ރާއްޖެއަށް މިހާރު ކުރަމުންދާ ވިއްސާރައިގައި މާލެސިޓީއަށް ބޯކޮށްވާރޭ ވެހި ބައެއް މަގުތަކުގައި ފެންބޮޑުވެއްޖެއެވެ.
ފެން ބޮޑުވުމުން އެމްއެންޑީއެފް ފަޔަރ އެންޑް ރެސްކިއު ސާވިސްއިން ގެންދަނީ ޕަމްޕް ބޭނުންކޮށް ފެން ހިންދުމުގެ މަސައްކަތް ކުރަމުންނެވެ. ފެން ހިއްކަމުންދަނީ އައިޖީއެމްއެޗް ކައިރި، ވެސްޓް ޕާކް ކައިރި، ބޮޑު ތަކުރުފާނު މަގު ދުވާ ޓްރެކް ކައިރީގައެވެ.
މެޓު އޮފީހުން ވިދާޅުވީ ކުރިއަށް އޮތީވެސް ވިއްސާރަ ކަމަށެވެ. އެގޮތުން ރާއްޖޭގެ އެކިހިސާބަށް ވިއްސާރަކޮށް ބައެއް ރަށްތަކަށް ބޯކޮށް ވާރޭވެހުމާއެކު ގުގުރާނެ ކަމަށް އެ އޮފީހުން ވިދާޅުވެފައިވެއެވެ.
ހުޅަނގާއި ހުޅަނގުއުތުރުން، އުތުރުގެ އަތޮޅުތަކަށް ގަޑިއަކު 05 މޭލާއި 13 މޭލާ ދެމެދުގެ ބާރު މިނުގައި ވައިޖެހޭނެއެވެ. އެހެން ހިސާބުތަކަށް ހުޅަނގުދެކުނާއި ހުޅަނގުން ގަޑިއަކު 10 މޭލާއި 20 މޭލާ ދެމެދުގެ ބާރު މިނުގައި ވައި ޖެހޭނެއެވެ. ވިލާގަނޑުގައި ގަޑިއަކު ގާތްގަނޑަކަށް 35 މޭލު ބާރުމިނަށް ވައި ގަދަވުން އެކަށީގެންވާ ކަމަށް މެޓުން ވަނީ ވިދާޅުވެފައެވެ.
އުތުރުގެ ކަނޑުތައް އާދައިގެ ވަރަކަށް މަޑުވާނެ ކަމަށާއި އެހެންހިސާބުތަކުގައި އާދައިގެ ވަރަކަށް ގަދަވެފައި ވިލާގަނޑުގައި ގަދަވާނެ ކަމަށް ވެސް މެޓު އޮފީހުން ވިދާޅުވެފައިވެއެވެ.
