އައްޑޫ ސިޓީ މަރަދޫ ހެލްތު ސެންޓަރ (އެމްއެޗުސީ) ގެ ޚިދުމަތް އިތުރަށް ރަނގަޅު ކުރެވެންއޮތީ އެމްބިޔުލާންސެއް ލިބގެން ކަމަށް އެތަނުން ބުނެފިއެވެ.
ސީނިއަރ އެޑްމިނިސްޓްރޭޓަރ ހެލްތު ސާވިސަސް އަދި އައްޑޫ ސިޓީގެ ކުރީގެ ޑެޕިޔުޓީ މޭޔަރ ޢަބްދުﷲ ޠައްޔިބު ވިދާޅުވީ އެތަނުގައި ރަނގަޅު ކުރަންޖެހޭ ވަރަށްގިނަ ކަންކަން މިހާރުވަނީ ރަނގަޅުވެފައި ކަމަށެވެ.
އެތަނަށް ބޭނުންވާ މުވައްޒަފުން ވެސް މިހާރުވަނީ ލިބިފައެވެ. ތަނުގެ ޒީނަތްތެރި ކަމަށް ބޭނުންވާ ބައެއްކަންކަން ވެސް ވަނީ ކުރެވިފައެވެ. މުވައްޒަފުންގެ މެދުގައި އޮންނަންވާ ގުޅުމާއި އެއްބައިވަންތަކަން މީހާރު ވަނީ ގާއިމް ކުރެވިފައި ކަމަށް ވެސް އޭނާ ވިދާޅުވިއެވެ.
އެމްބިޔުލާންސެއް ނެތުމުން ވަރަށްގިނަ ކަންކަން ނުކުރެވިފައިވާ ކަމަށް އޭނާ ވިދާޅުވިއެވެ. "މިއީ މަސްވެރި ރަށެއް. ބަނދަރުގައި އުޅޭ މަސްވެރިއަކަށް ކަމެއްދިމާވިޔަސް އެންމެ ފުރަތަމަ ގެންނަންޖެހޭ ތަނަކީ މިއީ. އެހެންނަމަވެސް ޙާލަތު ހުރިގޮތުން އެމްބިޔުލާންސެއްނެތި އެކަން ކުރެވެންނެތް. އެމްބިޔުލާންސެއް ނެތިގެން ޑިލޭވަމުން ގޮސް މީހުންގެ ފުރާނަދާ ހިސާބަށް ވެސް އެބަހުރި ކަންކަން ގޮސްފައި. އެހެންވީމާ ކޮންމެހެންވެސް މިތަނަށް އެބަބޭނުންވޭ އެމްބިޔުލާންސެއް،" އޭނާ ވިދާޅުވިއެވެ.
އެމްބިޔުލާންސެއް ނެތުމުން ބަލިމީހުން ތަންތަނަށް އުފުލުމުގެ އިތުރަށް ގޭގޭގައި ތިބޭ ދުވަސްވީ ބަލިމީހުން ގާތަށް ގޮސް އެމީހުންނަށް ފަރުވާ ދިނުމަށް ވެސް ވަނީ ދަތިވެފައި ކަމަށް އޭނާ ވިދާޅުވިއެވެ. އެކްސިޑެންޓެއްގައި މީހަކަށް ކަމެއް ވިޔަސް ސެންޓަރަށް ނުގެނެވި އެތައް އިރެއްވާ ކަމަށް އޭނާ ވިދާޅުވިއެވެ. އެންމެފަހުން އެޗުއާރުއެޗުން ދުއްވާ އެއްޗަކަށް އާދެވޭއިރު ބައެއްފަހަރު ހުންނަނީ ވަގުތުފާއިތުވެފައެވެ.
ތައްޔިބު ވިދާޅުވީ މަރަދޫ ހެލްތު ސެންޓަރަކީ އެކްސިޑެންޓު ތަކުގައި އެންމެ ފުރަތަމަ މީހުންގުޅާ މަރުކަޒަށް ވާނެ ކަމަށެވެ. އެފަދަ ޙާލަތްތަކުގައި ވެސް ކުރެވޭނެ ކަމެއް ނޯންނަ ކަމަށާއި، އެހެންކަމުން ސަރުކާރުގެ ކަމާބެހޭ ފަރާތަކާ ގުޅިގެން އެމްބިޔުލާންސެއް ލިބޭތޯ ވަރަށް ބޮޑަށް މަސައްކަތް ކުރައްވަމުން ގެންދަވާ ކަމަށް ވިދާޅުވިއެވެ. އެހެންނަމަވެސް އަދިވެސް ލިބޭގޮތް ނުވާތަކަމަށް އޭނާ ވިދާޅުވިއެވެ.
ޚިދުމަތް ދޭންޖެހެނީ ތިން ކިލޯމީޓަރެއްހާ ދުރުގައި އޮންނަ އާބާދީއަކަށް ކަމަށާއި އެހިސާބަށްދާން ދަތިތަކެއް ހުރުމަކީ ވެސް އެމްބުލާންސެއް އެތަނަށް މުހިންމު ސަބަބެކެވެ.
ތައްޔިބު ވިދާޅުވީ އެތަނުގެ ޕަބްލި ހެލްތު ޔުނިޓުން ގޭގެއަށް ގޮސް ސިއްހީ މައުލޫމާތު ދިނުމާއި، ގޭގެއަށްގޮސް މަދިރި ނައްތާލަން މަސައްކަތް ކޮށް އެއަށް ބޭސް ޖެހުމާއި މިހެންގޮސް އެތައް ކަމެއް ކުރަންޖެހިފައިވާ ކަމަށެވެ. އެހެންނަމަވެސް އެމްބިޔުލާންސެއް ނެތުމުން އާބާދީއާ ގުޅުން ކެނޑި އެކަންކަން ވަޅުޖެހިފައިވާ ކަމަށް އޭނާ ވިދާޅުވިއެވެ. ސިއްޙީ ދާއިރާ ކުރިއަރުވައި ޚިދުމަތް ރަނގަޅު ކުރައްވާނެ ކަމަށް ރައީސް އިބްރާހީމް މުޙައްދު ޞާލިހު ވެވަޑައިގެންފައިވާ ވަޢުދުތައް ފުއްދެވުމަށްވެސް އެމްބިޔުލާންސެއް ކޮންމެހެން މުހިންމު ކަމަށް އޭނާ ވިދާޅުވިއެވެ.
