ޔާމީން ސަރުކާރުގައި އިންސާނީ ޙައްގުތަކަށް އަރައިގަތުން އޮތީ އާދައިގެ ކަމަކަށް ހަދައިފައި: އެމްއާރުއެމް

ރައީސް ޔާމީގެ ވެރިކަމުގައި ރާއްޖެގެ އިންސާނީ ޙައްޤުތަކަށް އިޙްތިރާމުކުރުމާއި، ޙައްޤުތައް ކުރިއެރުވުމުގެ މަސައްކަތް އޮތީ ވަޅުޖެހިފައި ކަމަށް އެމްއާރުއެމްއިން ބުނެފިއެވެ.

ބައިނަލްއަޤްވާމީ އިންސާނީ ޙައްޤުތަކުގެ ދުވަހާ ގުޅިގެން މޯލްޑިވްސް ރިފޯމް މޫވްމަންޓް (އެމްއާރުއެމް) ގެ ފަރާތުން ނެރުނު ނޫސްބަޔާނެއްގައި ބުނެފައިވަނީ ނިމިދިޔަ ވެރިކަމުގައި އިންސާނީ ޙައްޤުތަކަށް އަރައިގަތުމަކީ ވަރިހަމަކޮށްލެވޭ، އާދައިގެ ކަމަކަށް ވެގެންދިޔައީ ކަންބޮޑުވާ ދަރަޖައަކަށް ކަމަށެވެ.

 ޤާނޫނުއަސާސީގެ 2 ވަނަ ބާބުން ކަށަވަރުކޮށްދީފައިހުރި އަސާސީ އިންސާނީ ޙައްޤުތައް ނެގެހެއްޓުމުގެ ޒިންމާއާއެކު، އެ ޤާނޫނުއަސާސީއިން އުފަންކުރުވި މުސްތަޤިއްލު ކޮމިޝަންތަކުން ވަނީ އެ ކޮމިޝަންތައް އުފެއްދި ބޭނުން އޮޅޭ މިންވަރަށް އިންސާނީ ޙައްޤުތަކަށް އިޙްތިރާމް ކުޑަކޮށްފައި ކަމަށް ވެސް އެމްއާރުއެމުން ބުނެފައިވެއެވެ.

އެދުވަސްވަރު ހިއުމަންރައިޓްސް ކޮމިޝަނަށް ހުށަހެޅުނު އެތައް ޝަކުވާތަކެއް ނިމިގެން ދިޔައީ އަސާސީ އިންސާނީ ޙައްޤުތައް ނިގުޅައިގަތުމުގެ ޢަމަލު ހިންގި ފަރާތްތަކުގެ މަސްލަޙަތުގައި ކަމަށް ވެސް އެޕާޓީންވަނީ ތުހުމަތުކޮށްފައެވެ.  "މި ޕާޓީގެ ލީޑަރުންނާއި، ގިނަ ޢަދަދެއްގެ ސިޔާސީ ފަރާތްތަކަށް ޖަލުގައި ދެމުންދިޔަ ލާއިންސާނީ އަނިޔާއާއި، ބޭއިންސާފު ޝަރީޢަތްތަކާމެދު އުފުލަމުންދިޔަ ޝަކުވާތަކަށް ހިއުމަންރައިޓްސް ކޮމިޝަންއިން ބީރުކަންފަތެއް ދީގެން އޮތީ، ވަކި ބައެއްގެ ސިޔާސީ މަސްލަޙަތު ނެގެހެއްޓުމަށެވެ." އެޕާޓީން ބުނެފައިވެއެވެ. އިންސާނަކަށްވީތީ ލިބެންޖެހޭ ޙައްޤުތައް އޭގެ ފުރިހަމަ މާނައިގައި ލިބިދެވޭކަން ކަށަވަރުކުރުމުގެ ޒިންމާ މަތިކުރެވުނު ކޮމިޝަނުން، އިންސާނީ ޙައްޤުތަކުގެ ކުރިއަށް މަޤާމާއި، ސިޔާސީ މަސްލަޙަތު އިސްކުރިކަމީ، ދިވެހި ތާރީޚުން ދުވަހަކުވެސް ފޮހެވިގެން ނުދާނޭ އަނދިރި ބާބެއް ކަމަށް ވެސް އެބަޔާނުގައިވެއެވެ.

އެހެންކަމުން، އެކޮމިޝަނުން ބޭއިންސާފުން ނިންމާފައިވާ ނިންމުންތަކުގެ ސަބަބުން  ޙައްޤުތައް ގެއްލުނު ފަރާތްތަކަށް އިންސާފު ހޯދައިދިނުމަކީ، ކޮންމެހެން ކުރަންޖެހޭ ކަމެއް ކަމަށްވެސް އެޕާޓީން ވަނީ ބުނެފައެވެ.

