ވަރުން ދަވަން އާއި އަނުޝްކާ ޝަރްމާ އަކީ ބޮލީވުޑްގެ ތަރީންގެ ތެރެއިން ވަރަށް ހުނަރު އަދި އެހާމެ ކުޅަދާނަ ދެ ތަރީންނެވެ. މި ދެތަރީންވަނީ ބެލުންތެރީންގެ ހިތް ފަތަހަ ކޮށްފައެވެ.
މީސްމީޑިއާގައި އެންމެ ބާރަށް މިހާރު ފެތުރމެންދަނީ އަނުޝްކާ އާއި ވަރުން ބޯޕާލް ގެ މަގުމަތީގައި ވަރަށް ހިތާމަވެރި މަންޒަރެއް ނަގަމުން ދަނިކޮށެވެ. މިއީ މި ދެތަރީން އެކުގައި ކުޅޭ ފިލްމެއް ކަމުގައިވާ ސުއިދަގާ: މޭޑް އިން އިންޑިއާ އެވެ. ފިލްމުގައި ވަރުން ވެސް އަނުޝްކާ ވެސް ފެނިގެންދަނީ ވަރަށް އާދައިގެ ދިރިއުޅުމެއް އުޅޭ ނިކަމެތި ދެ މީހުންގެ ގޮތުގައެވެ. މި މަންޒަރު ނަގަމުން ދިޔައިރު ގިނަ ބަޔަކު ކުޅިބަލަން އެއްވެފައި ތިބި ކަމަށް ވެއެވެ.
ބޯޕާލްގައި ނަގަން ހަމަޖެހިފައވާ ސުއިދަގާ ގެ މަންޒަރުތައް މިހާރު ވަނީ ނިންމާލައިފައެވެ. ފިލްމު ސިނަމާތަކުގައި އަޅުވާނީ މިއަހަރުގެ ސެޕްޓެންބަރު މަހުގެ 28ވަނަ ދުވަހުއެވެ.
ސުއިދަގާ އަކީ އިންޑިއާގެ އަވަށްތަކުގައި ދިރިއުޅޭ މީހުން އެމީހުންގެ އަމިއްލަ ނަފްސަށް އިތުބާރުކޮށް އެމީހުން ބޭނުންވާ މަންޒިލަށް ވާސިލުވުމަށް ކުރާ މަސައްކަތުގެ ތެރެއިން އުފެދޭ ހިތްވަރު ނުވަތަ ރޫހުގެ ވާހަކައެވެ. އަދި މިގޮތަށް މަސައްކަތް ކުރަމުން ދިޔަ ދެމީހެއްގެ މެދުގައި އުފެދުނު ލޯބީގެ ވާހަކައެވެ. އަނުޝްކާ އާއި ވަރުން ކުޅެނީ މި ދެމީހުންގެ ރޯލެވެ. ފިލްމު ޑައިރެކްޓް ކުރަނީ ޝަރަތް ކަޓާރިޔާ އެވެ.
ފިލްމާ ބެހޭ ގޮތުން ވާހަކަ ދައްކަމުން ވަރުން މީގެ ކުރީން ބުނެފައިވަނީ 'މޭޑް އިން އިންޑިއާ' އަކީ ގާނދީ އާއި މޯދީ ފަދަ ލީޑަރުން އަބަދުވެސް ތާއީދު ކުރާ ފިކުރެއް ކަމަށެވެ. ސުއިދަގާ ގައި އޭނާ ކުޅޭ ރޯލުން އެ މެސެޖް އެތައް މިލިއަން މީހުންނަށް ފޯރުކޮށްދެވޭނެތީ އެނާ ހުރީ ވަރަށް އުފަލުންނެވެ.
