ސުޕްރީމް ކޯޓްގެ ލަފާ ލިބެންދެން މަޖިލީހުގެ މިރޭގެ ޖަލްސާ ނިންމާ ނުލައި ބާއްވަން ރައްޔިތުންގެމަޖިލީހުގެ ރައީސް، ކުރީގެ ރައީސް މުޙައްމަދު ނަޝީދު ނިންމައިފިއެވެ.
މިރޭގެ ޖަލްސާގައި ވަނީ ސުޕްރީމް ކޯރޓްގެ ލަފާ ހޯއްދެއްވުމަށް، މަޖިލީހަށް ކުއްލި ގޮތަކަށް ހުށަހެޅުއްވި ޤަރާރު 61 މެމްބަރުންގެ އަޣްލަބިއްޔަތުން ފާސް ކުރައްވައިފައެވެ. ޤާނޫނޫއަސާސީ އިޞްލާޙު ކޮށް ކައުންސިލްތަކުގެ ދައުރު ދައްމާލުމުގައި ސުޕްރީމް ކޯޓްގެ ލަފަޔަށް އެދިވަޑައިގެންފައިވަނީ ޤާނޫނުއަސާސީ އިޞްލާހު ކޮށްގެން މައްސަލަ ޙައްލު ކުރުމާމެދު މެމްބަރުންގެ ޚިޔާލު ތަފާތު ވެފައި ވުމާ ގުޅިގެންނެވެ. މަޖިލީހުގެ ޤަރާރުގައި އެދިވަޑައިގެންފައިވަނީ ކޮމެޓީން އެމައްސަލަ ނިންމެވުމުގެ ކުރިން އެމައްސަލައިގައި ސުޕްރީމްކޯޓްގެ އިސްތިޝާރީ ލަފައެއް ދެއްވުމަށެވެ.
"އަޅުގަނޑު ސުޕްރީމް ކޯޓްގައި ދަންނަވަން ބޭނުން، އެބޭފުޅުން އެ މަޝްވަރާ ދެންދެން، މަޖިލީހުގެ މިރޭގެ ޖަލްސާ ނުނިމި ކުރިއަށް ދާނެކަމަށް" މަޖިލީހުގެ ރައީސް ވިދާޅުވިއެވެ.
ކޯޓްތަކުގެ ޤާނޫނާ ހަވާލާ ދެއްވައި މަޖިލީހުގެ ރައީސް ވިދާޅުވީ، އެކަށީގެންވާ މުއްދަތެއްގެ ތެރޭގައި އެ ލަފާ ދެއްވަންޖެހޭނެކަމަށެވެ. މިހާރު މިއޮތް ޙާލަތުގައި އެކަށީގެން ވަނީ މާދަމާ ނޫނީ މާދަމާ ނޫން އަނެއް ދުވަހުގެ ނިޔަލަށް އެކޯޓުން އެލަފައެއް ލިބުންކަމަށެވެ.
އެހެންކަމުން މިރޭގެ ޖަލްސާ ނިންމާ ލުމުގެ ބަދަލުގައި މަޖިލީހުގެ ރައީސް ވަނީ ޖަލްސާ މެދު ކަނޑާ ލައްވައިފައެވެ. ޖަލްސާ މެދު ކަނޑާ ލެއްވުމުގެ ކުރިން ވަނީ މަޖިލީހަށް ހުށަހެޅި މިއަދު ބަހުސް ކުރިއަށް ގެންދެވި ޤާނުނު އަސާސީއަށް އިސްލާޙު ގެނައުމުގެ ބިލް ބަލައިގަނެ މުޅި މަޖިލީހުގެ ކޮމެޓީއަކަށް ފޮނުއްވުމަށް ވެސް ފާސްކުރައްވައިފައެވެ.
