ކަލޭ ދުނިޔޭގައި ހުންނަ ކޮންމެ ދުވަހަކީ، ކަލޭގެ ޙަޔާތް އެއް ދުވަހުން ދައްކައިދޭ ދުވަހެކެވެ. ކަލޭ ހޭދަކުރާ ކޮންމެ ގަޑިއަކީ، ކަލޭގެ ޙަޔާތުގެ އަހަރުތަކުގެ ނަމޫނާއެކެވެ. ކަލޭގެ ދުވަސްތައް ހޭދަކުރަމުން ދިޔަދިޔަހެން ކަލޭގެ ޙަޔާތް ފުރިހަމަވަމުން ދެއެވެ. މިއަދު ކަލޭ ކުރާ ކަމަކީ، ކަލޭ ބިނާކުރާ މުސްތަޤުބަލެވެ. ދައްކާ ވާހަކަ އާއި ކުރާ ފިކުރުތަކާއި ކާ ކެއުމާއި ކުރާ ޢަމަލުތައް، އެ ކަނޑައަޅައިދެނީ ކަލޭގެ މަންޒިލެވެ. ކަލެއަކީ ކާކުކަން ކަނޑައަޅައިދެނީ، އެ ކަންތައްތަކުންނެވެ. ކުދިކުދި ކަންތައްތަކުން ހީނުކުރާހާ ބޮޑެތި ނަތީޖާ ނިކުމެއެވެ.
ވިސްނަންވީ، އެހައި މުހިންމު ދުވަހެއް ނޫންކަމަށް ކަނޑައަޅާނެ ދުވަހެއް ނެތްކަމެވެ.
ދުލުގެ ނުބައިކަމުން އެހެން މީހުން ސަލާމަތްކުރަން ޖެހެނީ އެހެންވެގެންނެވެ. ހިތްނިޔަތް ކޮންމެ ކަމާމެދު ވެސް ނުބައިނުކުރަންވީ އެހެންވެގެންނެވެ. ވީވަރަކުން ހެޔޮކަމެއް ނޫންކަމެއް، ނުކުރަންވީ އެހެންވެގެންނެވެ. އާޚިރަތަށް ތައްޔާރުވާ މީހާގެ ކޮންމެ ގަޑިއަކީ، އަދި ކޮންމެ ދުވަހަކީ، ވަރަށް ވެސް އަގުބޮޑު އެއްޗެކެވެ. ސުވަރުގެވަންތަވެރިޔަކަށް، ތިމާއަށް ނުވެވެންވީ އެއްވެސް ސަބަބެއް ނެތެވެ. ބޭނުމީ، ކީރިތި ޤުރުއާނާއި ރަސޫލާގެ ސުންނަތުގައި ހިފެހެއްޓުމެވެ.
އަހަރުމެންގެ ތެރެއިން އެންމެ މޮޅު މީހަކީ، ހުނަރާއި ފައިސާ އާއި ކަންކަން ކުރުމުގެ ކުޅަދާނަކަން ހުރި މީހާއެއް ނޫނެވެ. އެންމެ މޮޅު މީހަކީ، އެންމެ ތަޤުވާވެރި މީހާއެވެ. ސަބަބަކީ ފުރަތަމަ ދުވަހުން ފެށިގެން ވެސް އޭނާ އެ އަމާޒުކުރަނީ، ދާއިމީ ޙަޔާތް ބާއްޖަވެރިކުރުމަށެވެ. ނޭނގި ހުއްޓާ ދުވަސްތައް މަސްތަކަށް، މަސްތައް އަހަރުތަކަށް ބަދަލުވަމުން ގޮސް، މަރާ ކުރިމަތިލާން ނުޖެހޭނެ އެކަކުވެސް ނުހުންނާނެއެވެ.
