ރާއްޖޭގައި މިހާރުއޮތް އެމްޑީޕީގެ ސަރުކާރުންވަނީ ހުރިހާ ބާރެއް މުށުތެރެއަށް ލައިފައި ކަމަށް ކުރީގެ ހައުސިން މިނިސްޓަރ ޑރ. މުޙައްމަދު މުޢިއްޒު ވިދާޅުވެއްޖެއެވެ.
އޭނާ މިހެން ވިދާޅުވީ ރައީސް ޔާމީން މިނިވަން ކުރުމަށް ގޮވާލައި ޕީޕީއެމް/ޕީއެންސީން މިރޭ ބާއްވަމުން ގެންދާ ރިލޭގައި ވާހަކަ ދައްކަވަމުންނެވެ.
މުޢިއްޒު ވިދާޅުވީ މިސަރުކާރަށް މާތްﷲ ވަނީ ބޮޑެތި ބާރުތަކެއް ދެއްވައިފައި ކަމަށެވެ. އެއީ މީގެ ކުރިން ދިވެހި ސަރުކާރަކަށް ނުދެއްވާހާ ބޮޑެތި ބާރުތަކެއް ކަމަށްވެސް އޭނާ ވިދާޅުވިއެވެ. އެބާރު ބޭނުންކޮށްގެން ސަރުކާރުން ކަންކަން ކުރައްވަމުން ގެންދަވަނީ ހިތުހުރި ގޮތަކަށް ކަމަށް އޭނާ ވިދާޅުވިއެވެ.
ޑރ. މުޢިއްޒު ވިދާޅުވީ ވެރިކަން ހިންގުމުގެ ބާރާއި، ޤާނޫނު ހެދުމުގެ ބާރާއި، ޢަދުލުއިންސާފުގެ ބާރުވެސްވަނީ ސަރުކާރުގެ މުށުތެރެއަށްލައި ފިއްތާފައި ކަމަށެވެ. ކިތަންމެ ފިއްތާލައިގެން އުޅުނަސް ރައީސް ޔާމީން މިނިވަންކޮށްފައި މެނުވީ ކޯލިޝަންގެ މަސައްކަތް ނުހުއްޓާނެ ކަމަށް އޭނާ ވިދާޅުވިއެވެ.
އެ މަސައްކަތަކީ ހަމައެކަނި ރައީސް ޔާމީން މިނިވަން ކުރުމަށް ކުރަމުންދާ މަސައްކަތެއް ނޫންކަމަށް ވެސް މުޢިއްޒު ވިދާޅުވިއެވެ. އެމަސައްކަތަކީ ދިވެހިރާއްޖެއިން ގެއްލެމުންދާ މިނިވަންކަމާއި އިހާނެތިކޮށް ހިތަމުންދާ މާތްވެގެންވާ އިސްލާމްދީނުގެ ދިފާޢުގައި ވެސް ކުރަމުންދާ މަސައްކަތެއް ކަމަށް އޭނާ ވިދާޅުވިއެވެ.
ވެރިކަމުގައި މިސަރުކާރުން ހޭދަކުރި އެއްހަރު ތެރޭގައި ރައްޔިތުންނަށްޓަކައި ފެށި ތަރައްގީގެ އެއްވެސް މަސައްކަތެއްވެސް ނެތްކަމަށާއި ސަރުކާރުން ގެންދަވަނީ ރައްޔިތުންގެ ލޮލުގައި އަނދުން އަޅުވަމުން ކަމަށްވެސް އޭނާ ވިދާޅުވިއެވެ.
ރައީސް ޔާމީން ޖަލަށްލައިފައިވަނީ މަނީލޯންޑަރކުރުމުގެ ކުށް އެމަނިކުފާނުގެ މައްޗަށް ސާބިތުވުމުންނެވެ. އެކުށް ސާބިތުވުމުން ކްރިމިނަލް ކޯޓުން ވަނީ އެމަނިކުފާނު ފަސް އަހަރަށް ޖަލަށްލުމަށް ޙުކުމް ކުރައްވައިފައެވެ. އަދި ފަސް މިލިއަން ޑޮލަރުން ވަނީ ޖޫރިމަނާ ވެސް ކޮށްފައެވެ. އެމަނިކުފާނު މިހާރު ގެންދަވަނީ މާފުށީ ޖަލުގައި ޙުކުމް ތަންފީޒު ކުރައްވަމުންނެވެ.
