މި ސަރުކާރުން ދައްކާ ބިރަކަށް ފަސްޖެހުމެއްނެތި ރައީސް ޔާމީން ސަލާމަތް ކުރުމަށް ނުވަތަ އިންސާފު ހޯދައިދިނުމަށް ކުރަމުންދާ އިހުތިޖާޖު ކުރިއަށް ގެންދާނެ ކަމަށް ޕީޕީއެމް/ޕީއެންސީ ކޯލިޝަނުން ބުނެފިއެވެ.
އެ ކޯލިޝަނުން މިހެން ބުނެފައިވަނީ ނޮވެމްބަރު 30 ވަނަ ދުވަހުގެރޭ ބޭއްވި މުޒާހަރާއިން އެކޯލިޝަނުގެ އިސް ބައެއް މީހުން ބަންދު ކުރުމުން އެކަން ކުށްވެރިކޮށް ނެރެފައިވާ ބަޔާނެއްގައެވެ.
ރޭ ކުރިއަށް ގެންދިޔަ މުޒާހަރާގައިވަނީ ޕީޕީއެމްގެ ނާއިބު ރައީސް، އަޙުމަދު ޝިޔާމާއި އެކޯލިޝަންގެ ކައުންސިލް މެމްބަރުން ކަމަށްވާ، ޢަބްދުﷲ މުޙައްމަދާއި، ހޯރަފުށީ ދާއިރާގެ ކުރީގެ މެންބަރ މުޙައްމަދު އިސްމާޢީލާއި،މުޙައްމަދު ލަތީފާއި، އިބްރާހީމް ފައިސަލް ބަންދުކޮށްފައެވެ.
އެ ކޯލީޝަނުން ވަނީ ރައީސް ޔާމީން ދޫކޮށްލައި އެމަނިކުފާނަށް އިންސާފު ލިބެންދެން އިތިޖާޖު ކުރިއަށްގެންދާނެ ކަމަށް ބުނެ ޤަރާރެއް ފާސްކޮށްފައެވެ. އަދި އެ ޤަރާރާ އެއްގޮތަށް ޢަމަލުކުރާނެ ކަމަށްވެސް އެބަޔާނުގައި ވެއެވެ. "މި އަނިޔާވެރި ސަރުކާރުން ދައްކާ އެއްވެސް ބިރަކަށް، ފަސްޖެހުމެއްނެތި ސާބިތުކަމާއެކު ރައީސް ޔާމީން ސަލާމަތް ކުރުމަށް ކުރަންޖެހުނު ކޮންމެކަމެއް ކުރާނެ ކަމުގެ ޔަގީގަންކަން މިކޯލިޝަންގެ ސަޕޯޓަރުންނަށް އަރުވަމެވެ." އެބަޔާނުގައިވެއެވެ.
އެބަޔާނުގައި ބުނެފައިވަނީ އެކޯލިޝަންގެ އިސް ފަރާތްތައް ބަންދުކޮށްފައިވަނީ ސުލްހަވެރި މުޒާހަރާއެއް ކުރަމުންދަނިކޮށް ކަމަށެވެ. އެހެން ކަމުން އެޢަމަލު ހަރުކަށި ޢިބާރާތުން ކުށްވެރިކުރާ ކަމަށެވެ.
މަނީލޯންޑަރ ކުރިކަމުގެ ކުށް ރައީސް ޔާމީންގެ މައްޗަށް ސާބިތުވެ އެމަނިކުފާނު ފަސް އަހަރަށް ޖަލަށްލާން ކްރިމިނަލް ކޯޓުން ޙުކުމްކުރެއްވި ނޮވެމްބަރު 28 ވަނަ ދުވަހުއެވެ. ޙުކުމާއެކު ވަނީ ފަސް މިލިއަން ޑޮލަރުން ޖޫރިމަނާ ވެސް ކޮށްފައެވެ. އަދި ޙުކުމް ކުރި ދުވަހުން ފެށިގެން 6 މަސްތެރޭގައި އެފައިސާ މީރާއަށް ދެއްކުމަށް ވެސް ޙުކުމުގައިވަނީ ބުނެފައެވެ.
ރައީސް ޔާމީންގެ މައްޗަށް ކޮށްފައިވާ ޙުކުމް މިހާރުވަނީ ހައިކޯޓުގައި އިސްތިއުނާފުކޮށްފައެވެ.