މިފަދަ ކަންކަމުގައި އަޅަންޖެހޭ ފިޔަވަޅުތައް ނާޅައި އިހްމާލުވުމަކީ އާދައިގެ ކަމެއްގެ ގޮތުގައި ވެފައި އޮތްއޮތުން ބަދަލުކުރަންޖެހޭ ކަމަށް ވެސް އެމްއާރުއެމުން ބުނެފައިވެއެވެ. އިންސާނީ ޙައްޤުތައް ރައްކާތެރިކުރާނޭކަމުގެ ކަށަވަރުކަމާއި، ގެއްލިދިޔަ އިތުބާރު އަލުން ޤާއިމުކުރެވޭނީ ފާއިތުވެދިޔަ ތަނުގައި ހިއުމަންރައިޓްސް ކޮމިޝަނުން ހިންގި އިހްމާލުގެ ޢަމަލުތައް ރަނގަޅަށް ބެލި، ޙައްޤު ގެއްލުނު ފަރާތްތަކަށް އިންސާފު ހޯދައިދީގެން ކަމަށްވެސް އެބަޔާނުގައި ބުނެފައިވެއެވެ.

އިންސާނީ ޙައްޤުތައް ރައްކާތެރިކޮށްދިނުމަށް ޙަވާލުކޮށްފައިވާ ފަރާތްތަކުން އެކަމަށް އިހުމާލުވުމަކީ ބަލައިގަނެވޭނެ ކަމެއް ނޫންކަމަށް ވެސް އެމްއާރުމުން ބުނެފައިވެއެވެ. އެފަދަ ކަންކަމުގައި ޒިންމާވާންޖެހޭ ފަރާތްކާމެދު ހަރުދަނާ ފިޔަވަޅުތައް އެޅޭނޭ އިންތިޒާމު ހަމަޖެއްސުމަށް ދައުލަތަށް އިލްތިމާސް ކުރާކަމަށއެޕާޓީން ބުނެފައިވެއެވެ. "ފާއިތުވެދިޔަ ތަނުގައި ދިވެހިރާއްޖެ ތަޖުރިބާކުރި، އިންސާނީ ޙައްޤުތަކަށް އަރައިގަތުމުގެ ޢަމަލުތައް ތަކުރާރުވިޔަ ނުދިނުމުގެ ގޮތުން އަޅަންޖެހޭ ފިޔަވަޅުތައް އެޅުމުގައި ހުރިހާ ސިޔާސީ ޕާޓީތަކުންނާއި، ޢާންމު ރައްޔިތުންގެ ފަރާތުން ސަރުކާރަށް ދޭންޖެހޭ އެއްބާރުލުން ދިނުމަށް މި ޕާޓީއިން ގޮވާލަމެވެ. އަދި ދިވެހިރާއްޖެއަކީ، އަސާސީ އިންސާނީ ޙައްޤުތަކުގައި ކުރިއަރާފައިވާ، ތަފާތުކުރުމެއްނެތި އަސާސީ އިންސާނީ ޙައްޤުތައް ލިބިދިނުމުގައި ނަމޫނާ ޤައުމަކަށް ހެދުމުގައި، ފަރުދީ ޒިންމާގެ މުހިންމުކަން ދަނެ، ކޮންމެ ރައްޔިތަކީވެސް އިންސާނީ ޙައްޤުތައް ނެގެހެއްޓުމުގައި ފަރުދީ ގޮތުން އަދާކުރަންޖެހޭ ޒިންމާ އަދާކުރާ ރައްޔިތަކު އުޅޭ ނަމޫނާ ޤައުމަކަށް މިޤައުމު ވާންޖެހެއެވެ." އެމްއާރުމުން ބުނެފައިވެއެވެ.

ބައިނަލްއަޤްވާމީ އިންސާނީ ޙައްޤުތަކުގެ ދުވަހަކީ ޑިސެމްބަރު 10 އެވެ. އެދުވަސް ފާހަގަކުރަންފަށައިފައިވަނ1948ީ ވަނަ އަހަރުގެ ޑިސެމްބަރު މަހުގެ 10 ވަނަ ދުވަހު އ.ދ. ގެ ޖެނެރަލް އެސެމްބްލީއިން އިންސާނީ ޙައްޤުތަކާ ގުޅޭ ބައިނަލްޢަޤުވާމީ މުއާޙަދާ ފާސްކުރި ހިސާބުންނެވެ.