ރާއްޖޭގެ 39 ވަނަ މަސްވެރިންގެ ދުވަހުގެ މުނާސަބަތުގައި މަސްކެނޑުމުގެ މުބާރާތެއް ބާއްވަން ނިންމަވައި ބައިވެރިވުމުގެ ފުރުސަތު ފިޝަރީޒު މިނިސްޓްރީން މިއަދު ހުޅުވައިފިއެވެ.
މިމުބާރާތް ހުޅުވާފައިވަނީ ޢުމުރުން 18 އަހަރުން މަތީގެ ދެ ޖިންސުގެ މީހުންނަށެވެ. މުބާރާތުގައި ބައިވެރިވާން ބޭނުންވާ ފަރާތްތަކުން ޑިސެމްބަރު 5 ވަނަ ދުވަހުގެ މެންދުރުފަހު 2:00 ގެ ކުރިން ފިޝަރީޒް މިނިސްޓްރީއަށް ފޯމު ހުށަހަޅަން ވާނެއެވެ.
މިމުބާރާތުގައި ކޮންމެ މީހަކު ކަނޑަން ޖެހެނީ 2 މަހެވެ. ފިޝަރީޒް މިނިސްޓްރީގެ ފަރާތުން މަސް ފޯރުކޮށްދެއްވާނެއެވެ. އެހެންނަމަވެސް މަސް ކަނޑަން ބޭނުންވާ ވަޅިއާއި ވަޅިތޫނުކުރަން ބޭނުންވާ ހިލަގަނޑާއި، މަސްގޮނޑިއާއި، މަސް ކެނޑުމަށްފަހު އަޅާނެ ކަންވާރު (ތެލި/ތަށި) ގެންނަވާނީ އަމިއްލައަށެވެ. މަސްކަނޑަން ފެށުމުގެ 20 މިނިޓް ކުރިން މަސްކަނޑަން ހަމަޖެހިފައިވާ ތަނަށް ހާޒީރުވެ ތައްޔާރުވާން ޖެހެއެވެ. މަސް ކެނޑުމުގެ މުބާރާތް އޮންނާނީ ހުޅުމާލޭ "ޔޫތު ސިޓީ މަސްމާރުކޭޓު ސަރަޙައްދު" ގައެވެ. މި މުބާރާތް އޮންނާނީ ޑިސެމްބަރ 9 ވަނަ ދުވަހު ހަވީރު 4:00 ގައެވެ.
މިމުބާރާތުގައި ވަނަތައް ހޮވާނީ ކަނޑަން ހަވާލުކުރާ ދެ މަސް އެންމެފުރިހަމައަށް ކަނޑައި ނިންމާ ފަރާތްތަކުގެ ތެރެއިން އެއްވަނަ ދެވަނަ އަދި ތިންވަނައެވެ. ފުރިހަމައަށް މަސްކެނޑުމަކީ ކަރުއަޅައި، ބޮލާއި ކަރުގަނޑު ވަކިކޮށް، ހަންދަމައި ކިބަކުރުމަށްފަހު ކަށިއަރި ނަގައި 4 ގަނޑު ވަކި ކުރުމެވެ. މަސްކަނޑާ ނިމުނު ކަމަށް ބެލެވޭނީ މިކަންކަން ފުރިހަމަކޮށް ވަޅިން އަތްދޫކޮށްލުމުންނެވެ. މުބާރާތުގައި ބައިވެރިވާ މީހުންގެ ތެރެއިން ވަނަ ހޮވާނީ ދެ ޖިންސް ވަކިންނެވެ.
މި މުބާރާތުގެ ޤަވާއިދު ބުނާ ގޮތުން މަސްކަނޑާއިރު އުކާލެވޭ ބައިތައް ބަހައްޓަންވާނީ މަސްކަނޑާ މީހާގެ ވައަތްފަރާތުގައެވެ. މަސްގަނޑުތައް ބަހައްޓަންވާނީ ކަނާތްފަރާތުގައެވެ.
