2019 ވަނަ އަހަރު އޮކްޓޯބާރ އަދި ނޮވެމްބާރ ގައި އޭލެވެލް އަދި އޯލެވެލް އިމްތިޙާން ހެދި ދަރިވަރުންގެ ސެޓްފިކެޓްތައް ނުލިބި ހުރީ ކޮވިޑް-19 އާއި ގުޅިގެން ގިނަ ޤައުމުތަކާއި އެ ޤައުމުތަކުގެ އެއާރޕޯޓު ބަންދުކުރުމުން ކަމަށް މިނިސްޓްރީ އޮފް އެޑިއުކޭޝަން އިން ވިދާޅުވެއްޖެއެވެ. އޭލެވެލް އަދި އޯލެެވެލް އިމްތިހާނުގައި ބައިވެރިވި ކުދިންގެ ސެޓްފިކެޓްތައް ނުލިބުމާއި ގުޅިގެން ގިނަ ފަރާތްތަކެއް ކަންބޮޑުވުން ފާޅުކޮށްފައިވާ ދަނޑިވަޅެއްގައި މިނިސްޓްރީ އޮފް އެޑިއުކޭޝަންގެ ފަރާތުން ނެރުނު ބަޔާނެއްގަައި މިނިސްޓްރީގެ ފަރާތުން އިތުރަށް ވިދާޅުވީ އޭލެވެލް އަދި އޯލެެވެލް ސެޓްފިކެޓްތަކަކީ އެ ޔުނިވާސިޓީތަކުން ޕްރިންޓުކޮށް ސީލްޖަހައިގެން ސެންޓަރުތަކަށް ފޮނުވާ އެއްޗެއްކަމަށާއި، ސެޓްފިކެޓްތައް ޕްރިންޓުކުރަނީ ރީޗެކް މަރުހަލާނިމި ދަރުވަރުންގެ ނަތީޖާ ކަށަވަރުވީމަ ކަމަށެވެ. ނަމަވެސް މި މަރުހަލާ ނިމި ސެޓްފިކެޓްތައް ފޮނުވުމާއި ހިސާބަށް އައިއިރު ކޮވިޑް-19 ގެ ސަބަބުން އިނގިރޭސިވިލާތާއި އެހެން ގިނަ ޤައުމުތަކެއްގެ އެއާރޕޯޓުތައް ބަންދުކުރުމާއި ގުޅިގެން ސެޓްފިކެޓްތައް ރާއްޖެ ގެނައުމުގައި ދަތިތަކެށް ދިމާވެފައިވާ ކަމަށެވެ.
މިނިސްޓްރީއިން ވިދާޅުވީ މި ސެޓްފިކެޓްތައް ލިބުނުހާ އަވަހަކަށް ދަރިވަރުންނަށް ދޫކުރުމުގެ އިންތިޒާމް ހަމަޖައްސާނެ ކަމަށެވެ. އަދި ސެޓްފިކެޓް ލިބުމުގެ ކުރިން މަތީ ތައުލީމުގެ ފުރުސަތަށް އެދި ހުށަހަޅަން ބޭނުންވެއްޖެނަމަ މިހާރު ދޫކޮށްފައިވާ ނަތީޖާ ޓްރާންސްކްރިޕްޓުތައް ބޭނުންކުރެވިދާނެކަމަށެވެ. އަދި ނަތީޖާ ކަށަވަރުކުރަން ބޭނުންވެއްޖެނަމަ ޑިޕާޓްމެންޓް އޮފް ޕަބްލިކް އެގްޒަމިނޭޝަންސް އަށް އެކަމަށް އެދި މެއިލްކުރުމުން އެފަދަ ލިޔުމެެއް ލިބޭނެ ކަމަށެވެ
