މިއަހަރުގެ މަސްވެރިންގެ ދުވަހާ ގުޅިގެން ހުޅުވަން ހަމަޖެހިފައިވާ "ފިޝަރީޒް އެކްސްޕޯ 2019" މިއަދު ހުޅުވައިފިއެވެ.
މި އެކްސްޕޯ ހުޅުއްވައިދެއްވީ ރާއްޖޭގެ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙެވެ. ފިޝަރީޒް އެކްސްޕޯ ހުޅުއްވައިދެއްވުމަށްފަހު ރައީސުލްޖުމްހޫރިއްޔާ ވަނީ އެކްސްޕޯގެ ސްޓޯލްތަކަށް ވަޑައިގެން އެތަންތަނަށް ބައްލަވައިލައްވައިފައެވެ. އަދި އެތަންތަނާ ބެހޭ މަޢުލޫމާތު ވެސް އެމަނިކުފާނު ހޯއްދެވިއެވެ.
އެ ސްޓޯލްތަކުގައިވަނީ މަހުގެ އުފެއްދުންތަކާއި މަސްވެރިކަމުގައި ބޭނުންކުރާ އާލާތްތަކާއި ބައެއް އީޖާދީ އުފެއްދުންތަކެވެ. އެތަންތަނަށް ވަޑައިގެން ރައީސް ވަނީ ސްޓޯލްތަކުގެ މީހުންނާއެކު ވަގުތު ކޮޅެއް ހޭދަކުރައްވައިފައެވެ.
ފިޝަރީޒް އެކްސްޕޯއަކީ ދިވެހިރާއްޖޭގެ 39 ވަނަ މަސްވެރިންގެ ދުވަހުގެ މުނާސަބާ ފާހަގަކުރުމުގެ ގޮތުން މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރގެ ފަރާތުން މިއަދުފެށި އެކްސްޕޯއެކެވެ.
މި އެކްސްޕޯ ކުރިއަށްދަނީ ހުޅުމާލޭ ހުރަވީ ސްކޫލުގައެވެ. މިއަދުން ފެށިގެން މިމަހުގެ 8 ގެ ނިޔަލަށް އެކްސްޕޯ ކުރިއަށްދާނެ ކަމަށް ފިޝަރީޒް މިނިސްޓްރީން ވަނީ ވިދާޅުވެފައެވެ. މި އެކްސްޕޯގައި 16 ކުންފުންޏަކުން ބައިވެރިވެފައިވެއެވެ.
މި އެކްސްޕޯގައި މަހުގެ އުފެއްދުންތަކާއި، އައިސްޕްލާންޓާއި ކޫލިންގ ސިސްޓަމްތަކާއި މެރިން އިންޖީނާއި މުވާސަލާތީ ބައެއް އާލާތްތައްވެސް ފެންނަން ހުންނާނެއެވެ. މި އީ މި އެކްސްޕޯ ބާއްވާ ތިންވަނަ ފަހަރެއެވެ.
