ރާއްޖޭގެ 39 ވަނަ މަސްވެރިންގެ ދުވަހާ ގުޅިގެން ބާއްވާ މަސްވެރީންގެ ފޯރަމް ފަށައިފިއެވެ. މިފޯރަމުގައި ރާއްޖޭގެ 15 އަތޮޅަކުން މަސްވެރިންވަނީ ބައިވެރިވެފައެވެ. ބްރައިޓްވޭ އިންޓަރނޭޝަނަލް ސްކޫލުގައި ކުރިއަށް ގެންދާ މި ފޯރަމް ފަށްޓަވައި ދެއްވީ ފިޝަރީޒް މިނިސްޓަރ ޒަހާ ވަޙީދެއެވެ.
މިނިސްޓަރ ޒަހާ ވިދާޅުވީ މިފަދަ ފޯރަމެއް ބޭއްވުމުގެ މަޤްސަދަކީ މަސްވެރިކަމުގެ ސިޔާސަތުތައް ބައްޓަންކުރުމުގަޔާއި މަސްވެރިކަމުގެ ސިނާއަތުގައި ދިމާވެފައިވާ ބައެއް ގޮންޖެހުންތަކާއި ގުޅޭގޮތުން ފުޅާ ދާއިރާއެއް މަޝްވަރާކުރުން ކަމަށެވެ. މި ފޯރަމްގައި އިންޑިއާ ކަނޑުގައި، ކަނޑުމަހުގެ މަސްވެރިކަން ދެމެހެއްޓެނިވި މިންވަރެއްގައި ހިފެއްޓުމުގެ ގޮތުން މަސްބާނާނެ މިންވަރު ކަނޑައެޅުމާގުޅޭގޮތުން މަޝްވަރާ ކުރާނެއެވެ. އަދި މަސްވެރިކަމުގެ ތަފާސް ހިސާބު ނެގުމާއި، މަސްވެރިކަމުގެ ޤާނޫނާއި ޤަވާޢިދުތަކާއިގުޅޭގޮތުން ވެސް މަޝްވަރާކުރެވިގެންދާނެއެވެ.
މި ފޯރަމުގައި އެންމެ މުހިންމު ކަމެއްގެ ގޮތުގައި މިނިސްޓަރ ފާހަގަ ކުރައްވާފައިވަނީ އިންޑިއާ ކަނޑުގައި ކަނޑުމަހުގެ މަސްވެރިކަމުގައި މަސް ބާނާނެ މިންވަރު ކަނޑައެޅުމާއި ގުޅޭގޮތުން ނުވަތަ ކެޗް އެލޮކޭޝަންއާއި ގުޅޭ މަޝްވަރާތަކެވެ. "މިއީ އިންޑިއާ ކަނޑުގެ ރީނދޫ އުރަހަ ކަންނެލީގެ ސްޓޮކް ރަތް ދަރަޖައިގައި ގިންތިކުރެވިފައިވާ ދުވަސް ވަރެއްގައި، ވަކިން ޚާއްސަ މައުޟޫއަކަށް މިވަނީ ވެފައި. ދިވެހިރާއްޖެއަށް މިމައުޟޫގެ ޙައްސާސްކަން ވަކިން ބޮޑު،" މިނިސްޓަރ ވިދާޅުވިއެވެ. މަސްވެރިކަމަށް އިންތިހާއަށް ބަރޯސާވާ ގައުމަކަށް މިއީ ވަރަށް މުޙިއްމު މައުޟޫއެއް ކަމަށާއި، އެއީ އެކަމަށް މަސްވެރިންނާއި މަސްވެރި ސިނާއަތުގައި ޙަރަކާތްތެރިވާ އެންމެހާ ފަރާތްތަކުން ވެސް ޚާއްސަ ސަމާލުކަމެއް ދޭންޖެހޭ މައުޟޫއެއް ކަމަށް މިނިސްޓަރ ވިދާޅުވިއެވެ.
މި މައުޟޫ އާއި ފޯރަމުގައި ދެންހުރި ކަންކަމާ ވެސް ވަރަށް ގުޅުން ބޮޑު ކަމަށް މިނިސްޓަރ ވިދާޅުވިއެވެ. "މަސްވެރިކަމުގެ ތަފާސް ހިސާބަކީ ކެޗް އެލޮކޭޝަން ފޯމިއުލާއެއްގެ އެންމެ މުހިންމު އެއް ތަނބު. އެހެންކަމުން، މަސްވެރިކަމުގެ ތަފާސް ހިސާބުގެ މައުޟޫއަކީ މިއަދު ތިޔަބޭފުޅުން ޚާއްސަ ސަމާލުކަމެއް ދިނުމަށް އެދެން،" މިނިސްޓަރ ޒަހާ ވިދާޅުވިއެވެ.
އެކަމަނާ ވިދާޅުވީ މަސްވެރިކަމުގެ ސިނާއަތުގެ އެންމެ މުހިންމު ބައިވެރިންނަކީ އޮޑިވެރިންނައި، މަސްވެރިންނާއި އަދި އެސިނާއަތާ ދެންވެސް ގުޅުންހުރި ފަރާތްތައް ކަމަށެވެ. އެންމެ މުހިއްމު ބައިވެރިންނަކީ، އޮޑިވެރިންނާ މަސްވެރިން އަދި މިސިނާއަތުގައި ހަރާކާތްތެރިވާ ހުރިހާ ފަރާތްތައް ކަމަށެވެ. "މިފޯރަމްގައި ރާއްޖޭގެ ފަނަރަ އަތޮޅުން، މަސްވެރިންނާއި އޮޑިވެރިން ތަމްސީލްވެގެންދާކަމީ އަޅުގަނޑު ނުހަނު އުފާވާކަމެއް. އަދި މަސްވެރިކަމުގެ ސިނާއަތުގެ ތަފާތު މަސައްކަތްތަކުގައި ހަރާކާތްތެރިވާ ކުންފުނިތަކާއި މަސްވެރިކަމުގެ ޖަމްއިޔާތަކުން ބައިވެރިވާކަމީ މިފަދަ މަޝްވަރާތަކަށް ލިބޭނޭ އިތުރު ކުރިއެރުމެއްކަމުގައިދެކެން،" މިނިސްޓަރ ޒަހާ ވިދާޅުވިއެވެ.
