ކޮންމެ އަހަރެއްގެ ވެސް ފެބުރުވަރީ 21 ވަނަ ދުވަސް ފާހަގަކުރަނީ ބައިނަލްއަގުވާމީ މާދަރީބަހުގެ ގޮތުގައެވެ.
މިއަހަރު ރާއްޖޭގައި އެ ދުވަސް ފާހަގަ ކުރުމުގެ ގޮތުން ދިވެހިބަހުގެ އެކެޑަމީން ވަނީ އެ ބަޔަކު ނިސްބަތްވާ ރަށަކަށް ނުވަތަ ސަރަޙައްދަކަށް ޚާއްޞަ ހޭޝްޓެގުތަކެއް ތައާރަފު ކުރައްވައިފައެވެ.
އާފަތިހަށް ދެއްވި ބަސްދީގަތުމެއްގައި، ދިވެހިބަހުގެ އެކެޑަމީގެ ރައީސް އަޝްރަފް ޢަލީ ވިދާޅުވީ އެ ހޭޝްޓެގްތައް ބޭނުން ކުރައްވައިގެން ޓްވީޓު ކުރެއްވުމުގެ ފުރުސަތު އިއްޔެއިން ފެށިގެން ހުޅުވާލެވިފައިވާ ކަމަށެވެ.
ބަހުރުވަތަކަށް ޚާއްޞަ ކުރައްވައި އެކެޑަމީން ތަޢާރަފް ކުރައްވައިފައިވާ ފަސް ހޭޝްޓެގަކީ #ރަށިބަސް #ރަށިބަހަ #ރަޓުބަހަ #ރަށުބަހަ #ރަށުބަސް މި ފަސް ޓެގެވެ. އެކެޑަމީގެ ޓްވިޓަރ އެކައުންޓަކީ DhivehiEkedamee@ އެވެ.
ދިވެހިބަހުގެ އެކެޑަމީގެ ރައީސް އަޝްރަފް ޢަލީ ވިދާޅުވީ އެރަށަކަށް ނުވަތަ އެ ސަރަޙައްދަކަށް ޚާއްޞަ ހޭޝްޓެގް ބޭނުން ކުރައްވައިގެން ޓުވީޓު ކުރެއްވުމުގައި އެސަރަޙައްދަކަށް ނުވަތަ އެރަށަކަށް ޚާއްޞަ ކަންކަމާއި ބަހުރުވައިގެ ޚާއްޞަ ލަފުޒުތަކާއި ޢާއިލީ ނަންނަމާއި، ދިވެހި ބޭސްވެރިކަމާއި ނަކަތްތެރިކަމާއި، ފަންޑިތަވެރިކަމާއި މަސައްކަތްތެރިކަން ފަދަ ސަގާފީ މާނަވީ ތަރިކައިގެ ތެރޭގައި ހިމެނޭ ވެހިކަންކަމުގެ ކަންކަން ޙިއްސާ ކުރައްވަމުން ގެންދިއުމުގެ ފުރުސަތު އެބަ އޮތް ކަމަށެވެ.
"އަޅުގަނޑުމެން ފާހަގަ ކޮށްފައިވާ ކަންކަން ފަދަ ކިތަންމެ ކަމެއްގެ މައްޗަށް އެ ރަށެއްގެ ބަހުރުވައަކުން ޓުވީޓު ކުރައްވަމުން ގެންދަވަން އަޅުގަނޑު އިލްތިމާސް ކުރަން. އައްޑޫ މީހުން އައްޑޫ ބަހުރުވައިން، ހުވަދޫ މީހުން ހުވަދޫ ބަހުރުވައިން ފުވައްމުލަކު މީހުން އެ މީހުންގެ ބަހުރުވައިން، ހައްދުންމަތީ މީހުން އެ މީހުންގެ ބަހުރުވައިން އަދި މިނޫނަސް ރާއްޖޭގެ އެހެން ކޮންމެ ރަށެއްގެ ބަޔަކު ވެސް އެ ބަޔަކަށް ޚާއްޞަ ވެށި ބަހަކުން ފަންޑިތަވެރިކަމާއި، ބޭސްވެރިކަމާއި، ނަކަތްތެރި ކަމާއި، މަސައްކަތްތެރިކަމާއި އެމީހުންގެ ތެރޭގައި ހުންނަ ޚާއްޞަ ލަފުޒުތައް ބޭނުން ކޮށްގެން ރަށު ބަހުރުވައިން ޓްވީޓް ކުރައްވަމުން ގެންދަވަންވީ،" އަޝްރަފް ވިދާޅުވިއެވެ. އެއިން ލިބޭ މަޢުލޫމާތު ބޭނުންކޮށްގެން ދިވެހިބަހުގެ ބަރުވުތައް ރައްކާތެރި ކުރުމާއި ބަހުރުވަތަކުގެ ބަސްފޮތްތައް އެކުލަވައިލަން ބޭނުންވާ ޚާއްޞަ ލަފުޒުތައް ހޯދަން ޚާއްޞަ ހޭޝްޓެގު ބޭނުން ކުރައްވައިގެން ލިބޭ މަޢުލޫމާތުގެ ބޭނުން ކުރަން ހަމަޖެހިފައިވާ ކަމަށް އަޝްރަފް ވިދާޅުވިއެވެ.
"އެނގިވަޑައިގަންނަވާނެ. އަދުގެ ސަރުކާރުން ބަހުރުވަތައް އާލާކުރާން ވަރަށް ބޮޑު އިސްކަމެއް ދެއްވާ. ރައީސުލްޖުމުހޫރިއްޔާ އިބްރާހީމް މުޙައްމަދު ޞާލިޙު ވަރަށް ބޮޑަށް މި ފަދަ އިޖުތިމާޢީ މައްތިނި ތަރައްޤީ ކުރެއްވަން އިސްކަން ދެއްވާ. ސަރުކާރުގެ ވަޢުދުނާމާގައި ވެސް މި ކަންކަން ވަނީ ހިމަނުއްވައިފައި. އެހެންވީމާ އެފުރުސަތު އެކެޑަމީ މި ހުޅުވައި މިލީ އާންމުކޮށް،" އަޝްރަފް ވިދާޅުވިއެވެ.
މި ހިނގާ 2019 ވަނަ އަހަރު ޔުނެސްކޯއިން ޚާއްޞަ ކުރައްވައިފައިވަނީ ވެހި ބަސްބަހުގެ އަހަރުގެ ގޮތުގައެވެ. މިއަހަރުގެ މާދަރީބަހުގެ ޝިޢާރެއްގެ ގޮތުގައި ޔުނެސްކޯއިން ހަމަޖައްސަވައިފައި ވަނީ "ތަރައްޤީއަށާއި އަމަންއަމާންކަން ގާއިމު ކުރުމަށާއި ސުލްޙައަށް ޓަކައި ވެހި ބަސްބަސް ވަރަށް މުހިންމު" މި ޝިޢާރެވެ.
