާއިތުވި ހަތަރު ދުވަހަށްބަލާއިރު ވިދިވިދިގެން ކޮންމެ ދުވަހަކު ވަނީ 60 ހާހަށްވުރެ ގިނަ މީހުން ކޮވިޑް-19އަށް ފައްސިވެފައެވެ.
މިއަދު އިރުއޮއްސި ހަތެއްގެ ރިޕޯޓުތަކަށް ބަލާއިރު އިންޑިއާގެ30 ލައްކައަށްވުރެ ގިނަ މީހުންނަށް މިހާތަނަށް ކޮވިޑް-19 ޖެހި، 56259 މީހުން އެ ބަލީގައި ވަނީ މަރުވެފައެވެ.
އިންޑިއާއިން ކޮވިޑް-19އަށް ފައްސިވާ މީހުންގެ ތަފާސް ހިސާބަށް ބަލާއިރު މި އޮގަސްޓުމަހުގެ ކޮންމެ ދުވަހަކު އިންޑިއާއިން 50 ހާހަށްވުރެ ގިނަ މީހުން ކޮވިޑް-19އަށް ފައްސިވެފައިވެއެވެ.
