ސުޕްރީމް ކޯޓުގެ ފަނޑިޔާރު ކަމަށް އައްޔަން ކުރެއްވުމަށްޓަކައި، ރައްޔިތުންގެ މަޖިލީހުގެ ރުހުން ހޯއްދެވުމަށް ރައީސުލްޖުމްހޫރިއްޔާ އިބްރާހިމް މުޙަންމަދު ސޯލިޙް ފޮނުއްވި ޑރ. އަޒްމިރަލްދާ ޒާހިރާއި، އައިޝާ ޝުޖޫންއަށް ރައްޔިތުންގެ މަޖިލީހުން ރުހުން ދީފިއެވެ.
މަޖިލީހުގައި މިއަދު މިކަމަށް ނެގުނު ވޯޓުގައި ޝުޖޫން އާއި އަޒްމިރަލްދާ ސުޕްރީމް ކޯޓުގެ ފަނޑިޔާރު ކަމަށް އައްޔަން ކުރަން ފެންނަ ކަމަށް 62 މެމްބަރުން ވޯޓު ދެއްވާފައި ވެއެވެ. މި ދެބޭފުޅުން އެ ކޯޓުގެ ފަނޑިޔާރު ކަމަށް އައްޔަން ކުރަން ނުފެންނަ ކަމަށްވެސް އެއް މެމްބަރަކު ވޯޓު ދެއްވާފައިވެއެވެ. އަދި ވަކިގޮތަކަށް ވޯޓު ނުދެއްވައިވެސް އެއް މެމްބަރަކު އިންނެވިއެވެ.
ސުޕްރީމް ކޯޓުގެ ފަނޑިޔާރު ކަމަށް އައްޔަން ކުރުމަށް މިއަދު މަޖިލީހުން ރުހުން ދެއްވި ދެބޭފުޅުންގެ ތެރެއިން ޑރ އަޒްމިރަލްދާ ވަނީ ހައިކޯޓުގެ ފަނޑިޔާރުކަންވެސް ކުރައްވާފައެވެ. އޭނާ އެ މަގާމުން 2016 ވަނަ އަހަރު އިސްތިއުފާ ދެއްވިއިރު، ޝުޖޫންއަކީވެސް ސިވިލް ކޯޓުގެ ފަނޑިޔާރުކަން ކުރައްވާފައިވާ ފަރާތެކެވެ. އޭނާ އެ މަގާމުން އިސްތިއުފާ ދެއްވީ 2015 ވަނަ އަހަރުއެވެ. ސުޖޫންއަކީ ދާދިފަހުން އެކުލަވާލެވުނު ބާ ކައުންސިލްގެވެސް މެމްބަރެކެވެ.
އަންހެން ދެ ފަނޑިޔާރުން ސުޕްރީމް ކޯޓަށް އައްޔަން ކުރައްވާއިރު، އެ ކޯޓުގެ ފަނޑިޔާރު ކަމުގައި ކުރިން ހުންނެވި އަބްދުﷲ ދީދީ މިހާރު ވަނީ މަޖިލީހުގައި ނެގި އިތުބާރު ނެތް ކަމުގެ ވޯޓާއެކު މަގާމުން ވަކި ކުރައްވާފައެވެ. އެ މަގާމަށްވެސް ފަނޑިޔާރަކު އައްޔަން ކުރެއްވުމަށްޓަކައި ފަނޑިޔާރު ކަމަށް ކުރިމަތި ލުމުގެ ފުރުޞަތު ޖޭއެސްސީން ހުޅުވާލިއެވެ.
