މަޢުލޫމާތާއި ތަޖުރިބާތައް ހޯދުމަށް އެންމެ ފަސޭހަ އެއްގޮތަކީ، ރަނގަޅު ފޮތް ކިޔުމެވެ. ރަނގަޅަށް، ރަނގަޅު ފޮތެއް ކިޔުމުން، އެ ފޮތް ލިޔުނު މުސައްނިފާއެކު ވަގުތުކޮޅެއް ހޭދަކޮށް، ތަޖުރިބާ ޙިއްޞާކުރުމެކޭ އެއްފަދައެވެ. މިސާލަކަށް، މަހާތުމާ ގާނދީގެ އޮޓޯބައިގްރަފީ "މައި އެކްސްޕެރިމަންޓް ވިތު ޓުރުތު" ކިޔައިލުމުން، މި ވަރުގަދަ ޝަޚްޞިއްޔަތުގެ ސިކުނޑިއަށް ވަދެވޭކަހަލައެވެ. ނޫނީ އޭނާގެ ލޮލަށް ދުނިޔެ ފެނުނު ގޮތަށް ތިމާއަށް ދުނިޔެ ފެންނަ ކަހަލައެވެ. އެފަދަ މުހިންމު ސަޚުޞިއްޔަތުންގެ އޮޓޯބައިގްރަފީ އަކީ، އެމީހުން ޙާޞިލްކުރި ތަޖުރިބާތަކެވެ. އެފަދަ މީހުން މަންޒިލަށް ވާޞިލްވުމަށް ކުރަންޖެހުނު "ހަނގުރާމަ" ތަކެވެ. ބިލް ގޭޓްސް، ސެލްވަޑޯ ޑާލީ، ދަލާއިލާމާ، މަދަރ ތެރީސާ ފަދަ ބޭބޭފުޅުންގެ އޮޓޯބައިގްރަފީ (ޙަޔާތުގެ ހަނދާންތައް) ކިޔައިލުމުން، އެ ތަޖުރިބާކުރެވެނީ ވަރަށް ބޮޑު އެއްޗެކެވެ. ކީރިތި ރަސޫލު z ގެ ސިޔަރަތުން ލިބޭ ތަޖުރިބާއަކީ، ދުނިޔެއުޅުމުގެ ފަލްސަފާއެކެވެ. މަތިވެރި އަޚުލާޤުގެ ފުރިހަމަ ނަމޫނާއެކެވެ. ދުނިޔަވީ ކާމިޔާބީތައް ޙާޞިލްކުރުމަށް އޮތް މަގުޗާޓެކެވެ. އެ ސިޔާސަތުން، ތާއަބަދުގެ ދުނިޔެ ހޯދުމަށް މަސައްކަތްކުރާ މީހަކު ކަންތައްތައް ކުރަންވީގޮތް ރަނގަޅަށް ހާމަވެގެން ދެއެވެ. އެފަދަ ފޮތްފޮތް ކިޔައިލުމުން، ސިކުނޑިއަށް ކުރެވޭ އިޙްސާސްތައް، ތިމާ ދޫކޮށް ނުގޮސް، މުޅި ޢުމުރަށް ހަރުލާ ފިލާވަޅުތަކަކަށް ވެއެވެ.
އަގުހުރި ރަނގަޅު ފޮތެއް ކިޔުމުގައި، ކޮންމެ ދުވަހަކުވެސް އެއްގަޑިއިރު ހޭދަކުރާށެވެ. އެ އާދައިގެ ސަބަބުން، މީހެއްގެ މުޅި ޙަޔާތް ރަނގަޅު މަގަށް ބަދަލުކޮށްލައިދީފާނެއެވެ. އެފަދަ ފޮތްފޮތް ގަނެފައި ބަހައްޓާށެވެ. އެއަށްވުރެ އަގުބޮޑު މުދަލެއް ދަރީންނަކަށް ދުލެއް ނުކުރެވޭނެއެވެ. ހެޔޮ ދިރިއުޅުމެއް އުޅުމާއި ބާއްޖަވެރި ޙަޔާތެއް ހޭދަކުރުމާއި ދުނިޔަވީ ފަލްސަފާ އާއި އާޚިރަތްދުވަސް ކާމިޔާބުކުރުމާބެހޭ ފޮތްފޮތަކީ، ކަރުދާހުގައި ހުއްޓަސް އަގުބޮޑު ޖަވާހިރެވެ. އެފަދަ ފޮތްފޮތް ކިޔައި، އެފަދަ ފޮތްފޮތް ކިޔުމަށް ދަރީން ހޭނުވުމަކީ، ދުނިޔެ އާއި އުޚުރަވީ ޙަޔާތް ބާއްޖަވެރިކުރުމަށް އޮތް މަގެކެވެ.
އެފަދަ ފޮތްފޮތް ކިޔުމުން ލިބޭ ތަޖުރިބާއިން ތިމާ ހެޔޮމަގަށް އަޅުވައިދީ، އެހެން މީހުންނާމެދު ކަންތައްތައް ކުރަންވީ ގޮތް ދަސްކޮށްދެއެވެ. ޙަޔާތަކީ ކާމިޔާބު އެއްޗަކަށް ހެދުމަށް ބޭނުންވާ އެތައް ފިލާވަޅެއް ލިބެއެވެ.
ރަނގަޅު ފޮތަކީ، އަގުނުކުރެވޭނެ އެއްޗެކެވެ.
ވިސްނާށެވެ. ލިޔެކިޔަން އެނގި، ރަނގަޅު ފޮތްފޮތް ނުކިޔުމެކޭ، އެއްގޮތަކަށް ވެސް ލިޔަންކިޔަން ނޭނގުމެކޭ ތަފާތެއް ނެތެވެ. ރަނގަޅު ފޮތްފޮތް ކިޔުމުން މާޔޫސްކަން ކަނޑުވައިލައި، އުންމީދު އައުކޮށްދެއެވެ. އުންމީދު ގެއްލިފައިވާ ފުރާނައަށް އާރޯކަން ގެނެސްދީ ތާޒާކޮށްދެއެވެ.
ޚާއްޞަކޮށް، ލީޑަރުންގެ ގޮތުގައި ކުރިޔަށްދިއުމުގެ ފުރުޞަތު ލިބިފައިވާ މީހުން ފޮތް ނުކިޔާނަމަ، އެކުރެވޭ ކަމަކީ، އަމިއްލައަށް "ގައުވުމަށް" މަގުފަހިކުރެވެނީއެވެ.
