މިނިސްޓްރީ އޮފް ހެލްތު ހިންގަނީ ރައްޔިތުންގެ މަޖިލީހުގެ މެމްބަރުންގެ ތެރެއިން ބާރުގަދަ ބައެއް މެމްބަރުން ބޭނުންވާ ގޮތަށް ކަމަށް މަރަދޫ ހެލްތު ސެންޓަރު ހިންގެވުމާ ޙަވާލު ހުންނެވި އައްޑޫސިޓީގެ ކުރީގެ ޑެޕިޔުޓީ މޭޔަރު ޢަބްދުﷲ ތައްޔިބު ވިދާޅުވެއްޖެއެވެ.
އެ ސެންޓަރުގެ ސީނިއަރ އެޑުމިނިސްޓްރޭޓަރ ހެލްތު ސާވިސް ޢަބްދު ތައްޔިބު ވިދާޅުވީ އެތަނަށް އެމްބިޔުލާންސެއް ނުލިބިގެން އާދޭސްކުރާތާ އެތައް ދުވަހެއް ވެއްޖެ ކަމަށެވެ. ބައިވަރު އެމްބޮޔުލާންސްތަކެއް ގެނެސްގެން ބަހާލިއިރުވެސް އެތަނަށް ނުލިބޭ ކަމަށް އޭނާ ވިދާޅުވިއެވެ.
އެމްބިޔުލާންސް ރަށްރަށަށް ބަހާލިއިރު ދީފައިވަނީ ބާރުގަދަ މެމްބަރުން ބޭނުން ރަށްރަށަ ކަމަށް އޭނާ ވިދާޅުވިއެވެ. "އެއީ ހަމައެއްނޫން. ހަމައަކީ ރަނގަޅަށް ބެލުމަށްފަހު އެވަގުތަށް އެންމެ އެކަށީގެންވާ ނުވަތަ އެންމެ ބޭނުވާ މަރުކަޒަކަށް ދިނުން އެންރަނގަޅީ،" އޭނާ ވިދާޅުވިއެވެ.
އޭނާ ވިދާޅުވީ މަރަދޫ ހެލްތު ސެންޓަރަކީ ހުރިހާ ގޮތަކުން ބެލިޔަސް އެންމެ ބާރުބޮޑުވާ އެއް ސިއްހީމަރުކަޒު ކަމަށެވެ. އެކްސިޑެންޓުތަކުގައި އެންމެ ގިނައިން މީހުން ގުޅާ އެއް ސެންޓަރަށް އެތަންވާ ކަމަށް ވެސް އޭނާ ވިދާޅުވިއެވެ. ހިތަދޫ ރީޖަނަލް ހޮސްޕިޓަލަށް އެމީހަކު ފޮނުވަންދެން ބާއްވައިގެން ފަރުވާދެނީ އެތަނުން ކަމަށް ވެސް އޭނާ ވިދާޅުވިއެވެ.
"މިޒަމާނަކީ އެނދަށާއި، ގާޑިއާ އަދި ޕިކަޕްތަކަށް ބަލިމީހުން އަރުވައިގެން އުފުލަންޖެހޭ ޒަމާނެއްނޫން. މިއީ ތަރައްގީގެ ޒަމާން. ހެލްތުސެންޓަރުތަކާއި ހޮސްޕިޓަލް ތަކަށް އެމްބިޔުލާންސެއް ނުދެވޭހާ ދިވެހިދައުލަތް ފަގީރެއްވެސް ނޫން އިރާދަކުރެއްވިއްޔާ. އެމްޑީޕީގެ ހެޔޮވެރިކަމުގެ ތެރެއިން މަރަދޫ ސިއްހީ މަރުކަޒަށް އެމްބިޔުލާންސް ނުލިބެންވީ އެއްވެސް ސަބަބެއް ހަމަހިލާ ނުވިސްނޭ،" އޭނާ ވިދާޅުވިއެވެ.
ސިއްހީމަރުކަޒު ތަކަށް ބޭނުންވާ އަސާސީ ޚިދުމަތް ދިނުމަށް އެމްބިޔުލާންސް ފަދަ ވެހިކަލްސް ފޯރުކޮށްދިނުމުގައި ބާރުގަދަ ސިޔާސީ ފަރާތްތަތަކުގެ އަތް އިސްވިޔަ ދީގެން ނުވާނެ ކަމަށެވެ. އެފަދަ ޚިދުމަތްތަކަކީ ސިޔާސީ ކަމެއްކަމަށް ހަދާނަމަ ހުރިހާ ޚިދުމަތެއް ހުއްޓިދާނެ ކަމަށް ވެސް އޭނާ ވިދާޅުވިއެވެ.
