ކަޓްރީނާ ކައިފްގެ ކޮއްކޮ އިޒަބެލާ ކައިފްގެ ފުރަތަމަ ފިލްމުގައި އޭނާ އާ އެކު ފެންނާނީ ސޫރަޖް ޕަންޗޯލީ އެވެ. އެ ފިލްމަކީ ނެށުމަށް ބިނާކޮށް އުފައްދާ ފިލްމެކެވެ. ފިލްމަށް ދީފަައިވާ ވަގުތީ ނަމަކީ 'ޓައިމް ޓު ޑާންސް' އެވެ. ޓައިމް ޓު ޑާންސްގެ ޑައިރެކްޓަރަކީ ސްޓޭންލީ ޑިކޮސްޓާ އެވެ. ސްޓޭންލީ ވަނީ ރެމޯ ޑެސޫޒާ އާ އެކު ގިނަ ވަރަށް ގިނަ ދުވަހު މަސައްކަތް ކޮށްފައެވެ. ފިލްމް އުފައްދަނީ ޓީ ސީރީޒްގެ ބުޝާން ކުމާރް އާއި ރެމޯ އެވެ.
އިންޑިއަން އެކްސްޕްރެސް އިން ކުރި ސުވާލަކަށް ޖަވާބު ދެމުން ސޫރަޖް ޕަންޗޯލީ ބުނެފައިވަނީ މި ޕްރޮޖެކްޓްގައި މަސައްކަތް ކުރުމުގެ ފުރުސަތު ލިބުމުން ވަރަށް އުފާވާ ކަމަށެވެ. 'ޓައިމް ޓު ޑާންސް' ގައި އޭނާ ދައްކައިދޭނީ ސަލްސާ އާއި ޒުމްބާ އާއި ބަޗަތާ ނެށުމުގެ ސްޓައިލް ތަކެވެ. ފިލްމަށް ތައްޔާރު ވަމުންދާތާ މިހާރު 2 މަސް ވެފައިވާ ކަމަށް އޭނާ ބުނެފައިވެއެވެ. އިޒަބެލާ އަކީ ވަރަަށް މަޖާ މިޒާޖެއްގެ ކުއްޖެއް ކަމަށާއި ވަރަށް ބުރަކޮށް މަސައްކަތް ކުރާ ކުއްޖެއް ކަމަށްވެސް ސޫރަޖް ބުނެފައިވެއެވެ. ނެށުން ފަރިތަކުރުމަށް ކޮންމެ ދުވަހަކު އޭނާ އާއި އިޒަބެލާ ދިހަ ގަޑިއިރު ހޭދަކުރެއެވެ.
މައުލޫމާތު: އިންޑިއަން އެކްސްޕްރެސް އިން
