ދީނީ ޢިލްމްވެރިޔާ ޑރ. އަފްރާޝީމް ޢަލީ އަވަހާރަކޮށްލުމުގެ މައްސަލާގައި ޑރ. ޝަހީމްގެ މައްޗަށް ދަޢުވާ ކޮށްފިއެވެ.
ޑރ. އަފްރާޝީމް އަވަހާރަކޮށްލި ޖަރީމާގެ ތަޙްޤީޤަށް ދޮގުމަޢުލޫމާތުދީ ތަޙްޤީޤަށް ހުރަސް އަޅައިފައިވާކަމަށް ތުހުމަތުކޮށް ދީނީ ޢިލްމުވެރިޔާ ޑރ. މުޙައްމަދު ޝަހީމް ޢަލީ ސަޢީދުގެ މައްޗަށް ދަޢުވާކުރުމަށް ހުށަހެޅުމުން އޭނާ ވިދާޅުވެފައިވަނީ އެއީ މަސައްކަތަށް ހުރަސްއަޅައި ސިޔާސީ މުސްތަޤްބަލް ދުއްވާލަން ކުރި ދަޢުވާއެއް ކަމަށެވެ.
ޑރ. އަފްރާޝީމް ޢަލީ އަވަހާރަކޮށްލުމުގެ ޖަރީމާ އަކީ އޭނާއާ އެއްވެސް ވަރަކަށް ގުޅުން ހުރި މައްސަލައެއް ނޫންކަމަށް ވިދާޅުވަމުންގެންދަވާ ވާހަކަ، ޑރ ޝަހީމްގެ ޓްވީޓްގައި ވަނީ ތަކުރާރުކުރައްވައިފައެވެ.
"ދައުވާކުރަނީ އަޅުގަނޑުގެ މަސައްކަތަށް ހުރަސްއަޅައި ސިޔާސީ މުސްތަޤްބަލް ދުއްވާލުމަށެވެ. މާތް ﷲ އަށް ވަކީލް ކުރަމެވެ." ޑރ. ޝަހީމްގެ ޓްވީޓްގައި ވިދާޅުވެފައި ވެއެވެ.
ޑރ. އަފްރާޝީމް ޢަލީ އަވަހާރަކޮށްލުމުގެ ޖަރީމާ ތަޙްޤީޤަށް ދޮގުމަޢުލޫމާތު ދީ ތަޙްޤީޤަށް ހުރަސް އަޅައިފައިވާކަމަށް ތުޙުމަތުކޮށް ދީނީ ޢިލްމުވެރިޔާ ޑރ.ޝަހީމްގެ މައްޗަށް ދަޢުވާކޮށްދެއްވުމަށް އެދި މަރުތަކާ ބެހޭ ރިޔާސީ ކޮމިޝަނުން ޕްރޮސެކިއުޓަރ ޖެނެރަލް (ޕީޖީ) އަށް ފޮނުވިކަން ހާމަކުރެއްވީ މިއަދު އެކޮމިޝަނުން ކޮށްފައިވާ ޓްވީޓެއްގައެވެ.
ދީނީ ޢިލްމްވެރިޔާ ޑރ. އަފްރާޝީމް އަވަހާރަކޮށްލުމުގެ ޖަރީމާ ހިންގިކަން އެކިމިންވަރަށް އެނގި، އެކަން ސިއްރުކުރުމުގެ ތުޙުމަތުގައި، ދިނީ ޢިލްމުވެރިޔާ ޑރ މުޙައްމަދު ޝަހީމް ޢަލީ ސަޢީދު ހިމެނޭ ގޮތަށް 36 މީހަކަށް ޤާނޫނީ ފިޔަވަޅު އެޅުމަށް ރައްޔިތުންގެ މަޖިލީހުން ވަނީ ފާސްކޮށްފައެވެ. ނަމަވެސް އެހެން މީހެއްގެ މައްޗަށް ދައުވާކުރަން ފޮނުވި ވާހަކަ ކޮމިޝަންގެ ޓްވީޓްގައި ފާހަގަކޮށްފައެއް ނުވެއެވެ.
