ބަޔާޅީސް (42) މީހުންނާއެކު ދަތުރު ކުރަމުންދިޔަ ލޯންޗެއް ދިޔަވަމުންދަނިކޮށް އޭގައި ތިބިމީހުން ފުލުހުންގެ ލޯންޗަކަށާއި މަހިބަދޫގެ ލޯންކަށް ނަގައިފިއެވެ.
އެމްއެންޑީއެފުން ވިދާޅުވީ ދިޔަވަމުންދިޔަ ލޯންޗުގައި ތިބި 42 މީހުންގެ ތެރޭގައި 14 އަންހެނުންނާއި ކުޑަކުދިން ހިމެނޭ ކަމަށެވެ. އެމީހުންގެ ތެރޭގައި ދޭސީންނާއި ބިދޭސީން ވެސް ހިމެނެއެވެ. އެމީހުންނަށް އެހީވުމަށް މަހިބަދޫ ސީއެމްބިޔުލާންސް ވެސް ޙަރަކާތްތެރިވެފައިވެއެވެ.
ދިޔަވި ލޯންޗުގައި ތިބި މީހުން ލޯންޗުތަކަށް ހުސް ކުރުމަށްފަހު އެލޯންޗު މިހާރުދަނީ ދަގެއްޗަށް ދަތުރުކުރަމުންނެވެ. މިޙާދިސާގައި އެއްވެސް މީހަކަށް އަނިޔާއެއް ލިބިފައެއް ނުވެއެވެ.
މި ލޯންޗަކީ "ފަޒަސް 5" ނަމަކަށްކިޔާ ލޯންޗެކެވެ. ލޯންޗު ދިޔަވާންފެށީ މާލެއިން ފުރައިގެން އދ. ދިގުރަށަށް ދަތުރުކުރަމުންދަނިކޮށްނެވެ. މިޙާދިސާގެ މަޢުލޫމާތު އެމްއެންޑީއެފަށް ލިބިފައިވަނީ މިއަދު ހަވީރު 5:38 އެހައިކަންހާއިރު ކަމަށް އެތަނުން ވިދާޅުވިއެވެ.
